អ៊ីរ៉ង់ រងការវាយប្រហារភេរវកម្មជាថ្មី ស្លាប់ឆ្មាំបដិវត្តន៍អ៊ីរ៉ង់ ១០ នាក់
ថ្ងៃព្រហស្បតិ៍ ទី៤មេសា កម្លាំងយោធាឆ្មាំបដិវត្តន៍អ៊ីរ៉ង់ យ៉ាងហោច ១០ នាក់ បានស្លាប់បាត់បង់ជីវិត នៅក្នុងការវាយប្រហារពីសំណាក់ក្រុមភេរវជនអ៊ីស្លាមនិកាយស៊ូនីត នៅប៉ែកអាគ្នេយ៍នៃផ្ទៃប្រទេស។ ចំណែកក្រុមភេរវជន ចំនួន ១៨ នាក់ ក៏ត្រូវស្លាប់ដែរ។ ថ្នាក់ដឹកនាំអ៊ីរ៉ង់ ចោទប្រកាន់សហរដ្ឋអាមេរិកនិងអ៊ីស្រាអែល ជាអ្នកនៅពីក្រោយខ្នង និងដែលចង់បង្កអស្ថិរភាពនៅលើទឹកដីអ៊ីរ៉ង។
ចុះផ្សាយនៅថ្ងៃ៖
ស្តាប់ - ០២:០១
ក្រុមប្រដាប់អាវុធ មានគ្នីគ្នា យ៉ាងហោចជាង ២០ នាក់ បានបើកការវាយប្រហារសំដៅលើ អង្គភាព ២ កន្លែង របស់ ឆ្មាំបដិវត្តន៍អ៊ីរ៉ង់ ក្នុងសប្តាហ៍នេះ។ អង្គភាព១ ខាងទ័ពជើងទឹក ហើយ ១ទៀត ជាអធិការដ្ឋានប៉ុស្តិ៍ប៉ូលិស។ នេះបើតាមអ្នកទទួលខុសត្រូវអ៊ីរ៉ង់ ដែលត្រូវស្រង់ព័ត៌មានដោយ លោក Siavosh Ghazi អ្នកឆ្លើយឆ្លងវិទ្យុបារាំង RFI ប្រចាំរដ្ឋធានីតេហេរ៉ង់។
ថ្នាក់ដឹកនាំរដ្ឋបាលក្រុងតេហេរ៉ង់ បានចោទប្រកាន់ក្រុមផ្តាច់ខ្លួននិយម ពួកហ្សាអ៊ីស្ហ អាល-អាដល (Jaïsh al-Adl ជាភាសាអ៊ីស្លាម មានន័យថា កងទាហានដើម្បីយុត្តិធម៌) ជាអ្នកបង្កការវាយប្រហារភេរវកម្ម ជាបន្តបន្ទាប់ ទាំងនៅពេលនេះ និងទាំងកាលពីខែធ្នូកន្លងទៅ។ កាលណោះ កងឆ្មាំបដិវត្តន៍អ៊ីរ៉ង់ ជាង១០នាក់ បានបាត់បង់ជីវិត ក្នុងខេត្តស៊ីស្តង់-បាលូស៊ីស្ថាន។ ខេត្តស៊ីស្តង់បាលូស៊ីស្ថាន ជាខេត្តក្រីក្រមួយ និងជាទីដែលមានក្រុមសហគមន៍អ៊ីស្លាមនិកាយស៊ូនីតរស់នៅយ៉ាងច្រើន ប្រមាណ ១០ លាននាក់ ហើយពួកគេក៏មានរស់នៅរាយប៉ាយ តាមព្រំដែនអ៊ីរ៉ង់ជាមួយប៉ាគីស្ថាន និងព្រំដែនជាមួយអាហ្វហ្កានីស្ថាន។
ពួកស៊ូនីតទាំងនោះ ច្រើនតែមិនសូវត្រូវគ្នានឹងរដ្ឋអំណាចអ៊ីរ៉ង់ប្រកាន់សាសនាអ៊ីស្លាមនិកាយស៊ីអ៊ីត។ ថ្នាក់ដឹកនាំរដ្ឋអំណាចអ៊ីរ៉ង់ បានចាត់ទុកថា ពួកចលនាប្រដាប់អាវុធហ្សាអ៊ីស្ហ អាល-អាដល ជាក្រុមពួកភេរវជន ដែលបានបង្កើតឡើងតាំងពីឆ្នាំ២០១២ និងបានចូលដៃជាមួយក្រុមរដ្ឋអ៊ីស្លាមជីហាត។ អ៊ីរ៉ង់ធ្លាប់បានវាយប្រហារមូលដ្ឋានពួកនេះ ២ កន្លែង ក្នុងទឹកដីប៉ាគីស្ថាន ហើយនាំឲ្យដៃជើងគ្នីគ្នារបស់គេ វាយប្រហារបកមកវិញ នៅលើទឹកដីអ៊ីរ៉ង់ ព្រមទាំងបង្កទំនាស់រវាងប្រទេសទាំង២ទៀតផង។
ពេលកន្លងទៅ អ៊ីរ៉ង់ធ្លាប់បានស្តីបន្ទោសប៉ាគីស្ថាន ថាអសកម្ម ឬមិនអើពើជួយបង្ក្រាបក្រុមប្រដាប់អាវុធភេរវនិយមពួកហ្សាអ៊ីស្ហ អាល-អាដល ដែលជ្រកកោនក្នុងទឹកដីរបស់ប៉ាគីស្ថាន។ មិនតែប៉ុណ្ណោះ រដ្ឋបាលក្រុងតេហេរ៉ង់ ក៏ថែមទាំងចោទប្រកាន់ថា ក្រុមកម្លាំងចារកម្មអាមេរិកនិងអ៊ីស្រាអែល ប្រើប្រាស់ពួកគេទាំងនោះ ដើម្បីបង្កអស្ថិរភាព នៅអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ