សេអ៊ូលថាកូរ៉េខាងជើងអាចនឹងបង្កហេតុច្រើនពេលមុនបោះឆ្នោតសភានៅកូរ៉េខាងត្បូង
ប្រធានាធិបតីកូរ៉េខាងត្បូង លោក យ៉ូន សុកយោល បានប្រកាសនៅថ្ងៃពុធទី ៣១មករានេះថា កូរ៉េខាងជើងអាចនឹងធ្វើសកម្មភាពបង្កហេតុនៅមុនការបោះឆ្នោតទូទៅនៅប្រទេសកូរ៉េខាងត្បូងនាខែមេសាខាងមុខ។ សកម្មភាពបង្កហេតុហេតុមានដូចជា ការវាយប្រហារតាមអ៊ីនធ័រនែត និងការវាយប្រហារដោយដ្រូន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
នៅក្នុងជំនួបប្រជុំក្រុមប្រឹក្សាការពារជាតិប្រចាំឆ្នាំ ដោយមានតំណាងនគរបាល និងភ្នាក់ងារចារកិច្ចចូលរួមផង លោកប្រធានាធិបតីកូរ៉េខាងត្បូង យ៉ូន សុកយោលបានប្រកាសថា “កូរ៉េខាងជើងជាប្រទេសតែមួយគត់នៅលើលោក មានចែងការប្រើប្រាស់អាវុធនុយក្លេអ៊ែរជាកិច្ចការពារខ្លួនក្នុងរដ្ឋធម្មនុញ្ញ។ ហើយនៅឆ្នាំនេះ កូរ៉េខាងត្បូងច្បាស់ជានឹងរងសកម្មភាពញុះញង់បង្កហេតុជាច្រើនមកពីខាងកូរ៉េខាងជើង ក្នុងបំណងរំខានដំណើរការបោះឆ្នោតសភាជាតិ។ ទង្វើបង្កហេតុអាចកើតមានឡើងនៅតាមព្រំដែន ក្នុងទម្រង់ជាច្រើនដូចជា ការលួចបង្ហោះដ្រូនជ្រៀតចូល ផ្សព្វផ្សាយបំពុលព័ត៌មានមិនពិត ឬអាចជាការវាយប្រហារតាមអ៊ីនធ័រនែត។ នេះបើតាមការរៀបរាប់លម្អិតរបស់លោកយ៉ូន សុកយោល។
សម្រាប់លោកប្រធានាធិបតី ការវាយប្រហារតាមអ៊ីនធ័រនែត អាចនឹងធ្វើឱ្យសេវាជាតិ និងជីវិតរស់នៅប្រចាំថ្ងៃរបស់ប្រជាពលរដ្ឋកូរ៉េខាងត្បូង គាំង ក្នុងពេលតែមួយប៉ប្រិចភ្នែក។ ហើយសង្គមជាតិទាំងមូលអាចនឹងធ្លាក់លង់ក្នុងភាពស្រពិចស្រពិលដោយហេតុតែការបំពុលបំភ្លៃព័ត៌មាន។
បើតាមសេអ៊ូល តូក្យូ និងវ៉ាស៊ីនតោន ទង្វើឧក្រិដ្ឋកម្មតាមអ៊ីនធ័រនែតជាចំណែកមួយដែលបានជួយទ្រទ្រង់ព្យុងយ៉ាងក្នុងការអភិវឌ្ឍកម្មវិធីបំពាក់អាវុធហាមឃាត់។ នៅក្នុងសេចក្តីថ្លែងការណ៍កាលពីខែធ្នូ ភ្នាក់ងារចារកិច្ចកូរ៉េខាងត្បូង បានព្រលយឱ្យដឹងរួចហើយថាព្យុងយ៉ាងនឹងបញ្ចេញសកម្មភាពអុកឡុកតាមបែបយោធា និងតាមព័ត៌មានវិទ្យា នៅឆ្នាំ២០២៤ ដើម្បីដៅរំខានយុទ្ធនាការឃោសនាបោះឆ្នោតនៅកូរ៉េខាងត្បូង និងនៅសហរដ្ឋអាមេរិក ដែលក៏ត្រូវបោះឆ្នោតជ្រើសរើសប្រធានាធិបតីផងនៅដំណាច់ឆ្នាំ។ ប្រភពដដែលបានអះអាងទៀតថា ប្រមុខដឹកនាំកូរ៉េខាងជើងគីមជុងអ៊ុន បានស្នើសុំឱ្យសហការីសម្រេចសម្រួចវិធានការបង្ករឿងដើម្បីធ្វើយ៉ាងណាឱ្យមានជ្រើបជ្រួលខ្លាំងនៅដើមឆ្នាំ២០២៤ នៅកូរ៉េខាងត្បូង។
កូរ៉េខាងត្បូងត្រូវរៀបចំការបោះឆ្នោតទូទៅនៅថ្ងៃទី ១០មេសា២០២៤ខាងមុខ និង ជាការបោះឆ្នោតដ៏សំខាន់។ ចូលកាន់តំណែងនៅឆ្នាំ២០២២ លោកប្រធានាធិបតីយ៉ូន សុកយោលដែលមានជំហរតឹងតែងដាច់ខាតប្រឆាំងនឹងកូរ៉េខាងជើង ប្រាថ្នាចង់ឱ្យបក្សកាន់អំណាច បានឈ្នះឆ្នោតដណ្តើមយកសំឡេងភាគច្រើននៅក្នុងសភា ពីបក្សប្រឆាំងវិញ។
ចំណែកខាងយោធាវិញ តាំងពីចូលឆ្នាំ២០២៤មក កូរ៉េខាងជើងបានបង្កើនការបាញ់សាកល្បងអាវុធឥតឈប់។ នៅថ្ងៃអង្គារទី ៣០មករាម្សិលមិញ ជាគម្រប់លើកទីបីក្នុងពេលតែមួយសប្តាហ៍ ព្យុងយ៉ាងបានបាញ់បង្ហោះមីស៊ីលបណ្តែតយុទ្ធសាស្ត្រHwasal-2 ដែលសម្រាប់លក់ឱ្យរុស្ស៊ីយកទៅធ្វើសង្គ្រាមនៅអ៊ុយក្រែនផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ