កាសែតអង់គ្លេស៖ រដ្ឋាភិបាលឥណ្ឌាបញ្ជាឲ្យតាមសម្លាប់ក្រុមអ្នកប្រឆាំងនៅបរទេស
នៅលើទឹកដីប៉ាគីស្ថាន ក្រុមសកម្មជនប្រឆាំងជាង ២០នាក់ បានស្លាប់បាត់បង់ជីវិត ព្រោះតែរដ្ឋាភិបាលឥណ្ឌាចេញបញ្ជាឲ្យ ភ្នាក់ងារស៊ើបការសម្ងាត់ឥណ្ឌា តាមសម្លាប់។ ពួកគេទាំងនោះ សុទ្ធសឹងតែជាក្រុមអ្នកផ្តាច់ខ្លួនទាមទារឯករាជ្យនិងជាសកម្មជនប្រឆាំងរដ្ឋាភិបាលឥណ្ឌា។ ការសម្លាប់មនុស្សនៅក្រៅប្រទេសឥណ្ឌា មិនមែនមានតែនៅទឹកដីប៉ាគីស្ថានទេ។ ដ្បិតថា អាជ្ញាធរអាមេរិកនិងកាណាដា ក៏បញ្ជាក់ថា ភ្នាក់ងារស៊ើបការសម្ងាត់ឥណ្ឌា សម្លាប់មនុស្សនៅលើទឹកដីបច្ឆិមលោកដែរ។ ផ្ទុយទៅវិញ ក្រសួងការបរទេសឥណ្ឌាបានទាត់ចោលព័ត៌មាននេះទាំងស្រុង។
ចុះផ្សាយនៅថ្ងៃ៖
ស្តាប់ - ០២:៤៥
ឥណ្ឌារៀនយកគំរូតាមក្រុមម៉ូស្សាដចារកិច្ចអ៊ីស្រាអែល (សម្ព័ន្ធមិត្តរបស់ ស៊ីអាយអេ អាមេរិក) និងក្រុមកាហ្សេបេចារកិច្ចរុស្ស៊ី ដែលមានជំនាញល្បីល្បាញខ្លាំង ក្នុងការរៀបចំគម្រោងផែនការកម្ចាត់កម្ទេចអ្នកប្រឆាំងនឹងខ្លួន ឬសម្លាប់គូសត្រូវនៅទឹកដីបរទេស។ គិតចាប់ពីឆ្នាំ២០២០មក ក្រុមប្រឆាំងឥណ្ឌា ជាសកម្មជនចលនាផ្តាច់ខ្លួនទាមទារឯករាជ្យ ក្រុមសិក្ហ យ៉ាងហោច ជាង ២០ នាក់ ត្រូវរដ្ឋាភិបាលឥណ្ឌា បញ្ជាឲ្យសម្លាប់ នៅក្នុងទឹកដីប៉ាគីស្ថាន។ នេះបើតាមការបញ្ជាក់នៅក្នុងរបាយការណ៍ព័ត៌មានស៊ើបអង្កេតរបស់ក្រុមអ្នកកាសែតអង់គ្លេស The Guardian ដែលបានចុះក្នុងសប្តាហ៍នេះ។ កាសែតអង់គ្លេសបានសម្ភាសប្រភពព័ត៌មាន ពីបណ្តាចារបុរសនិងមន្ត្រីជាច្រើន ដែលធ្វើការឲ្យ ភ្នាក់ងារស៊ើបការសម្ងាត់ ទាំងនៅប្រទេសឥណ្ឌាផង និងនៅ ប៉ាគីស្ថាន ផង។
ក្នុងក្របខណ្ឌមិនបញ្ចេញឈ្មោះ ចារបុរសម្នាក់ បានប្រាប់កាសែតអង់គ្លេស The Guardian ថា ភ្នាក់ងារស៊ើបការសម្ងាត់ឥណ្ឌា RAW ឋិតនៅក្រោមការបញ្ជាដោយផ្ទាល់ពីនាយករដ្ឋមន្ត្រីឥណ្ឌា ហើយក្រុមស៊ើបការសម្ងាត់មិនធ្វើសកម្មភាពអ្វីមួយទេ បើគ្មានបញ្ជាពីប្រមុខរដ្ឋាភិបាលទេនោះ។
សហរដ្ឋអាមេរិកនិងកាណាដា ក៏អះអាងបញ្ជាក់អំពីទង្វើឧក្រិដ្ឋរបស់ឥណ្ឌានៅទឹកដីបស្ចិមប្រទេសដែរ។ ក្នុងខែកញ្ញា ឆ្នាំ២០២៣ នាយករដ្ឋមន្ត្រីកាណាដា លោក ហ្សូសស្តាំង ទ្រុយដូ បានថ្លែងប្រាប់សភាថា ក្រុមភ្នាក់ងារស៊ើបការសម្ងាត់ឥណ្ឌា ជាអ្នករៀបចំធ្វើឃាតសកម្មជនប្រឆាំងឥណ្ឌាម្នាក់ នៅជិតក្រុង Vancouver ក្នុងទឹកដីកាណាដា។ បន្តិចក្រោយមក នៅសហរដ្ឋអាមេរិកវិញ ក្រសួងយុត្តិធម៌អាមេរិក ក៏បានប្រកាសបញ្ជាក់ដែរថា ក្រុមភ្នាក់ងារស៊ើបការសម្ងាត់ឥណ្ឌា បានបាញ់សម្លាប់សកម្មជនប្រឆាំងឥណ្ឌាម្នាក់ នៅក្រុងញូវយ៉ក។ ក្នុងសប្តាហ៍នេះទៀត កាណាដាបានចោទប្រកាន់ឥណ្ឌាថាបានលូកដៃចូលក្នុងដំណើរការបោះឆ្នោតកាណាដា ដោយធ្វើយ៉ាងណាកុំឲ្យបេក្ខជនដែលមានជំនោរគាំទ្រសកម្មជនប្រឆាំងឥណ្ឌា កុំឲ្យទទួលបានសំឡេងឆ្នោត។
ទោះបីជាយ៉ាងនេះក្តី រដ្ឋមន្ត្រីក្រសួងការបរទេសឥណ្ឌា លោក Subrahmanyam Jaishankar បានបដិសេធរបាយការណ៍ស៊ើបអង្កេត និងបានការពាររដ្ឋាភិបាលក្រុងញូវដេលី ថា«ការសម្លាប់មនុស្សនៅបរទេស ពុំមែនជាគោលនយោបាយការបរទេសរបស់រដ្ឋាភិបាលឥណ្ឌាទេ»។
បើតាមប្រភពព័ត៌មានស៊ើបអង្កេតរបស់អង់គ្លេស, ឥណ្ឌាបានផ្តើមរៀបចំគម្រោងសម្លាប់ក្រុមប្រឆាំងនឹងរដ្ឋអំណាចខ្លួននៅបរទេស ចាប់ពីឆ្នាំ២០១៨ ពេលដែល អារ៉ាប៊ីសាអូឌីត បានបញ្ជាសម្លាប់អ្នកកាសែតប្រឆាំង លោក ហ្សាម៉ាល់ ខាស្ហូហ្ស៊ី នៅប្រទេសគួកគី។ ព្រឹត្តិការណ៍នេះ នាំឲ្យថ្នាក់ដឹកនាំឥណ្ឌាគិតគូររៀបចំគម្រោងផែនការតាមកម្ទេចពួកក្រុមប្រឆាំងនឹងខ្លួន ដែលសម្ងំនៅបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ