អាល្លឺម៉ង់ចាប់ជនជាតិអ៊ីរ៉ង់ម្នាក់ពីបទសង្ស័យរៀបចំធ្វើភេរវកម្ម
អាជ្ញាធរអាល្លឺម៉ង់ បានប្រកាស នៅថ្ងៃអាទិត្យនេះ ចាប់ខ្លួនជនជាតិអ៊ីរ៉ង់ម្នាក់ អាយុ៣២ឆ្នាំ ពីបទសង្ស័យរៀបចំភេរវកម្មអ៊ីស្លាមជ្រុលនិយម ដោយប្រើសារធាតុគីមីនិងជាតិពុល។ ប៉ូលិសអាល្លឺម៉ង់ក៏បានចុះទៅឆែកឆេរផ្ទះជនសង្ស័យទាំងយប់ ក្រែងរកឃើញមានជាតិពុលសម្រាប់បង្កសកម្មភាពភេរវកម្ម។
ចុះផ្សាយនៅថ្ងៃ៖
ស្តាប់ - ០២:១១
នៅក្នុងសេចក្តីថ្លែងការណ៍ ក្រុមអ្នកអង្កេតអាល្លឺម៉ង់ បានបញ្ជាក់ថា ជនជាតិអ៊ីរ៉ង់ចាប់ខ្លួនបាននេះ ជាប់សង្ស័យ ត្រៀមលក្ខណៈរៀបចំបង្កអំពើហិង្សាធ្ងន់ធ្ងរ បែបអ៊ីស្លាមជ្រុលនិយម គំរាមសុវត្ថិភាពជាតិ តាមរយៈការប្រើសារធាតុគីមីពុល Cyanure និងជាតិពុលរុក្ខជាតិ Ricine។ វិទ្យាស្ថានRobert Koch ទទួលបន្ទុកគ្រប់គ្រងវេជ្ជសាស្ត្រនិងសុខាភិបាល បានចាត់ទុករីស៊ីន ដែលគេអាចចម្រាញ់ចេញពីគ្រាប់នៃរុក្ខជាតិរីស៊ីន ជាភ្នាក់ងារពុលខ្លាំងណាស់ ប្រៀបដូចជា អាវុធជីវសាស្ត្រ។ ជាតិរីស៊ីន និងCyanure គឺជាថ្នាំពុលមរណៈដូចគ្នា។
ប៉ុន្តែប៉ូលិសអាល្លឺម៉ង់មិនបានលម្អិតទេថាតើ ជនជាប់សង្ស័យអ៊ីរ៉ង់រៀបចំផែនការភេរវកម្មដល់ដំណាក់កាលណា និងថាតើការគំរាមកំហែងមានលក្ខណៈជាក់ស្តែង និងទាន់ហន់បែបណាឡើយ។
ក្នុងពេលធ្វើប្រតិបត្តិការចាប់ខ្លួនជនជាតិអ៊ីរ៉ង់នេះ ប៉ូលិសបានឃាត់ខ្លួនមនុស្សទីពីរម្នាក់ទៀត ដែលត្រូវជាបងប្អូនប្រុសរបស់ជនសង្ស័យ។ នេះបើតាមប្រភពទូរទស្សន៍ជាតិ ដោយបញ្ជាក់ថា ភ្នាក់ងារចុះទៅឆែកឆេរ សុទ្ធតែមានពាក់ឯកសណ្ឋានការពារ ដោយខ្លាចជួបហានិភ័យជីវសាស្ត្រ។
បើតាមសារព័ត៌មានBild អាជ្ញាធរអាល្លឺម៉ង់បានទទួលសញ្ញាពីភ្នាក់ងារចារកិច្ចបរទេសតាំងពីជាច្រើនថ្ងៃមក ថាមានការគំរាមកំហែងវាយប្រហារដោយគ្រាប់បែកគីមី។ កាលពីឆ្នាំ២០១៨ ប៉ូលិសអាល្លឺម៉ង់ធ្លាប់បានចាប់ខ្លួនជនជាតិទុយនីស៊ីអាយុ៣១ឆ្នាំ និងប្រពន្ធ ពីបទត្រៀមរៀបចំធ្វើភេរវកម្មជីវសាស្ត្រជាលើកទីមួយប្រឆាំងអាល្លឺម៉ង់។ កាលណោះ គេបានរកឃើញជាតិពុលរីស៊ីន ៨៤,៣មីល្លីក្រាម និងគ្រាប់រីស៊ីនជាង៣៣០០គ្រាប់សម្រាប់ផលិតថ្នាំពុល នៅក្នុងផ្ទះប្តីប្រពន្ធដែលបំរើឱ្យអង្គការរដ្ឋអ៊ីស្លាម។ ពីរឆ្នាំបន្ទាប់ តុលាការអាល្លឺម៉ង់បានកាត់ទោសដាក់ពន្ធនាគារប្តីចំនួន១០ឆ្នាំ ប្រពន្ធចំនួន៨ឆ្នាំ។
ប៉ុន្មានឆ្នាំចុងក្រោយមកនេះ អាល្លឺម៉ង់បានក្លាយជាផ្ទាំងស៊ីបនៃការវាយប្រហារភេរវកម្មអ៊ីស្លាមជ្រុលនិយមជាច្រើន។ ធ្ងន់ធ្ងរជាងគេ គឺភេរវកម្មបើកឡានបុកមនុស្សនៅផ្សារណូអែលឆ្នាំ២០១៦ ស្លាប់មនុស្សអស់១៣នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ