ប្រធានសភាអាមេរិកទៅកៀវ ជាការបង្ហាញសាមគ្គីភាពអាមេរិកគ្មានប្រៀបចំពោះអ៊ុយក្រែន
ប្រធានសភាអាមេរិកលោកស្រី Nancy Pelosi បានធ្វើដំណើរទៅដល់ទីក្រុងកៀវនាថ្ងៃអាទិត្យទី១ឧសភានេះ។ ជាទស្សនកិច្ចដែលមិនបានប្រាប់ឲ្យដឹងជាមុន និងបានធ្វើឡើងក្រោយទស្សនកិច្ចរបស់ប្រមុខការបរទេស និងប្រមុខការពារជាតិអាមេរិក។ ហើយបន្ទាប់ពីសាកល្បងអស់ជាច្រើនលើកច្រើនសា នៅក្នុងយប់សៅរ៍ឆ្លងចូលថ្ងៃអាទិត្យនេះ ជនស៊ីវិលជាងម្ភៃនាក់ ត្រូវបានជម្លៀសចេញរួចពីក្រុងម៉ារីយូប៉ូល។
ចុះផ្សាយនៅថ្ងៃ៖
ស្តាប់ - ០២:០៨
អរគុណសហរដ្ឋអាមេរិក ដែលបានចូលរួមចំណែកការពារបូរណភាពដែនដីនិងអធិបតេយ្យភាពអ៊ុយក្រែន។ អាមេរិកជាមេក្រុមដ៏រឹងមាំដែលគាំទ្រអ៊ុយក្រែនឱ្យតស៊ូប្រឆាំងនឹងការឈ្លានពានរបស់រុស្ស៊ី។ នេះជាសារទ្វីតរបស់លោកហ្សេឡេនស្គី អមដោយរូបភាពវីដេអូ ទទួលស្វាគមន៍លោកស្រី Pelosi ប្រធានសភាអាមេរិក និងប្រតិភូ។
ចំណែកអាមេរិកវិញក៏បានចេញសេចក្តីថ្លែងការណ៍ បញ្ជាក់ដែរថាប្រតិភូសភាអាមេរិកទៅក្រុងកៀវ ដើម្បីផ្ញើប្រាប់ពិភពលោកទាំងមូលថាសហរដ្ឋអាមេរិកនៅក្បែរអ៊ុយក្រែនជានិច្ច។
សូមបញ្ជាក់ថាទស្សនកិច្ចនេះ ប្រព្រឹត្តទៅតែប៉ុន្មានថ្ងៃក្រោយពីលោកប្រធានាធិបតីអាមេរិក ចូ បៃដិន បានស្នើសុំទៅសភាអាមេរិកឱ្យអនុម័តកញ្ចប់ថវិកាយោធាជួយអ៊ុយក្រែនក្នុងទំហំដ៏មហាសាល ដល់ទៅ៣៣ពាន់លានដុល្លារ។ ជំនួយគាំទ្របន្ថែមសម្រាប់កំពុងចេញទៅហើយបន្តបន្ទាប់ទៀតហើយ។ នេះបើតាមក្រុមប្រតិភូដែលធានាថាសភាអាមេរិកនឹងអនុម័តសំណើហិរញ្ញវត្ថុរបស់ប្រធានាធិបតីបៃដិន។
នៅសប្តាហ៍មុន ប្រមុខការទូត និងរដ្ឋមន្ត្រីការពារជាតិអាមេរិក បានអញ្ជើញមកធ្វើទស្សនកិច្ចដល់ទីក្រុងកៀវដែរ ដោយបានប្រកាសបញ្ជូនវត្តមានមន្ត្រីការទូតអាមេរិកមកអ៊ុយក្រែនវិញ និងបានបន្ថែមជំនួយ ដោយផ្ទាល់និងមិនផ្ទាល់ចំនួន ជាង៧០០លានដុល្លារ។
អ៊ុយក្រែនបន្តទទួលជំនួយយោធាជារដឹក ឯរុស្ស៊ីបន្តវាយប្រហារឥតប្រណីនៅភាគខាងកើត។ តែជាលើកទីមួយ នៅយប់ថ្ងៃសៅរ៍ ជនស៊ីវិលអ៊ុយក្រែនមួយក្រុមដំបូង អាចរត់ភៀសខ្លួនចេញពីកន្លែងលាក់ខ្លួនក្រោមដីAzovstal នៃក្រុងកំពង់ផែម៉ារីយូប៉ូល។ ក្រុមការពារតំបន់ឧស្សាហកម្ម Azovstal ថាជាការជម្លៀសស្ត្រីនិងកុមារប្រមាណជាង២០នាក់។ តែក្រសួងការពារជាតិរុស្ស៊ី ថាមានជនស៊ីវិលពីរក្រុម ២៥និង២១នាក់។ បើតាមរូបភាពផ្កាយរណប ថ្ងៃទី ២៩មេសា សំណង់អាគារនៅ Azovstal ត្រូវបានបំផ្លាញអស់ទាំងស្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ