ជនភៀសខ្លួនស៊ីរីប៉ងធ្វើដំណើរជាក្បួន ពីតួកគី មកអឺរ៉ុប
ជនភៀសខ្លួនស៊ីរីដែលកំពុងស្ថិតនៅក្នុងប្រទេសតួកគី កំពុងរៀបចំក្បួនធ្វើដំណើរជាក្រុមចាកចេញពីតួកគីសំដៅមកសហភាពអឺរ៉ុប។ នេះបើតាមដំណឹងដែលភ្នាក់ងារសារព័ត៌មានបារាំង AFP ទទួលបាន កាលពីថ្ងៃសៅរ៍ទី ១០កញ្ញា។
ចុះផ្សាយនៅថ្ងៃ៖
ស្តាប់ - ០២:២៩
តាមរយៈបណ្តាញTelegram បង្ហោះផ្សាយតាំងពី៦ថ្ងៃមុន និងមានអ្នកតាមដានជិត៧ម៉ឺននាក់ អ្នកផ្តើមរៀបចំក្បួន សាកល្បងបញ្ចុះបញ្ចូលជនភៀសខ្លួនស៊ីរីជាង ៣,៧លាននាក់ រស់នៅជាផ្លូវការក្នុងប្រទេសតួកគី ឱ្យមកចូលរួមធ្វើដំណើរឆ្ពោះទៅសហភាពអឺរ៉ុប តាមក្បួនដែលគេប្រសិទ្ធនាមថា “ក្បួនពន្លឺ”។ ការធ្វើដំណើរជាក្បួន ត្រូវចែកជាក្រុមៗ ដែលមានគ្នាច្រើនបំផុត ៥០នាក់ ហើយក្នុងមួយក្រុមៗមានមេដឹកនាំម្នាក់។
ក្នុងសារជាភាសាអារ៉ាប់ អ្នកចាត់ចែងក្បួនធ្វើដំណើរ បានអំពាវនាវឱ្យអ្នកចង់មកអឺរ៉ុប ត្រូវមាន តង់ អាវពោង ទឹក អាហារកំប៉ុង និងសម្ភារៈបរិក្ខារពេទ្យសម្រាប់សេចក្តីត្រូវការបន្ទាន់។ ពេលម៉ោងចេញដំណើរនឹងប្រកាសនៅពេលដល់វេលា។ នេះបើតាមអ្នករៀបចំក្បួនម្នាក់ ជាវិស្វករជាតិស៊ីរីអាយុ ៤៦ឆ្នាំ និងជាជនភៀសខ្លួននៅតួកគីតាំងពី៩ឆ្នាំមក។ សុំមិនបញ្ចេញអត្តសញ្ញាណ អ្នករៀបចំក្បួនម្នាក់នេះ បានបញ្ជាក់ថា អ្នកដឹកនាំក្បួនពន្លឺមួយភាគ បានទៅដល់និងរស់នៅក្នុងទឹកដីសហភាពអឺរ៉ុបស្រាប់ទៅហើយ។
ហេតុអ្វីបានជាក្រុមភៀសខ្លួនចង់ធ្វើដំណើរជាក្រុមមកអឺរ៉ុប នៅពេលនេះ ?! បើតាមមេដឹកនាំចលនាម្នាក់ ពួកគេរស់នៅតួកគីតាំងពី១០ឆ្នាំមកហើយនិងបានទទួលការពារពីតួកគីទៀត ប៉ុន្តែក្រុមលោកខាងលិចត្រូវជួយរំលែកបន្ទុក។ ម្យ៉ាងទៀត ជនភៀសខ្លួនស៊ីរីកាន់តែច្រើនបារម្ភខ្លាចក្រែងតែតួកគីបញ្ជូនពួកគេត្រលប់ទៅស៊ីរីវិញ បន្ទាប់ពីបានឮប្រធានាធិបតីតួកគី លោក អ៊ែរដូហ្កាន លើកឡើងអំពីការធ្វើមាតុភូមិនិវត្តន៍ដោយស្ម័គ្រចិត្តរបស់ជនភៀសខ្លួន។ ហេតុផលចុងក្រោយមួយទៀត គឺនៅពេលផ្ទុះសង្គ្រាមនៅស៊ីរី នៅក្នុងឆ្នាំ២០១១ភ្លាម តួកគីបានសម្តែងការគាំទ្រពួកឧទ្ទាមប្រឆាំងនឹងរដ្ឋាភិបាលរបស់បាស្ហារ អាល់អាសាដ យ៉ាងខ្លាំង តែតាំងពីប៉ុន្មានសប្តាហ៍ចុងក្រោយមកនេះ លោក អ៊ែរដូហ្កាន បានផ្តើមទោរជំហរងាកទៅក្រុងក្រុងដាម៉ាស។
សូមរំលឹកថា នៅរវាងពីខែកុម្ភៈដល់ខែមីនាឆ្នាំ២០២០ មុនផ្ទុះជំងឺរាតត្បាតកូវីដបន្តិច មានជនភៀសខ្លួនស៊ីរីរាប់សិបពាន់នាក់ បាននាំគ្នាសម្រុករត់ឆ្លងព្រំដែនតួកគីនិងក្រិក បន្ទាប់ពីលោកប្រធានាធិបតីតួកគី អ៊ែរដូហ្កាន បានគំរាមបើកចំហច្រកព្រំដែនជាមួយអឺរ៉ុប។ កាលពីឆ្នាំ២០១៥ មនុស្សជិតមួយលាននាក់ ភាគច្រើនជាជនភៀសខ្លួនស៊ីរី បានផ្សងព្រេងធ្វើដំណើរ តាមតួកគី មកដល់អឺរ៉ុប តាមកោះតូចៗរបស់ក្រិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ