អាមេរិកនិងជប៉ុនធ្វើសមយុទ្ធយោធារួមគ្នានៅសមុទ្រហ្វីលីពីន
កងទ័ពជើងទឹកសហរដ្ឋអាមេរិក និង សម្ព័ន្ធមិត្តជប៉ុន ធ្វើសមយុទ្ធរួមគ្នា នៅសមុទ្រហ្វីលីពីន។ នេះគឺជាការបង្ហាញ«កម្លាំងសាច់ដុំ»បន្ថែមទៀត ចំពោះមុខស្ថានការណ៍ដ៏តានតឹងជាមួយចិន នៅក្នុងសំណុំរឿងបញ្ហាសមុទ្រចិនខាងត្បូង។ សមយុទ្ធយោធាអាមេរិក-ជប៉ុន រៀបចំឡើង២ថ្ងៃក្រោយ ដែលសម្ព័ន្ធមិត្តហ្វីលីពីននិងវៀតណាម បានចុះកិច្ចព្រមព្រៀងសហការគ្នាទប់ទល់នឹងចិន នៅក្នុងសំណុំបញ្ហាដដែលនេះ។
ចុះផ្សាយនៅថ្ងៃ៖
ស្តាប់ - ០២:២៣
សហរដ្ឋអាមេរិក និង ជប៉ុន សុទ្ធតែមានបញ្ហាជាមួយ ចិន។ រដ្ឋាភិបាលក្រុងវ៉ាស៊ីនតោននិងក្រុងប៉េកាំង មានសំណុំរឿងមិនត្រូវគ្នាជាច្រើនករណី រាប់ចាប់ពីបញ្ហាតៃវ៉ាន់ បញ្ហាសង្គ្រាមពាណិជ្ជកម្ម ប្រព័ន្ធចោរបច្ចេកវិទ្យាព័ត៌មានវិទ្យា។ល។ ចំណែកជប៉ុនវិញ រាជរដ្ឋាភិបាលក្រុងតូក្យូ ក៏ឈ្លោះនឹងចិន ក្នុងសំណុំរឿងដណ្តើមដែនទឹកប្រជុំកោះ សេនកាគូ ហៅតាមជប៉ុន ឬ ទាវយូ ហៅតាមចិន។
នៅពេលនេះ កងទ័ពជើងទឹកសហរដ្ឋអាមេរិក និង សម្ព័ន្ធមិត្តជប៉ុន បានសម្រេចធ្វើសមយុទ្ធរួមគ្នា។ ឧត្តមនាវីទោអាមេរិក ការឡូស សារឌីយែលឡូ បានបញ្ជាក់ប្រាប់ទីភ្នាក់ងារព័ត៌មានបារាំងអាអេហ្វប៉េ ថា វេលានេះ ជាឱកាសសក្តិសមល្អ ដែលត្រូវរំឭករៀបចំធ្វើសមយុទ្ធយោធារួមជាមួយជប៉ុន នៅសមុទ្រហ្វីលីពីន។ ភាគីយោធាអាមេរិក បញ្ចូននាវា ចំនួនជាង១០គ្រឿង ចូលរួមសមយុទ្ធផ្លូវសមុទ្រនេះ ដែលក្នុងនោះ មាននាវា២ អាចផ្ទុកយន្តហោះចម្បាំងផង។ មន្ត្រីជាន់ខ្ពស់អាមេរិកខាងទ័ពជើងទឹក រូបនេះ ក៏សង្កត់ធ្ងន់ប្រាប់អ្នកកាសែតដែរ ថាប្រតិបត្តិការសមយុទ្ធនេះចង់បញ្ជាក់អះអាងជាថ្មីទៀតអំពីសិទ្ធិសេរីភាពធ្វើនាវាចរ និងសិទ្ធិហោះហើរលើសមុទ្រ របស់គ្រប់ប្រទេសទាំងអស់ ដែលស្របទៅនឹងច្បាប់អន្តរជាតិ។
ការប្រកាសសមយុទ្ធរបស់អាមេរិកនិងជប៉ុន ស្របពេលនឹងស្ថានការណ៍ដ៏តានតឹង នៅក្នុងតំបន់ ពិសេសបញ្ហាសមុទ្រចិនខាងត្បូង។ ម្យ៉ាង សម្ព័ន្ធមិត្តរបស់អាមេរិក ហ្វីលីពីននិងវៀតណាម បានចុះកិច្ចព្រមព្រៀងសហការគ្នាទប់ទល់នឹងចិន នៅក្នុងសំណុំបញ្ហានេះ។ ម្យ៉ាងទៀត ចិនចេះតែកំញើញដាក់តៃវ៉ាន់ ដោយធ្វើសមយុទ្ធនៅក្បែរៗកោះតៃវ៉ាន់ ហើយជាច្រើនថ្ងៃជាប់ៗគ្នា កូរ៉េខាងជើង ស្និទ្ធនឹងចិន ក៏ពឺតប្រឹងបាញ់សាកល្បងមីស៊ីល គំរាមកូរ៉េខាងត្បូង ជប៉ុន និងអាមេរិក។ មួយរយៈមកនេះ អាជ្ញាធរកូរ៉េខាងត្បូង និងជប៉ុន បានជូនដំណឹងដល់ពលរដ្ឋខ្លួនដែលរស់នៅក្បែរព្រំដែនកូរ៉េខាងជើង ឲ្យប្រុងប្រយ័ត្ន និងរកកន្លែងមានសុវត្ថិភាព។
ប្រឈមនឹងស្ថានការណ៍ក្នុងតំបន់និងអន្តរជាតិ ជំរុញចិននិងរុស្ស៊ី កាន់តែខិតជិតគ្នា ហើយប្រទេសទាំង២ រឹងរឹតតែត្រូវការគ្នាខ្លាំង តាំងពីផ្ទុះសង្គ្រាមនៅអ៊ុយក្រែន។ នៅថ្ងៃទី១កុម្ភៈ រដ្ឋមន្ត្រីក្រសួងការពាតិជាតិចិន បានស្នើទៅសមភាគីរុស្ស៊ី ដោយបង្ហាញចេតនាចង់ពង្រីកទំនាក់ទំនងយោធារបស់ប្រទេសទាំងពីរឲ្យកាន់តែខ្លាំងថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ