ស៊ុយអែត នឹងស្នើសុំចូលជាសមាជិកអង្គការអូតង់ដែរ
បន្ទាប់ពីស្ថិតនៅអព្យាក្រិត្យមិនចូលបក្សសម្ព័ន្ធយោធា អស់រយៈពេលជិតពីរសតវត្សរ៍ ស៊ុយអែតនឹងបើកទំព័រសករាជថ្មី តាមរយៈការស្នើសុំចូលជាសមាជិកអង្គការសម្ព័ន្ធអាត្លង់ទិក “អូតង់”! នេះបើតាមប្រសាសន៍របស់លោកស្រី នាយករដ្ឋមន្ត្រីស៊ុយអែត ម៉ាក់ដាឡេណា អាន់ឌែរសុន Magdalena Andersson នៅចំពោះមុខអ្នកសារព័ត៌មាន នាថ្ងៃចន្ទទី ១៦ឧសភា ដោយបញ្ជាក់ថារដ្ឋាភិបាលស៊ុយអែតសម្រេចចិត្ត និងជូនដំណឹងដល់អូតង់រួចហើយ។
ចុះផ្សាយនៅថ្ងៃ៖
ស្តាប់ - ០២:០៧
ស៊ុយអែតនិងហ្វាំងឡង់បានបង្ហាញចេតនាចង់ក្លាយជាសមាជិកអង្គការអូតង់ទន្ទឹមពេលគ្នា។ ម្សិលមិញ ហ្វាំងឡង់បានដាក់បេក្ខភាពជាផ្លូវការ ហើយនៅថ្ងៃចន្ទទី ១៦ ឧសភានេះ ក្នុងសន្និសីទកាសែត លោកស្រីនាយករដ្ឋមន្ត្រីស៊ុយអែតបានប្រកាសដោយចំៗថា ឯកអគ្គរដ្ឋទូតស៊ុយអែតប្រចាំអូតង់ នឹងដាក់ពាក្យសុំចូលជាសមាជិកអង្គការអូតង់ ជាផ្លូវការ នាពេលឆាប់ៗនេះ ហើយសង្ឃឹមថាមិនដល់មួយឆ្នាំទៀតទេ សមាជិកអូតង់ទាំង៣០ នឹងអនុម័តទទួលយកបេក្ខភាពស៊ុយអែត ឱ្យក្លាយជាសមាជិកក្នុងគ្រួសារតែមួយ។
តាំងពីដើមរៀងមក និងសូម្បីតែក្នុងពេលពិភពលោកមានវិបត្តិធ្ងន់ធ្ងរធ្លាក់ក្នុងសង្គ្រាមលោក និងសង្គ្រាមត្រជាក់ ក៏ស៊ុយអែតនិងហ្វាំងឡង់មិនដែលខ្វល់ខ្វាយចង់ភ្ជាប់ខ្លួននឹងអង្គការអូតង់ដែរ ប៉ុន្តែការឈ្លានពានរុស្ស៊ីលើអ៊ុយក្រែន បានធ្វើឱ្យស៊ុយអែតប្តូរផ្លាស់ចិត្ត និងជាលទ្ធផល ស៊ុយអែតសម្រេចដើរចេញពីសករាជចាស់ ហើយបើកសករាជថ្មី។ នេះបើតាមសំដីរបស់លោកស្រីនាយករដ្ឋមន្ត្រីស៊ុយអែតដដែល។
គ្រាន់តែបានឮប្រសាសន៍របស់លោកស្រីនាយករដ្ឋមន្ត្រីស៊ុយអែតភ្លាម លោកប្រធានាធិបតីបារាំង បានថ្លែងសារផ្តល់ការគាំទ្រយ៉ាងពេញទំហឹងសេចក្តីសម្រេចចិត្តរបស់រដ្ឋាភិបាលស៊ុយអែត ដូចអ្វីដែលបារាំងបានធ្វើចំពោះហ្វាំងឡង់ កាលពីថ្ងៃទី ១២ឧសភាដូច្នោះ។
ពីទីក្រុងម៉ូស្គូ ទីដែលមានរៀបចំជំនួបកំពូលសម្ព័ន្ធយោធាតំបន់ លោកប្រធានាធិបតីរុស្ស៊ី វ្លាដេមៀ ពូទីន បានអះអាងថា សម្រាប់រុស្ស៊ី ស៊ុយអែតនិងហ្វាំងឡង់ក្លាយជាសមាជិកបន្ថែមរបស់អង្គការអូតង់ មិនមែនជាការគំរាមកំហែងសន្តិសុខភ្លាមៗមែន ប៉ុន្តែការពង្រាយរចនាសម្ព័ន្ធយោធា នៅលើទឹកដីនៃប្រទេសទាំងពីរ (ស៊ុយអែតនិងហ្វាំងឡង់) ច្បាស់ជានឹងជំរុញឱ្យរុស្ស៊ីនឹងតបតវិញ ដោយការដាក់ពង្រាយកងកម្លាំងយោធា។
នេះជាប្រតិកម្មដែលមានលក្ខណៈទន់ភ្លន់ណាស់ បើប្រៀបទៅនឹងពាក្យគំរាមកំហែង និងទង្វើឈ្លានពានលើអ៊ុយក្រែន របស់រុស្ស៊ីដែលមិនចង់ឃើញអូតង់រំកិលមកជាប់របងផ្ទះខ្លួន។ តែរុស្ស៊ីបានការពារខ្លួនថា បេក្ខភាពអ៊ុយក្រែនសុំចូលអូតង់ខុសពីស៊ុយអែតនិងហ្វាំងឡង់ ព្រោះរុស្ស៊ីគ្មានជម្លោះព្រំដែនជាមួយប្រទេសប៉ែកខាងជើងនោះទេ។ ផ្ទុយទៅវិញ លោកពូទីន បានឆ្លៀតចោទប្រកាន់សហរដ្ឋអាមេរិកថាបានប្រើអូតង់ជាធ្នាក់ដើម្បីសម្រេចបំណងបង្កជម្លោះ និងប្រើមន្ទីរពិសោធន៍អ៊ុយក្រែនដើម្បីបង្កើតសមាសធាតុអាវុធជីវសាស្ត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ