អ្នកជំនាញ៖ការបន្តធ្វើទំនើបកម្មកងទ័ពជាអាទិភាពរបស់រដ្ឋមន្រ្តីក្រសួងការពារជាតិថ្មីអាល្លឺម៉ង់
នៅក្នុងប្រទេសអាល្លឺម៉ង់ នាយករដ្ឋមន្រ្តីលោកអូឡាហ្វ ស្ហុលស៍បានបញ្ជាក់ក្នុងថ្ងៃអង្គារ ទី១៧ មករាពីការជ្រើសយកលោកបូរីស ពីស្តូរីយូសឲ្យធ្វើជារដ្ឋមន្រ្តីការពារជាតិថ្មី។ មានអាយុ ៦២ឆ្នាំ និងជាអ្នកសង្គមប្រជាធិបតេយ្យ លោកពីស្តូរីយូសចូលជំនួសកន្លែងលោកស្រីគ្រីស្ទីន ឡាំប្រីស្ត៍ដែលបានសុំលាឈប់ពីតំណែង។ ការជ្រើសយកលោកពីស្តូរីយូសជាជម្រើសភ្ញាក់ផ្អើល ព្រោះឈ្មោះរបស់លោកមិនបានស្ថិតក្នុងចំណោមបេក្ខជនដែលចុះផ្សាយដោយកាសែតនានាទេ។ ទោះជាយ៉ាងនេះក្តី នាយករដ្ឋមន្រ្តីលោកស្ហុលស៍បានថ្លែងថា លោកពីស្តូរីយូសជាឥស្សរជននយោបាយម្នាក់មានបទពិសោធន៏ខ្ពស់ និងធ្លាប់កាន់កាប់កិច្ចការនយោបាយសន្តិសុខជាច្រើនឆ្នាំ។ សូមបញ្ជាក់ថាមកដល់ពេលនេះ លោកពីស្តូរីយូសជារដ្ឋមន្រ្តីមហាផ្ទៃនៅក្នុងរដ្ឋមួយរបស់អាល្លឺម៉ង់។ លោកហាន ស្តាក សាស្រ្តាចារ្យផ្នែកអរិយធម៌អាល្លឺម៉ង់នៅសកលវិទ្យាសរប៊នក្រុងប៉ារីស ប្រទេសបារាំងបានយល់ឃើញថា អាទិភាពរបស់រដ្ឋមន្រ្តីការពារជាតិថ្មីអាល្លឺម៉ង់ គឺការបន្តធ្វើទំនើបកម្មកងទ័ពដែលរដ្ឋាភិបាលក្រុងប៊ែរឡាំងគ្រោងថវិកាចំនួន ១០០ ០០០លានអឺរ៉ូ។
ចុះផ្សាយនៅថ្ងៃ៖
ស្តាប់ - ០១:៣៧
« ដំបូងគេត្រូវដឹងថាគ្រឿងសព្វាវុធភាគច្រើនដែលអាល្លឺម៉ង់កំពុងមានក្នុងដៃសព្វថ្ងៃ គឺមានតែពី ៤០% ទៅ ៥០% ប៉ុណ្ណោះដែលនៅអាចប្រើការបាន។ ក្នុងនោះមានដូចជារថក្រោះ យន្តហោះចម្បាំង ឧទ្ធម្ភាគចក្រ។ល។ និង។ល។ នៅក្នុងបញ្ហានេះ គេត្រូវបង្កើនបន្ថែមឲ្យដល់កម្រិតមួយគ្រប់គ្រាន់ និងជាទីគាប់ចិត្ត។ ទាក់ទងនឹងគ្រាប់រំសេវវិញ អាល្លឺម៉ង់មានបរិមាណសម្រាប់ប្រើតែមួយថ្ងៃប៉ុណ្ណោះនៅក្នុងករណីដែលមានសង្រ្គាម មានន័យថា អាល្លឺម៉ង់គ្មានគ្រាប់កាំភ្លើងដើម្បីផ្គត់ផ្គង់លើសពីមួយថ្ងៃឡើយ។
នេះពិតជាចំណោតមួយធំខ្លាំងណាស់ ហើយរឿងការខ្វះគ្រាប់រំសេវនេះមិនមានចែងនៅក្នុងកម្មវិធីធ្វើទំនើបកម្មកងទ័ពក្នុងទឹកប្រាក់ ១០០ ០០០លានអឺរ៉ូដែលសន្យាដោយនាយករដ្ឋមន្រ្តីអាល្លឺម៉ង់លោកអូឡាហ្វ ស្ហុលស៍ទេ មានន័យថានៅក្នុងទឹកប្រាក់ទាំង ១០០ ០០០លានដុល្លារនោះ គ្មានខ្ទង់ចំណាយដើម្បីបង្កើនគ្រាប់រំសេវឡើយ។ ឃើញថា គឺកងទ័ពអាល្លឺម៉ង់ទាំងមូលដែលបានជួបវិបត្តិក្នុងរយៈពេល ៣ទសវត្សរិ៍ជាប់គ្នា។
ដូច្នេះពេលនេះ គេត្រូវតែប្តូរយុទ្ធសាស្រ្តជាចាំបាច់ ហើយនេះជាកម្មវត្ថុមួយក្នុងចំណោមកម្មវត្ថុផ្សេងទៀតរបស់រដ្ឋមន្រ្តីការពារជាតិថ្មីដែលស្នងពីលោកស្រីឡាំប្រីស្ត៍ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ