អាកាសធាតុ៖ អឺរ៉ុបកំពុងប្រឈមនឹងរលកកំដៅយ៉ាងចម្លែក មុនរដូវកាល
នៅភាគខាងត្បូងអឺរ៉ុប កំពុងតែប្រឈមនឹងរលកកំដៅយ៉ាងចំលែក និងមុនរដូវកាល។ នៅតំបន់ខ្លះ ជាក់ស្តែងនៅភាគខាងត្បូងប្រទេសបារាំង សីតុណ្ហភាព បានឡើងដល់ ៤២°c។ សីតុណ្ហភាពក្តៅ រួមជាមួយនឹងភាពរាំងស្ងួតផងនោះ បានបង្កឲ្យមានភ្លើងឆេះព្រៃជាច្រើនកន្លែងផងដែរ នៅភាគខាងត្បូងបារាំង និងនៅអេស្ប៉ាញ។
ចុះផ្សាយនៅថ្ងៃ៖
ស្តាប់ - ០២:៣៦
សឹងតែពេញមួយប្រទេសបារាំង រលកកំដៅបានបោកបក់ យ៉ាងចម្លែក និងលឿនខុសរដូវកាល រយៈពេលប្រមាណ៣ថ្ងៃមកហើយ។ យោងតាមអាជ្ញាធរឧតុនិយមបារាំង នៅថ្ងៃសៅរ៍ ទី១៨មិថុនា គឺថាថ្ងៃក្តៅបំផុតមិនធ្លាប់មាន។ តំបន់ភាគខាងត្បូងបារាំង តាមបណ្តោយសមុទ្រមេឌីទែរ៉ាណេ និងមហាសមុទ្រអាត្លង់ទិក ត្រង់កន្លែងខ្លះ សីតុណ្ហភាពឡើងដល់ ៤២°c ខណៈដែលនៅភាគកណ្តាល និងតំបន់ក្រុងប៉ារីស សីតុណ្ហភាពមានចន្លោះ ពី ៣៨ ទៅ ៤១°c។
អាជ្ញាធរបារាំង បានចេញវិធានការផ្សព្វផ្សាយ ឲ្យមនុស្សម្នាមានការប្រុងប្រយ័ត្ន ជាពិសេសកុមារ និងមនុស្សចាស់ ដែលងាយរងគ្រោះ ដោយការថប់ដង្ហើម ក្តៅស្ងួតខ្វះជាតិទឹក។ កម្មវិធីជួបជុំនានានៅទីហាលវាលខាងក្រៅ ទាំងកីឡា ទាំងវប្បធម៌សិល្បៈ ត្រូវបានផ្អាកការរៀបចំ ដើម្បីបង្ការកុំឲ្យមនុស្សប្រឈមនឹងកំដៅថ្ងៃ។ អង្គការកាកបាតក្រហម បានបើកប្រតិបត្តិការជួយសង្គ្រោះជនអនាថារស់នៅតាមផ្លូវ ដែលប្រឈមខ្លាំងបំផុត ដោយសារសីតុណ្ហភាពក្តៅខ្លាំង។
បន្ថែមពីនេះ សមត្ថកិច្ចពន្លត់អគ្គីភ័យ កំពុងត្រៀមប្រយ័ត្នជានិច្ច ក្នុងការប្រយុទ្ធនឹងភ្លើងឆេះព្រៃ។ គិតពីថ្ងៃពុធមក ភ្លើងបានលេបត្របាក់ព្រៃឈើ នៅភាគខាងត្បូងបារាំង ចំនួន១៦០០ហិកតា។ ដោយឡែក នៅអេស្ប៉ាញវិញ ព្រៃឈើប្រមាណ២០ម៉ឺនហិកតា មិនឆ្ងាយប៉ុន្មានពីព្រំដែនព័រទុយហ្កាល់ ត្រូវបានភ្លើងឆាបឆេះ។ ប្រជាជនប្រមាណ១៤ឃុំត្រូវបានសង្គ្រោះរំដោះចេញពីតំបន់គ្រោះថ្នាក់ ដោយអគ្គីភ័យ។
សីតុណ្ហភាព និងភាពរាំងស្ងួតខ្លាំង មិនត្រឹមតែធ្វើបាបនៅភាគខាងត្បូងអឺរ៉ុបប៉ុណ្ណោះ នៅភាគខាងជើងឯណោះ សីតុណ្ហភាពក៏ឡើងក្តៅ ហើយបានបង្កជាភ្លើងឆេះព្រៃច្រើនកន្លែងដែរ។ ជាក់ស្តែង នៅជាយទីក្រុងប៊ែរឡាំង ភ្លើងបានលេបត្របាក់ព្រៃឈើ ប្រមាណ៦០ហិកតា រវាងពីសុក្រ ដល់ថ្ងៃសៅរ៍។
យោងតាមអ្នកវិទ្យាសាស្ត្រ រលកកំដៅមានកាន់តែញឹកញាប់ កាន់តែលឿនរហ័សមុនរដូវកាល ហើយមានរយៈពេលកាន់តែយូរថ្ងៃ នៅអឺរ៉ុប។ នេះគឺជាផលវិបាកជាក់ស្តែង ដែលបណ្តាលមកពីការកើនឡើង នៃកំដៅផែនដី។ ការប្រែប្រួលអាកាសធាតុដ៏លឿនរហ័ស ដែលមនុស្សនៅអឺរ៉ុប មិនទាន់អាចសម្របខ្លួនបាន។ ក្រៅពីរលកកំដៅក្តៅហួតហែងយ៉ាងចម្លែក និងមុនរដូវកាលនេះ គ្រោះធម្មជាតិផ្សេងទៀត ក៏កើតមានកាន់តែញឹកញាប់។ ជាក់ស្តែង កាលពីថ្ងៃទី៤មិថុនាថ្មីៗនេះ ព្យុះភ្លៀងអមដោយដុំព្រឹលទឹកកកធំៗ ខ្យល់និងរន្ទះ បានបោកបក់សឹងតែពេញមួយប្រទេសបារាំង បង្កជាទឹកជំនន់ និងបំផ្លាញផលដំណាំរាប់ពាន់ហិកតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ