បារាំងកំពុងផ្តល់ជំរកសុវត្ថិភាពដល់ទាហានស៊ីរី ដែលធ្លាប់ធ្វើទារុណកម្មលើបាតុករបះបោរនៅស៊ីរី?
បារាំងនឹងក្លាយជាដែនដីនិទណ្ឌភាព សម្រាប់ឧក្រិដ្ឋជនស៊ីរី ដែលបានចូលរួមធ្វើទារុណកម្មទៅលើសកម្មជនប្រឆាំងស៊ីរី ? នេះជាក្តីបារម្ភរបស់ក្រុមអង្គការការពារសិទ្ធិមនុស្ស នៅប្រទេសបារាំង។ នៅក្នុងលិខិតចំហរផ្ញើទៅកាន់ប្រធានាធិបតីបារាំង កាលពីថ្ងៃសុក្រទី ៣ធ្នូ អង្គការការពារសិទ្ធិមនុស្ស ចំនួន១០ រួមជាមួយ អ្នកច្បាប់ជាច្រើននាក់បានអំពាវនាវសុំឲ្យរដ្ឋាភិបាលធ្វើកំណែទម្រង់ច្បាប់ ដើម្បី បើកផ្លូវឲ្យតុលាការបារាំង បើកសវនាការជំនុំជម្រះ ទាហានស៊ីរីដែលបានប្រព្រឹត្តឧក្រិដ្ឋកម្មប្រឆាំងមនុស្សជាតិ នៅស៊ីរី ប៉ុន្តែ ដែលកំពុងរត់ភៀសខ្លួន មកសុំសិទ្ធិជ្រកកោននៅប្រទេសបារាំង។
ចុះផ្សាយនៅថ្ងៃ៖
អង្គការការពារសិទ្ធិមនុស្ស ចំនួន ១០ ដែលនៅក្នុងនោះមានអង្គការAmnesty International អង្គការសម្ព័ន្ធសិទ្ធិមនុស្ស អង្គការអ្នកកាសែតគ្មានព្រំដែន និងសហជីពចៅក្រម បារាំង បានរួមគ្នាសរសេរលិខិតចំហរ ដែលនៅក្នុងនោះ គេបានទាមទារឲ្យប្រធានាធិបតីបារាំងលោកអេម៉ានុយអែល ម៉ាក្រុង ធ្វើកំណែទម្រង់ជាបន្ទាន់ ច្បាប់ស្តីពីសមត្ថកិច្ចសកល។
ផ្អែកលើគោលការណ៍សមត្ថកិច្ចសកល តុលាការមួយ អាចមានអំណាចយុត្តាធិការ បើកការជំនុំជម្រះ លើសំណុំរឿងធ្ងន់ធ្ងរ ទោះអង្គហេតុកើតឡើង នៅប្រទេសផ្សេង ហើយទោះដើមចោទ និងជនជាប់ចោទមិនមែនជាប្រជាជនខ្លួនក៏ដោយ។
សម្រាប់អង្គការការពារសិទ្ធិមនុស្ស និងសហជីពចៅក្រម គ្មានកំណែទម្រង់ច្បាប់ស្តីពីសមត្ថកិច្ចសកល បារាំងនឹងក្លាយជាដែនដីនិទណ្ឌភាព សម្រាប់ទាហានស៊ីរី ដែលធ្លាប់ចូលរួមធ្វើទារុណកម្មទៅលើបាតុករ ដែលបានងើបបះបោរប្រឆាំងរបបលោកប្រធានាធិបតីស៊ីរី កាលពី ១០ឆ្នាំមុន។
អង្គការការពារសិទ្ធិមនុស្សបានសំដែងក្តីបារម្ភ នៅបន្ទាប់ តុលាការវិនិច្ឆ័យដែលជាស្ថាប័នច្បាប់កំពូលរបស់បារាំង ទើបបានសម្រេចកាលពីថ្ងៃទី ២៤វិច្ឆិកាថា ចៅក្រមបារាំង គ្មានសមត្ថកិច្ចចោទប្រកាន់អតីតទាហានស៊ីរី ក្នុងបទផ្សំគំនិត ប្រព្រឹត្តឧក្រិដ្ឋកម្ម នៅទឹកដីស៊ីរី នោះទេ។ សូមរំលឹកថា អតីតទាហានស៊ីរីម្នាក់នៃរបបលោកប្រធានាធិបតីបាស្ហាអាល់អាសាដ ដែលបានមកសុំសិទ្ធិជ្រកកោននយោបាយនៅបារាំង ត្រូវបានអាជ្ញាធរបារាំង ចាប់ខ្លួននៅឆ្នាំ ២០២០ នៅក្នុងអំឡុងយុទ្ធនាការតាមប្រមាញ់ ចាប់ទាហានស៊ីរី ដែលធ្លាប់ចូលរួមក្នុងការបង្រ្កាប ធ្វើទារុណកម្ម និងសម្លាប់អ្នកទោសនៅស៊ីរី ប៉ុន្តែ ដែលកំពុងរត់គេចខ្លួន មកសុំសិទ្ធិជ្រកកោនជាជនភៀសខ្លួន នៅទឹកដីអឺរ៉ុប។
លិខិតចំហររបស់អង្គការការពារសិទ្ធិមនុស្សទៅកាន់ប្រធានាធិបតីបារាំង ធ្វើឡើងផងដែរ នៅមួយថ្ងៃក្រោយតុលាការអាល្លឺម៉ង់ បានប្រើគោលការណ៍សមត្ថកិច្ចសកល ដើម្បីជំនុំជម្រះ អតីតមន្រ្តីស៊ើបការណ៍សម្ងាត់ម្នាក់របស់របបស៊ីរី។ Anwar Raslan ដែលរត់ភៀសខ្លួនមកនៅអាល្លឺម៉ង់ ត្រូវបានប៉ូលិសអាល្លឺម៉ង់ចាប់ឃុំខ្លួននៅឆ្នាំ ២០២០ នៅក្រោយ អតីតអ្នកទោសស៊ីរីបានរកឃើញ បកអាក្រាត មុខ ទៅកាន់តុលាការអាល្លឺម៉ង់។ នៅដើមឆ្នាំ នេះ តុលាការអាល្លឺម៉ង់ បានចេញសាលក្រមកាត់ទោសសមាជិកម្នាក់នៃក្រុមស៊ើបការណ៍របស់របបផ្តាច់ការស៊ីរី ឲ្យជាប់ពន្ធនាគារ ៤ឆ្នាំកន្លះ ពីបទផ្សំគំនិតប្រព្រឹត្តឧក្រិដ្ឋកម្មប្រឆាំងមនុស្សជាតិ ទៅលើបាតុករ នៅទឹកដីស៊ីរី។
អាល្លឺម៉ង់បានក្លាយជាប្រទេសលើកដំបូងគេក្នុងលោកដែលកាត់ទោសអតីតទាហានស៊ីរី ក្នុងបទប្រព្រឹត្តឧក្រិដ្ឋកម្មក្នុងទឹកដីស៊ីរី ទៅតាមគោលការណ៍ សកល ដែលអនុញ្ញាតឲ្យតុលាការក្នុងស្រុកបើកការជំនុំជម្រះ សំណុំរឿងធ្ងន់ធ្ងរ ទោះអង្គហេតុកើតឡើងនៅប្រទេសផ្សេង ហើយទោះដើមចោទ និងជនជាប់ចោទមិនមែនជាប្រជាជនខ្លួន។ ចុះបារាំង វិញ ដែលជាប្រទេសការពារសិទ្ធិមនុស្ស និងប្រយុទ្ធប្រឆាំងនិទណ្ឌភាពនោះ បានធ្វើអ្វីខ្លះ? ការសម្រេចរបស់តុលាការវិនិច្ឆ័យ ក្នុងការបោះបង់ចោល ការចោទប្រកាន់ទៅលើអតីតទាហានស៊ីរី ក្នុងហេតុផល គ្មានសមត្ថកិច្ច គ្រប់គ្រាន់កំពុងធ្វើឲ្យប៉ះពាល់យ៉ាងខ្លាំងដល់មុខមាត់របស់ប្រទេសបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ