២០២២ ៖ មនុស្សជាតិបានប្រើប្រាស់ធនធានប្រចាំឆ្នាំរបស់ផែនដី អស់ ត្រឹមថ្ងៃទី ២៨ កក្កដា
នៅថ្ងៃព្រហស្បតិ៍ទី ២៨ កក្កដា ២០២២នេះ មនុស្សជាតិបានប្រើប្រាស់អស់ធនធានដែលភពផែនដីមានសមត្ថភាពផលិតសម្រាប់មួយឆ្នាំ២០២២ហើយ។ នេះបើតាមរបាយការណ៍របស់អង្គការក្រៅរដ្ឋាភិបាល Global Footprint Network និង WWF។ ចាប់ពីស្អែកទៅ អ្វីដែលយើងទទួលទាន និងប្រើប្រាស់ ត្រូវបានគេចាត់ទុកថាជាការបឺតជញ្ជក់ធនធានដើមរបស់ផែនដី ឱ្យប្រឹងហួសសមត្ថភាពធម្មជាតិ ដើម្បីបម្រើមនុស្សជាតិ។
ចុះផ្សាយនៅថ្ងៃ៖
ស្តាប់ - ០២:១៦
ពីមួយឆ្នាំទៅមួយឆ្នាំ មនុស្សជាតិ បានប្រើប្រាស់អស់ធនធានមុនកាលកំណត់ ហួសសមត្ថភាពចិញ្ចឹមមនុស្សតាមដំណើរធម្មជាតិបានចុះខ្លីជាលំដាប់។ ២៩ធ្នូកាលពីឆ្នាំ១៩៧០ -៤វិច្ឆិកានៅឆ្នាំ១៩៨០ -១១តុលានៅឆ្នាំ១៩៩០ -២៣តុលានៅឆ្នាំ២០០០ -៧សីហានៅឆ្នាំ២០១០ និងត្រឹមតែថ្ងៃទី ២៨ កក្កដា សម្រាប់ឆ្នាំ២០២២។ ពោលគឺ ក្នុងរយៈពេលតែ២០ឆ្នាំ ចំនួនថ្ងៃបានរំកិលថយអស់២ខែ។ មូលហេតុគឺបណ្តាលមកពី មនុស្សជាតិ ត្រូវការ ប្រើប្រាស់ ផលិត កាន់តែច្រើន តែធម្មជាតិផលិតមិនទាន់។ នេះបើតាមពាក្យរបស់អង្គការWWF ដែលលម្អិតថាសម្រាប់១៥៦ថ្ងៃទៀតនៃឆ្នាំ មនុស្សជាតិត្រូវប្រើប្រាស់ធនធានបំរុងរបស់ភពផែនដី ដែលជាធនធានធម្មជាតិចាំបាច់សម្រាប់ជីវិតសត្វលោក។
មនុស្សសត្វគ្រប់រូបសុទ្ធតែមានកំរិតសមត្ថភាពរបស់ខ្លួនក្នុងការធ្វើអ្វីមួយ ចំណែកផែនដី ធម្មជាតិ ទឹក ដី ប្រង ខ្យល់ ធម្មជាតិក៏មានកំរិតសមត្ថភាពរបស់ខ្លួនដែរ។ ចុះបើសេចក្តីត្រូវការរបស់មនុស្សច្រើនជាងការលូតលាស់របស់ធម្មជាតិ តើនឹងមានរឿងអ្វីកើតឡើង ? តើក្មេងជំនាន់ក្រោយនឹងអាចរស់យ៉ាងដូចម្តេច បើយើងនេសាទត្រីកាន់តែច្រើន ទាំងត្រីគ្មានពេលកកើតកូនបន្ត ? កាប់ព្រៃកាន់តែច្រើន ឯកូនឈើគ្មានលូតធំទាន់ ? ហើយបញ្ចេញឧស្ម័នពុលកាបូនិកកាន់តែច្រើន ជាងសមត្ថភាពស្រូបរបស់ព្រៃឈើនិងសមុទ្ទនោះ ?
ដើម្បីគណនារកឃើញចំនួនថ្ងៃដែលមនុស្សជាតិប្រើប្រាស់អស់ធនធានធម្មជាតិប្រចាំឆ្នាំរបស់ភពផែនដី អ្នកស្រាវជ្រាវបានប្រៀបធៀបសកម្មភាពរបស់មនុស្ស និងសមត្ថភាពផែនដី ដោយផ្អែកលើកត្តា៦យ៉ាង គឺ ការដាំដុះ រាលស្មៅ ផ្ទៃដីព្រៃឈើ តំបន់នេសាទ ផ្ទៃដីសាងសង់ និងផ្ទៃក្រឡាព្រៃឈើចាំបាច់សម្រាប់ស្រូបកាបោន ដែលបញ្ចេញដោយគ្រឿងចំហេះធ្យូងថ្ម។ ជាលទ្ធផលបើរស់ដូចបារាំង មនុស្សជាតិនឹងប្រើអស់ធនធានធម្មជាតិត្រឹមថ្ងៃទី ៥ឧសភា។ ហើយប្រព័ន្ធស្បៀងអាហារបច្ចុប្បន្នជាប់ចោទធ្ងន់ជាងគេ។ នេះបើតាមអង្គការក្រៅរដ្ឋាភិបាល Global Footprint Network និងWWF ដែលអំពាវនាវឱ្យមនុស្សជាតិប្តូរឥរិយាបថក្នុងការរស់នៅ។ ឧទាហរណ៍ ការកាត់បន្ថយការខ្ជះខ្ជាយចំណីអាហារ ឱ្យបានពាក់កណ្តាល នៅលើពិភពលោក នឹងធ្វើឱ្យមនុស្សជាតិសន្សំសំចៃបាន១៣ថ្ងៃ។ បន្ថយមកទទួលទានសាច់តែពាក់កណ្តាល មនុស្សជាតិនឹងចំណេញ១៧ថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ