សង្គ្រាមអ៊ុយក្រែន៖ រុស្ស៊ីកាន់តែឯកោនិងរងការថ្កោលទោសខ្លាំងនៅលើឆាកអន្តរជាតិ
ប្រទេសរុស្ស៊ីហាក់កាន់តែឯកោខ្លាំងជាងពេលណាៗទាំងអស់ បន្ទាប់ពីក្រុមប្រឹក្សាសិទ្ធិមនុស្សអ.ស.ប បោះឆ្នោតជាប្រវត្តិសាស្ត្រនៅថ្ងៃសុក្រ ៤មីនា បើកផ្លូវឲ្យមានការស៊ើបអង្កេតលើទង្វើរំលោភបំពានដែលប្រព្រឹត្តដោយក្រុងមូស្គូនៅក្នុងសង្គ្រាមអ៊ុយក្រែន។ ក្នុងពេលដំណាលគ្នានេះ មន្ត្រីក្រុងកៀវ បានចោទប្រកាន់កងទ័ពរុស្ស៊ីពីបទរំលោភស្ត្រីអ៊ុយក្រែន និងបានអំពាវនាវផងដែរសុំឲ្យបង្កើតតុលាការពិសេសមួយដើម្បីដាក់ទណ្ឌកម្មរុស្ស៊ី។
ចុះផ្សាយនៅថ្ងៃ៖
ស្តាប់ - ០២:១១
សារទៅកាន់លោកពូទីន គឺវាច្បាស់ណាស់៖ អ្នកនៅឆ្ងាយដាច់ពីគេខ្លាំងមែនទែន ហើយពិភពលោកទាំងមូលប្រឆាំងនឹងអ្នក។ នេះគឺជាសម្តីរបស់តំណាងអចិន្ត្រៃយ៍រអ៊ុយក្រែនប្រចាំការិយាល័យអ.ស.ប ក្នុងក្រុងហ្សឺណែវអ្នកស្រី Yevheniia Filipenko បន្ទាប់ពីក្រុមប្រឹក្សាសិទ្ធិមនុស្សទទួលបានសំឡេងគាំទ្រយ៉ាងច្រើនលើសលុប។
មានប្រទេសចំនួន ៣២ក្នុងចំណោមសមាជិកទាំងអស់ ៤៧ប្រទេសរបស់ក្រុមប្រឹក្សាបានបោះឆ្នោតគាំទ្រឲ្យផ្តើមការស៊ើបអង្កេតកម្រិតខ្ពស់បំផុតតាមដែលអាចធ្វើទៅបាន ក្នុងគោលបំណងចាប់ជនល្មើសឲ្យមកទទួលខុសត្រូវនៅចំពោះមុខច្បាប់។
មានតែប្រទេសរុស្ស៊ីខ្លួនឯងនិងអេរីត្រេទេដែលបានបោះឆ្នោតប្រឆាំង ហើយមានប្រទេសចំនួន ១៣បានបោះឆ្នោតអនុប្បវាទ។ ប្រទេសទាំងនោះរួមមាន ចិន វ៉េណេស៊ុយអេឡា និងគុយបាជាដើម។ល។
គួរជ្រាបថា សម្រេចក្តីសម្រេចរបស់របស់ក្រុមប្រឹក្សាសិទ្ធិមនុស្សបានក្លាយជាកម្លាំងចលករមួយបន្ថែមរុញច្រានឲ្យរុស្ស៊ីកាន់តែឯកាខ្លាំងនៅលើឆាកអន្តរជាតិ។ កាលពីថ្ងៃពុធ ទី២ មីនា មហាសន្និបាតអសបបានបោះឆ្នោតដោយសំឡេងយ៉ាងច្រើនលើលលុបប្រឆាំងនឹងសង្គ្រាមរុស្ស៊ីនៅអ៊ុយក្រែន។
ចំណែកតុលាការព្រហ្មទណ្ឌអន្តរជាតិវិញបានចាប់ផ្តើមការស៊ើបអង្កេតរបស់ខ្លួនហើយលើឧក្រិដ្ឋកម្មសង្រ្គាមក្នុងប្រទេសអ៊ុយក្រែនដែលជាកន្លែងមានជនស៊ីវិលរាប់រយនាក់ត្រូវបានសម្លាប់ និងមនុស្សជាង ១លាន២សែននាក់បានភៀសខ្លួនចាប់ពីរុស្ស៊ីផ្តើមសង្គ្រាមមក។
កាលពីថ្ងៃសុក្រ ក្រុមប្រឹក្សាសិទ្ធិមនុស្សក្នុងទីក្រុងហ្សឺណែវប្រទេសស្វីសក៏បានសម្រេចថ្កោលទោសផងដែរក្នុងលក្ខខណ្ឌដ៏ខ្លាំងបំផុតនៃការរំលោភសិទ្ធិមនុស្ស និងការរំលោភបំពានផ្សេងៗ ព្រមទាំងការរំលោភច្បាប់មនុស្សធម៌អន្តរជាតិដែលបណ្តាលមកពីការឈ្លានពានរបស់រុស្ស៊ីទៅលើអ៊ុយក្រែន។
ក្នុងពេលជាមួយគ្នានេះ រដ្ឋមន្ត្រីការបរទេសអ៊ុយក្រែនលោក Dmytro Kuleba បានចោទប្រកាន់ទាហានរុស្ស៊ីថាបានរំលោភស្ត្រីអ៊ុយក្រែន និងបានអំពាវនាវឲ្យបង្កើតតុលាការ ពិសសេមួយដើម្បីដាក់ទណ្ឌកម្មចំពោះទង្វើឈ្លានពានរបស់រុស្ស៊ីមកលើអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ