លោកម៉ាក្រុង និងលោកស្ហុលស៍បង្ហាញពីការរកឃើញឡើងវិញនូវម៉ូទ័របារាំង អាល្លឺម៉ង់ដើម្បីធ្វើឲ្យអឺរ៉ុបកាន់តែខ្លាំង
នៅថ្ងៃអាទិត្យ ទី២២ មករា បារាំង និងអាល្លឺម៉ង់បានប្រារព្ធខួប ៦០ឆ្នាំនៃសន្ធិសញ្ញាមិត្តភាពដែលបានចុះហត្ថលេខាកាលពីថ្ងៃទី២២ មករា ឆ្នាំ ១៩៦៣។ ពិធីនេះបានរៀបចំធ្វើនៅសកលវិទ្យាល័យស័រប៊នក្នុងក្រុងប៉ារីសប្រទេសបារាំងដោយមានការចូលរួមផ្ទាល់របស់ប្រធានាធិបតីបារាំងលោកម៉ាក្រុង និងនាយករដ្ឋមន្រ្តីអាល្លឺម៉ង់លោកស្ហុលស៍។ ខួប ៦០ឆ្នាំនៃមិត្តភាពបារាំង អាល្លឺម៉ង់បានធ្វើឡើងនៅក្នុងបរិបទនៃសង្រ្គាមរុស្ស៊ីឈ្លានពានអ៊ុយក្រែន និងចំពេលដែលបារាំង អាល្លឺម៉ង់កំពុងស្គាល់ភាពរកាំរកូសរវាងគ្នា។ តែនៅក្នុងសុន្ទរកថាថ្លែងនាឱកាសនោះ លោកស្ហុលស៍បានបញ្ជាក់ថា បារាំង និងអាល្លឺម៉ង់អាចជំនះភាពមិនចុះសម្រុងគ្នា និងថា អនាគតអឺរ៉ុបផ្អែកលើកិច្ចសហប្រតិបត្តិរវាងប្រទេសទាំងពីរ។ ចំណែកលោកម៉ាក្រុងបានលើកឡើងដោយធានាថា អាល្លឺម៉ង់ និងបារាំងត្រូវតែក្លាយជាអ្នកត្រួសត្រាយផ្លូវសម្រាប់ការកសាងអឺរ៉ុបឡើងវិញ។ តែលោកម៉ាក្រុងបានទទួលស្គាល់ថា មានការងារជាច្រើនទៀតដែលត្រូវធ្វើ។
ចុះផ្សាយនៅថ្ងៃ៖
ស្តាប់ - ០១:៤៤
« ការងារនៅសេសសល់ដែលត្រូវធ្វើ គឺធំធេងណាស់ដើម្បីឈានទៅសម្រេចកម្មវត្ថុរបស់យើងនូវអឺរ៉ុបមួយដែលមានអធិបតេយ្យភាព ប្រជាធិបតេយ្យ និងសាមគ្គីភាពជាងមុន។ ដើម្បីអាចឈានទៅដល់កម្មវត្ថុមួយនេះបាន វាអាស្រ័យលើយើងជាពលរដ្ឋអឺរ៉ុបស្ទើរតែទាំងស្រុង។ អាស្រ័យលើជម្រើសរបស់យើង អាស្រ័យលើការសម្រេចចិត្តដែលយើងបានអនុម័តយក និងអាស្រ័យលើការសម្រេចចិត្តដែលយើងមិនបានអនុម័តយក។
ប្រទេសយើងទាំងពីរបារាំង និងអាល្លឺម៉ង់បានដឹងពីរបៀបធ្វើដូចដែលខ្លួនបានធ្វើនៅក្នុងដំណើរការកសាងអឺរ៉ុប។ អាល្លឺម៉ង់ និងបារាំងនឹងធ្វើការជ្រើសរើសអនាគតរបស់អឺរ៉ុប។ លោកស្ហុលស៍បាននិយាយត្រឹមត្រូវណាស់អំបាញ់មិញនេះ។ គូស្រករបារាំង អាល្លឺម៉ង់មិនមែនជាគូដែលបានចារទុកទេ។ បើអ្វីៗបានចារទុក និងជារឿងសាមញ្ញនោះ ប្រហែលជាគូស្រករបារាំង អាល្លឺម៉ង់មិនត្រូវការរៀបចំប្រារព្ធខួបអ្វី និងក៏មិនចាំបាច់ធ្វើការបង្កើតថ្មីជាប់ជាប្រចាំអ្វីដែរ។
គូស្រករបារាំង អាល្លឺម៉ង់គឺអស្ចារ្យណាស់នៅពេលដែលភាគីទាំងពីរទុកផលប្រយោជន៍ផ្ទាល់ខ្លួនមួយកន្លែង និងប្រឹងប្រែងរួមគ្នាដើម្បីធ្វើឲ្យអឺរ៉ុបកាន់តែខ្លាំង និងកសាងផ្លូវអឺរ៉ុបកាន់តែធំ។ ជម្រើសឯកភាព និងការរួមបញ្ចូលគ្នារវាងប្រជាជន និងប្រវត្តិសាស្រ្តរបស់យើងដើម្បីធ្វើឲ្យអឺរ៉ុបកាន់តែរឹងមាំ។ គឺជម្រើសអនាគតនេះហើយដែលជារបស់យើងថ្ងៃនេះ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ