អ៊ីរ៉ង់ថាយោធាខ្លួនបាញ់យន្តហោះអ៊ុយក្រែនធ្លាក់ដោយសារកំហុសបច្ចេកទេសនៃប្រព័ន្ធរ៉ាដា
ប្រទេសអ៊ីរ៉ង់ បានចេញមុខទទួលស្គាល់កាលពីថ្ងៃទី១១ កក្កដាថា កំហុសបច្ចេកទេសក្នុងការតម្រង់ប្រព័ន្ធរ៉ាដារបស់មនុស្ស បានបណ្តាលឲ្យយោធាអ៊ីរ៉ង់ភាន់ច្រឡំ និងបានបាញ់យន្តហោះប៊ូអ៊ីង៧៣៧ របស់អ៊ុយក្រែនឲ្យធ្លាក់កាលពីខែមករា ដើមឆ្នាំ២០២០នេះ។
ចុះផ្សាយនៅថ្ងៃ៖
ស្តាប់ - ០១:៥២
តាមរយៈរបាយការណ៍មួយចេញផ្សាយកាលពីយប់ថ្ងៃសៅរ៍ ទី១១ កក្កដា អង្គភាពអាកាសចរណ៍ស៊ីវិលអ៊ីរ៉ង់ (CAO) បានប្រកាសប្រាប់ឲ្យដឹងថា យោធាអ៊ីរ៉ង់ បានបាញ់យន្តហោះអ៊ុយក្រែនឲ្យធ្លាក់ ដោយសារកំហុសមនុស្សដែលតម្រង់រ៉ាដាខុសចំនួន ១០៧ដឺក្រេនៅក្នុងប្រព័ន្ធបច្ចេកទេស។
អង្គភាពអាកាសចរណ៍ស៊ីវិលអ៊ីរ៉ង់ បានលើកឡើងទៀតថា ទោះបីជាប្រព័ន្ធរ៉ាដាបានបញ្ជូនព័ត៌មាននៅលើគន្លងរបស់យន្តហោះមិនត្រឹមត្រូវក៏ដោយ ក៏ប្រតិបត្តិករគួរតែអាចកំណត់ថានោះគឺជាយន្តហោះដឹកអ្នកដំណើរដែរ។ ក៏ប៉ុន្តែ ដោយសារតែការភាន់ច្រឡំ នៅទីបំផុតទៅ យោធាអ៊ីរ៉ង់ ក៏បានបាញ់យន្តហោះរបស់អ៊ុយក្រែនដោយអចេតនា ព្រោះតែកំណត់អត្តសញ្ញាណខុស។
ជាមួយគ្នានេះ របាយការណ៍ខាងលើក៏បានកត់សម្គាល់ដែរថា គ្រាប់មីស៊ីលដំបូង ដែលបាញ់ទៅលើយន្តហោះអ៊ុយក្រែន ត្រូវបានបាញ់ដោយអង្គភាពការពារជាតិអ៊ីរ៉ង់ ដោយមិនបានទទួលការឆ្លើយតបណាមួយពីមជ្ឈមណ្ឌលសម្របសម្រួលឡើយ។ ចំណែកឯគ្រាប់មីស៊ីលទី២ ដែលជាគ្រាប់ចុងក្រោយវិញ ត្រូវបានគេបាញ់ចេញក្នុងរយៈពេល៣០ វិនាទីក្រោយ។
គួររំឭកជូនថា យន្តហោះប៊ូអ៊ីងអ៊ុយក្រែន ជើងហោះហើរលេខ ៧៥២ ជាយន្តហោះដឹកអ្នកដំណើររបស់ក្រុមហ៊ុនអាកាសចរណ៍អន្តរជាតិអ៊ុយក្រែន។ យន្តហោះនេះ ត្រូវបានបាញ់ឲ្យធ្លាក់បន្ទាប់ពីហោះចេញពីអាកាសយានដ្ឋានអន្តរជាតិក្រុងតេហេរ៉ង់ប្រទេសអ៊ីរ៉ង់ បានបន្តិច កាលពីថ្ងៃទី ៨ មករា ឆ្នាំ២០២០នេះ ជាពេលដែលអាមេរិកនិងអ៊ីរ៉ង់កំពុងជួបភាពតានតឹងនឹងគ្នាខ្លាំង។
បីថ្ងៃក្រោយគ្រោះថ្នាក់ធ្លាក់យន្តហោះដែលបានផ្តាច់ជីវិតអ្នកដំណើរទាំងអស់ ១៧៦ នាក់ ប្រទេសអ៊ីរ៉ង់បានចេញមុខប្រកាសសុំទោស និងបានសារភាពថាយោធារបស់ខ្លួន ជាអ្នកបាញ់យន្តហោះប៊ូអ៊ីង ៧៣៧ របស់អ៊ុយក្រែនឲ្យធ្លាក់ តែជាវាជាការបាញ់ដោយអចេតនានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ