រដ្ឋមន្ត្រីការពារជាតិអាល្លឺម៉ង់ សុំចេញពីតំណែងក្រោយនិយាយប៉ះពាល់ដល់សង្គ្រាមអ៊ុយក្រែន
ក្នុងពេលដែលប្រទេសកំពុងរួសរាន់បង្កើនជំនួយយោធាថ្មី ជារថក្រោះ ទៅឱ្យអ៊ុយក្រែន និងកំពុងធ្វើកំណែទម្រង់យោធា នៅថ្ងៃចន្ទទី ១៦ មករានេះ រដ្ឋមន្ត្រីក្រសួងការពារជាតិអាល្លឺម៉ង់បានប្រកាសសុំលាលែងពីតំណែង។ រដ្ឋមន្ត្រីការពារជាតិរូបនេះ រងការរិះគន់តាំងពីជាច្រើនខែមកហើយ និងកាន់តែងាយរបេះទៀត ក្រោយពីបាននិយាយពាក្យមិនសមរម្យទាក់ទងនឹងសង្គ្រាមនៅអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
គេរង់ចាំដំណឹងជាច្រើនថ្ងៃមកហើយ តែទើបនៅថ្ងៃចន្ទទី ១៦មករានេះទេ ដែលលោកស្រី គ្រីស្ទីន ឡាំប្រីស្ត៍ បានសរសេរលិខិតជាលាយលក្ខណ៍អក្សរសុំលាលែងពីតំណែង។ រងការរិះគន់តាំងពីច្រើនខែមកស្រាប់ សារជូនពរនាឱកាសបុណ្យចូលឆ្នាំថ្មី បានមកផ្តាច់កិត្តិនាមរបស់លោកស្រីតែម្តង។
នៅក្នុងវីដេអូ ពីកណ្តាលទីក្រុងប៊ែរឡាំង លោកស្រីដែលមានសក់ប៊ើងកន្ទ្រើងដោយខ្យល់ខ្លាំង បានភ្លាត់មាត់និយាយថា សង្គ្រាមកំពុងឆេះរាលដាលនៅកណ្តាលអឺរ៉ុប តែបានផ្តល់ឱកាសលោកស្រីមានជំនួបជាមនុស្សសំខាន់ៗ ជាច្រើន ! អរគុណ! កាលពីប៉ុន្មានខែមុន នៅពេលលោកប្រធានាធិបតីអ៊ុយក្រែនស្នើសុំជំនួយអាវុធធុនធ្ងន់ លោកស្រីប្រកាសផ្តល់មួកការពារចំនួន៥ពាន់។ ប្រើឧទ្ធម្ភាគចក្រយោធាទៅកំសាន្តវិស្សមកាល ... អាល្លឺម៉ង់បន្ទោសលោកស្រីជាច្រើននិងខ្លាំងទៀត ដែលមិនស្គាល់សំណុំរឿង មិនអាចក្តាប់រចនាសម្ព័ន្ធយោធាប្រទេសបាន។ មានកញ្ចប់ថវិកាពិសេសដល់១០០ពាន់លានហើយ នៅតែយឺតយ៉ាវក្នុងធ្វើកំណែទម្រង់បានយោធាជាតិ និងយឺតយ៉ាវក្នុងការគាំទ្រយោធាអ៊ុយក្រែនទៀត។
យ៉ាងណាក៏ដោយ ក៏លោកនាយករដ្ឋមន្ត្រីបានសម្តែងអំណរគុណលោកស្រី គ្រីស្ទីន ឡាំប្រិស្ត៍ ដែលបានបំពេញការងារបម្រើជាតិកន្លងមក តែរហូតមកទល់នឹងល្ងាចថ្ងៃចន្ទនេះ គេនៅពុំទាន់ស្គាល់មុខរដ្ឋមន្ត្រីការពារជាតិថ្មីទេ។ បើតាមសារព័ត៌មាន Bild លោក អូឡាហ្វ ស្ហុលស៍ ទំនងជានឹងមិនអាចអនុវត្តគោលការណ៍សមភាពស្ត្រីនិងបុរសក្នុងជួររដ្ឋាភិបាលទៀតទេ ព្រោះជាជម្រើសដ៏លំបាក។ លោក អូឡាហ្វ ស្ហុលស៍ ចាំបាច់ត្រូវមានរដ្ឋមន្ត្រីការពារជាតិដែលអាចគ្រប់គ្រងអាល្លឺម៉ង់ “សករាជថ្មី” សម្រាប់ធ្វើទំនើបកម្មវិស័យការពារជាតិរបស់ខ្លួនផង ហើយអាចឆ្លើយតបទៅបរិបទសង្គ្រាម ដែលអាល្លឺម៉ង់ត្រូវប្រកាសផ្តល់ការគាំទ្រថ្មីទៀត ដល់អ៊ុយក្រែន និងជួបប្រជុំក្រុមសម្ព័ន្ធមិត្តជាមួយអាមេរិកនៅថ្ងៃសុក្រទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ