ចិនធ្វើសមយុទ្ធក្នុងសមុទ្ទចិនខាងត្បូងទន្ទឹមនឹងសមយុទ្ធហ្វីលីពីនជាមួយសម្ព័ន្ធមិត្ត
ចិនមិនបានបញ្ចេញប្រតិកម្មអ្វីទាំងអស់ នៅពេលឃើញសេចក្តីថ្លែងការណ៍រួម របស់ហ្វីលីពីន សហរដ្ឋអាមេរិក ជប៉ុននិងអូស្ត្រាលី ជូនដំណឹងនៅថ្ងៃសៅរ៍៦មេសាម្សិលមិញ អំពីការរៀបចំធ្វើសមយុទ្ធបួនប្រទេស នៅថ្ងៃ៧មេសា។ ប៉ុន្តែចូលដល់ថ្ងៃអាទិត្យភ្លាម ចិនបានប្រកាសបើកធ្វើសមយុទ្ធដែរ នៅក្នុងសមុទ្ទចិនខាងត្បូង ដែលជាប់ជម្លោះជាមួយប្រទេសជិតខាងនិង ធ្លាប់មានការប៉ះទង្គិចជាពិសេសជាមួយហ្វីលីពីន ដោយដាក់រហ័សនាមថា “ការត្បាតប្រយុទ្ធ”។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
កងពលភូមិភាគខាងត្បូងនៃកងកម្លាំងយោធាប្រជាមានិតចិន រៀបចំធ្វើសមយុទ្ធ ដោយចេញត្បាតត្រៀមប្រយុទ្ធតាមផ្លូវទឹក និងផ្លូវអាកាសរួមគ្នា ក្នុងសមុទ្ទចិនខាងត្បូង។ នេះបើតាមសេចក្តីការណ៍របស់យោធាចិន ដោយមិនបញ្ជាក់លម្អិតទេថាតើសមយុទ្ធនោះមានទំហំប៉ុណ្ណា និងប្រព្រឹត្តទៅនៅត្រង់ចំណុចណាឱ្យប្រាកដឡើយ។ ប៉ុន្តែអាជ្ញាធរយោធាចិន បានបន្ថែមថា គ្រប់សកម្មភាពយោធាដែលរំខានស្ថានភាពនៅសមុទ្ទចិនខាងត្បូង និងដែលបង្កបង្កើតឱ្យមានតំបន់ក្តៅហិង្សា ត្រូវស្ថិតនៅក្រោមការឃុំគ្រងបានទាំងអស់។ ពាក្យថា“សកម្មភាពយោធារំខាន”នោះ គឺទំនងចង់សំដៅលើសមយុទ្ធរបស់ហ្វីលីពីនជាមួយសម្ព័ន្ធមិត្ត ដែលកំពុងធ្វើសមយុទ្ធក្នុងផ្ទៃសមុទ្ទនេះដែរ។
នៅថ្ងៃសៅរ៍ម្សិលមិញ ហ្វីលីពីន សហរដ្ឋអាមេរិក ជប៉ុននិងអូស្ត្រាលី បានប្រកាសរៀបចំធ្វើលំហាត់សឹករួមគ្នានៅថ្ងៃអាទិត្យទី៧មេសា ក្នុងតំបន់សេដ្ឋកិច្ចផ្តាច់មុខរបស់ហ្វីលីពីន ពោលគឺក្នុងសមុទ្ទចិនខាងត្បូង ដែលជាប់ជម្លោះជាមួយចិន។
បើតាមសេចក្តីថ្លែងការណ៍រួម សមយុទ្ធជើងទឹកនិងជើងអាកាសរួមបួនប្រទេស ជាសារបង្ហាញឱ្យឃើញអំពីឆន្ទៈរួមរបស់សម្ព័ន្ធមិត្តក្នុងការពង្រឹងកិច្ចសហប្រតិបត្តិការតំបន់និងអន្តរជាតិ ដើម្បីធានាសេរីភាពនិងការបើកចំហឱ្យតំបន់ឥណ្ឌូប៉ាស៊ីហ្វិក។ តែនេះជាលើកទីមួយហើយដែលហ្វីលីពីនបានចូលរួមធ្វើសមយុទ្ធក្នុងទម្រង់យ៉ាងដូច្នេះ។ ត្រូវការដំឡើងសមត្ថភាពការពារខ្លួន ដោយខ្លួនឯងផង និងជាក្រុមផង ហ្វីលីពីនជាប្រទេសពាក់ព័ន្ធដោយផ្ទាល់ក្នុងជម្លោះនៅសមុទ្ទចិនខាងត្បូង និងកំពុងប្រឈមយ៉ាងតានតឹងបំផុតមិនធ្លាប់មាននារយៈពេលប៉ុន្មានខែចុងក្រោយមកនេះជាមួយចិន តាមរយៈឧប្បត្តិហេតុផ្សេងៗ ដូចជាការប៉ះទង្គិចរវាងនាវាឆ្មាំសមុទ្ទចិននិងនាវាយោធាហ្វីលីពីន ឬការដេញបាញ់នាវានាយោធាហ្វីលីពីន ដោយប្រើកាណុងទឹក នៅតំបន់កូនកោះថ្មប៉ប្រះទឹកSecond Thomas ។ល។
ហេតុដូច្នេះហើយបានជាហ្វីលីពីនចង់ពង្រឹងកិច្ចសហប្រតិបត្តិការយោធាជាមួយសម្ព័ន្ធមិត្តជាពិសេសជាមួយសហរដ្ឋអាមេរិក។ បន្ទាប់ពីសមយុទ្ធថ្ងៃនេះ ប្រធានាធិបតីហ្វីលីពីន នឹងចូលរួមក្នុងជំនួបកំពូលត្រីភាគី រវាងប្រធានាធិបតីអាមេរិក នាយករដ្ឋមន្ត្រីជប៉ុន នៅទីក្រុងវ៉ាស៊ីនតោន ថ្ងៃទី១១មេសាសប្តាហ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ