ឥណ្ឌា បើកជំនួបកំពូលG២០ ស្តីពីទេសចរណ៍ នៅតំបន់ជាប់ជម្លោះ កាស្មៀរ
ជំនួបហ្សេ២០ ស្តីពីទេសចរណ៍ ត្រូវចាប់បើកនៅថ្ងៃចន្ទទី ២២ឧសភា សម្រាប់រយៈពេលបីថ្ងៃ នៅតំបន់កាស្មៀរ ប្រទេសឥណ្ឌា ដែលជាប់ជម្លោះជាមួយប្រទេសជិតខាង។ ក្រៅអំពីពាក្យតវ៉ា និងថ្កោលទោសយ៉ាងខ្លាំង ពីសំណាក់ភាគីជាប់ជម្លោះព្រំដែនដោយផ្ទាល់។ ចិន បានប្រកាសមិនចូលរួមប្រជុំនេះទេ។
ចុះផ្សាយនៅថ្ងៃ៖
ស្តាប់ - ០២:១៤
ជំនួបប្រជុំនៅតំបន់មាត់បឹងDal នៃដែនដីSrinagar របស់តំបន់កាស្មៀរឥណ្ឌាស្ថិតក្រោមការការពារសន្តិសុខខ្លាំងណាស់ ព្រោះធ្លាប់ជាតំបន់ស្វ័យត ដែលស្គាល់ភាពតានតឹងហិង្សាអស់ជាងបីទសវត្សរ៍ មកហើយ និងទើបដាក់ឱ្យស្ថិតនៅក្រោមអំណាចផ្ទាល់របស់រដ្ឋាភិបាលឥណ្ឌា។
ក្នុងនាមជាប្រធានហ្សេ២០ ប្រចាំឆ្នាំ២០២៣ ឥណ្ឌាចង់ផ្តល់សន្ទុះទេសចរណ៍ដល់តំបន់កាស្មៀរ ដែលទាក់ទាញមនុស្សទស្សនាជាងមួយលាននាក់កាលពីឆ្នាំទៅ និងមានគម្រោងរៀបចំប្រជុំជាង១០០ទៀត នៅតាមតំបន់ផ្សេងៗរបស់ប្រទេស។ ប៉ុន្តែជំនួបប្រជុំទេសចរណ៍ ត្រូវរងការតវ៉ា និងថ្កោលទោស យ៉ាងខ្លាំងពីសំណាក់ប្រទេសជិតខាងដូចយ៉ាង ប៉ាគីស្ថាន និងចិន ដែលប្រកាសមិនមកចូលរួមប្រជុំទេ។
ចិន បានព្រមានជាស្រេចមិនបង្ហាញវត្តមាន ក្នុងគ្រប់ព្រឹត្តិការណ៍រៀបចំនៅតំបន់ជាប់ជម្លោះ មិនថានៅ Ladakh ឬ Arunachal Pradesh ទេ ហើយក៏មិនទៅប្រជុំនៅSrinagar ដែរ។ មានព្រំដែនរួមគ្នាដ៏វែង ចិននិងឥណ្ឌាកំពុងជាប់គាំងក្នុងជម្លោះយោធាតាមបណ្តោយព្រំដែននៅតំបន់Ladakh។ ប៉េកាំងទាមទាររដ្ឋArunachal Pradesh ថាជាផ្នែកមួយនៃតំបន់ទីបេ និងចាត់ទុកតំបន់កាស្មៀរ ជាដែនដីជាប់ជម្លោះ។
ចំណែកប៉ាគីស្ថាន ដែលមិនមែនជាសមាជិកហ្សេ២០ ប៉ុន្តែគ្រប់គ្រងតំបន់កាស្មៀរមួយភាគ បានប្រកាសថ្កោលទោសឥណ្ឌាថាព្រហើនដាក់ពិភពលោក។ ការរៀបចំជំនួបនៅកាស្មៀរនេះ ជាការរំលោភសិទ្ធិអន្តរជាតិ រំលោភសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ និងរំលោភកិច្ចព្រមព្រៀងទ្វេភាគី។ តាំងពីបានទទួលបានឯករាជ្យនៅឆ្នាំ១៩៤៧មក ឥណ្ឌានិងប៉ាគីស្ថានបន្តទាមទារគ្រប់គ្រងបូរណភាពដែនដីកាស្មៀរទាំងស្រុង។ តំបន់កាស្មៀរដែលមានពលរដ្ឋភាគច្រើនកាន់សាសនាឥស្លាមនេះ ក៏ជាដើមហេតុនាំឱ្យប្រទេសជិតខាងទាំងពីរផ្ទុះសង្គ្រាមនឹងគ្នាដល់ទៅពីរលើកទៀត។
កាលពីសប្តាហ៍មុន ប្រេសិតពិសេសអង្គការសហប្រជាជាតិជុំវិញបញ្ហាជនជាតិភាគតិច យល់ថាឥណ្ឌាយកជំនួបហ្សេ២០ជាឧបករណ៍សម្រាប់ឱ្យអន្តរជាតិទទួលស្គាល់ស្ថានភាពដែលគេថ្កោលទោស។ ជាពាក្យចោទប្រកាន់ដែលឥណ្ឌាច្រានចោលទាំងស្រុង។
បើតាមសារព័ត៌មាន តួកគី អារ៉ាប៊ីសាអូឌីត និងឥណ្ឌូណេស៊ី ក៏មិនមកចូលរួមក្នុងជំនួបប្រជុំនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ