ន័រវែសចង់ធ្វើវិនិយោគបច្ចេកវិទ្យាចាប់និងខ្ទប់ឧស្ម័នCO2 ដើម្បីកាត់បន្ថយឧស្ម័នផ្ទះកញ្ចក់
រដ្ឋាភិបាលន័រវែសបានគូសបញ្ជាក់នៅថ្ងៃចន្ទទី ២១កញ្ញា ២០២០ ថាចង់ធ្វើវិនិយោគ ក្នុងទំហំ ១៦០០លានអឺរ៉ូ បច្ចេកវិទ្យាចាប់និងខ្ទប់ទុកឧស្ម័នជាតិពុលកាបូនិក ដើម្បីកាត់បន្ថយបរិមាណឧស្ម័នផ្ទះកញ្ចក់កុំឱ្យមកបំពុលបរិយាកាស។ ជាបច្ចេកវិទ្យាពោរពេញដោយក្តីសង្ឃឹមសម្រាប់អាកាសធាតុ ប៉ុន្តែជាបច្ចេកវិទ្យាដែលចំណាយថ្លៃបំផុត។
ចុះផ្សាយនៅថ្ងៃ៖
ស្តាប់ - ០២:២៤
Longship ជាគម្រោងអាកាសធាតុដ៏ធំបំផុតមិនធ្លាប់មានក្នុងប្រវត្តិឧស្សាហកម្មរបស់ន័រវែសឡើយ ! នេះបើតាមប្រសាសន៍របស់រដ្ឋមន្ត្រីក្រសួងប្រេងកាតនិងថាមពល ក្នុងឱកាសបង្ហាញសៀវភៅសស្តីពីគម្រោងវិនិយោគបច្ចេកវិទ្យាទំនើបចាប់និងខ្ទប់ទុកឧស្ម័នកាបូនិក (CCS) កុំឱ្យសាយភាយទៅបំពុលបរិយាកាស។
នៅក្នុងសៀវភៅស ន័រវែសដែលបានប្តេជ្ញាកាត់បន្ថយឧស្ម័នផ្ទះកញ្ចក់ឱ្យ៥០ទៅ ៥៥% នៅឆ្នាំ២០៣០ ចង់ផ្តល់ហិរញ្ញវត្ថុ ដោយផ្តោតអាទិភាពដំបូងទៅលើគម្រោងវិនិយោគបច្ចេកវិទ្យាចាប់និងខ្ទប់ឧស្ម័នកាបូនិក របស់ក្រុមហ៊ុនរោងចក្រស៊ីម៉ង់ Brevik នៅភាគខាងជើងប្រទេស ព្រោះឧស្សាហកម្មស៊ីម៉ង់នេះបញ្ចេញឧស្ម័នកាបូនិកបំពុលបរិយាកាសដល់ទៅ៧%នៃឧស្ម័នពុលលើភពផែនដី។ ជាមួយនឹងបច្ចេកវិទ្យាថ្មី ចាប់ពីឆ្នាំ២០២៤ទៅ រោងចក្រស៊ីម៉ង់ Norcem អាចនឹងចាប់ឧស្ម័នកាបូនិក បានប្រមាណ៤០០ពាន់តោន ពោលគឺជិតពាក់កណ្តាលនៃបរិមាណឧស្ម័នកាបូនិកដែលរោងចក្របានបញ្ចេញកាលពីឆ្នាំទៅ។
រដ្ឋាភិបាលន័រវែសក៏ចង់ផ្តល់វិភាគទានលើគម្រោងចាប់និងខ្ទប់ឧស្ម័នកាបូនិក របស់រោងចក្រសំរាម របស់ក្រុមហ៊ុនFortum នៅអូស្លូដែរ តែត្រូវមានប្រភពជំនួយហិរញ្ញវត្ថុផ្សេងទៀត ជាឧទាហរណ៍ជំនួយរបស់សហភាពអឺរ៉ុប។ ដើម្បីឱ្យគម្រោងLongship អាចសម្រេចជោគជ័យបាននៅថ្ងៃអនាគត ត្រូវតែប្រទេសផ្សេងទៀតចាប់ប្រើបច្ចេកវិទ្យានេះដែរ។ នេះជាមូលហេតុនៃការដាក់លក្ខខណ្ឌស្វែងរកជំនួយវិនិយោគផ្សេងទៀត។ នេះបើតាមការអះអាងរបស់លោកស្រីនាយករដ្ឋមន្ត្រី។
ជាចុងក្រោយ ន័រវែសមានគម្រោងចង់នាំហិរញ្ញវត្ថុវិនិយោគគម្រោងកាត់បន្ថយឧស្ម័នផ្ទះកញ្ចក់ Northern Lights។ ជាគម្រោង របស់ក្រុមហ៊ុនយក្សប្រេងឥន្ធនៈបីបញ្ចូលគ្នា គឺក្រុមហ៊ុនន័រវែស Equinor ក្រុមហ៊ុនអង់គ្លេស-ហូឡង់ Shell និងក្រុមហ៊ុនបារាំង Total ដែលចង់ដឹកជញ្ជូនឧស្ម័នកាបូនិករាវ ទៅកាន់អាងស្តុកមួយ រួចបង្ហូរតាមទុយយោទៅចាក់ចោលក្នុងបាតសមុទ្ទ។
សំណើទាំងបីនេះ ត្រូវបញ្ជូនទៅសភា។ តែដោយរដ្ឋាភិបាលគ្មានសំឡេងភាគច្រើនដាច់ខាតនៅក្នុងសភា គម្រោងនេះអាចនឹងមានការប្រែប្រួល។
គម្រោងអាកាសធាតុប្រកបដោយមហិច្ឆតានេះ ត្រូវបានបង្ហើបឡើងចំថ្ងៃដែលសកម្មជនExtinction Rebellion ក្រុមប្រឆាំងនឹងនយោបាយប្រេងកាតន័រវែស កំពុងបញ្ចេញសកម្មភាពទាមទារឱ្យរដ្ឋាភិបាលបញ្ចប់ការធ្វើផលិតកម្មប្រេង រហូតមានការចាប់ខ្លួនមនុស្ស៣២នាក់ផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ