កូរ៉េខាងត្បូងប្រើគោលការណ៍តបតយ៉ាងខ្លាំងភ្លាមនឹងទង្វើបង្កហេតុរបស់សត្រូវខាងជើង
ក្នុងឱកាសចុះទៅត្រួតពិនិត្យកងនាវាជើងទឹក នាថ្ងៃសៅរ៍ទី១០កុម្ភៈ២០២៤ លោក យ៉ូន សុកយោល ប្រធានាធិបតីកូរ៉េខាងត្បូងបានអំពាវនាវឱ្យក្រុមយោធាបញ្ចេញប្រតិកម្មខ្លាំងក្លា ទ្រង់ទ្រាយធំ និងដោយគ្មានបង្អង់ តបនឹងរាល់គ្រប់ទង្វើបង្កហេតុរបស់សត្រូវខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
“ប្រសិនបើសត្រូវមកបង្ករឿង សូមអនុវត្តគោលការណ៍ +ធ្វើសកម្មភាពមុនចាំរបាយការណ៍តាមក្រោយ+ ហើយជាប្រតិកម្មតបតយ៉ាង មុត ខ្លាំងក្លា ក្នុងទ្រង់ទ្រាយធំ និងដោយគ្មានស្ទាក់ស្ទើរ ដើម្បីបំផ្លាញឆន្ទៈរបស់សត្រូវទាំងស្រុងតែម្តង”។ នេះជាសេចក្តីប្រកាសរបស់លោកប្រធានាធិបតីកូរ៉េខាងត្បូង យ៉ូន សុកយោល នៅចំពោះមុខក្រុមនាវិក នៃកងពលទ័ពជើងទឹក ឈរជើងនៅព្រំដែនជាមួយកូរ៉េខាងជើង។
ក្នុងថ្ងៃសៅរ៍ទី១០កុម្ភៈ ថ្ងៃបុណ្យចូលឆ្នាំថ្មីជាប្រពៃណីរបស់ពលរដ្ឋអាស៊ីជាច្រើន ដដែលនោះ លោកយ៉ូន សុកយោល ក៏បានចុះទៅត្រួតពិនិត្យប្រព័ន្ធបាញ់បង្ហោះពហុមីស៊ីល និងបានប្រកាសថាកូរ៉េខាងត្បូងត្រៀមជាស្រេចនឹងវាយបកវិញក្នុងករណីសត្រូវហ៊ានបង្កហេតុ។
នេះមិនមែនជាលើកទីមួយទេ ដែលប្រធានាធិបតីកូរ៉េខាងត្បូងប្រើសំដីធ្ងន់ៗយ៉ាងនេះ។ លោក យ៉ូន សុកយោល ធ្លាប់ចេញសេចក្តីថ្លែងការណ៍ដូចថ្ងៃសៅរ៍នេះ ពេលចុះទៅជួបកងពលនៅសមរភូមិជួរមុខកាលពីខែមុនម្តង និងកាលពីខែធ្នូម្តង។ ល្បីខាងមានជំហរជាអ្នកយុទ្ធនិយម និងតឹងតែងដាក់ព្យុងយ៉ាង លោក យ៉ូន សុកយោល បានចូលកាន់តំណែងជាប្រធានាធិបតីនៅឆ្នាំ២០២២ ដោយផ្តើមពង្រឹងពង្រីកកិច្ចសហប្រតិបត្តិការយោធាជាមួយសហរដ្ឋអាមេរិកនិងជប៉ុន ព្រមទាំងដឹកនាំធ្វើសមយុទ្ធកាន់តែធំឡើងៗ ដើម្បីបំបាក់ការគំរាមកំហែងរបស់កូរ៉េខាងជើង។
ចំណែកកូរ៉េខាងជើងដែលមានអាវុធនុយក្លេអ៊ែរវិញ ក៏កាន់តែឡើងចាង។ ថ្មីៗនេះ ព្យុងយ៉ាងបានប្រកាសចាត់ទុកកូរ៉េខាងត្បូង ជាសត្រូវដ៏ចម្បងរបស់ខ្លួន និងបានផ្តាច់រាល់គ្រប់បណ្តាញទាក់ទងសម្រាប់ផ្សះផ្សាបង្រួបបង្រួមកូរ៉េ ឬសម្រួលទំនាក់ទំនងអន្តរកូរ៉េ និងគំរាមបញ្ឆេះសង្គ្រាមតែម្តង បើសេអ៊ូលហ៊ានរំលោភដីតែមួយចំអាម។ នៅថ្ងៃសុក្រទី៩កុម្ភៈម្សិលម្ង៉ៃនេះទៀត ប្រមុខគីមជុងអ៊ុន បានប្រើពាក្យដដែល ថាកូរ៉េខាងត្បូងជាសត្រូវដ៏គ្រោះថ្នាក់និងដំបូងគេរបស់ខ្លួន ដែលព្យុងយ៉ាងមិនរារែកនឹងបញ្ចប់ឡើយ បើកូរ៉េខាងជើងរងការវាយប្រហារ។
ក្រៅអំពីពាក្យកំញើញដាក់គ្នាកាន់តែខ្លាំងឡើងៗ បងប្អូនបង្កើតជាគូសត្រូវកូរ៉េទាំងពីរ បានពង្រឹងកម្លាំងការពារសន្តិសុខតាមព្រំដែនផង និងបានធ្វើសមយុទ្ធដោយបាញ់គ្រាប់ពិតតាមបណ្តោយព្រំដែនគ្នាទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ