អ៊ីរ៉ង់អះអាងថា ចរចាបានសម្រេច ដើម្បីទិញយន្តហោះចម្បាំងរុស្ស៊ី Sukhoi Su-35
អ៊ីរ៉ង់ប្រកាសថា រុស្ស៊ីបានយល់ព្រមព្រៀងលក់យន្តហោះចម្បាំង Sukhoi Su-35 ទៅឲ្យអ៊ីរ៉ង់។ នៅក្នុងសេចក្តីថ្លែងការណ៍ ទៅកាន់អង្គការសហប្រជាជាតិ ដែលទីភ្នាក់ងារព័ត៌មានអ៊ីរ៉ង់ IRNA ដកស្រង់ ចុះផ្សាយ កាលពីថ្ងៃសៅរ៍ ទី ១១មីនា អ្នកតំណាងអ៊ីរ៉ង់ នៅអង្គការសហប្រជាជាតិបញ្ជាក់ដែរថា អ៊ីរ៉ង់កំពុងចាប់ផ្តើមទាក់ទងជាមួយប្រទេសមួយចំនួនផ្សេងទៀត ដើម្បីទិញយន្តហោះចម្បាំង សម្រាប់បំពាក់ឲ្យកងទ័ពអាកាសអ៊ីរ៉ង់។ អ៊ីរ៉ង់ផ្តើមចរចា ចង់ទិញយន្តហោះចម្បាំងរបស់រុស្ស៊ី នៅក្រោយ ទណ្ឌកម្មអន្តរជាតិ ដែលហាមអ៊ីរ៉ង់មិនឲ្យទិញសព្វាវុធ ត្រូវចប់ អស់សុពលភាព នៅខែតុលា ឆ្នាំ២០២០។
ចុះផ្សាយនៅថ្ងៃ៖
ស្តាប់ - ០៣:២១
ជាង ២ឆ្នាំក្រោយ សេចក្តីសម្រេចរបស់អង្គការសហប្រជាជាតិស្តីពីការហាមលក់អាវុធឲ្យអ៊ីរ៉ង់ អស់សុពលភាព អ៊ីរ៉ង់អះអាងថា ខ្លួនចរចាបានសម្រេចដើម្បីទិញយន្តហោះចម្បាំងរបស់រុស្ស៊ី ប្រភេទ Sukhoi Su-35។
តាមអ្នកតំណាងរបស់អ៊ីរ៉ង់ នៅអង្គការសហប្រជាជាតិ ដែល ទីភ្នាក់ងារព័ត៌មានរដ្ឋអ៊ីរ៉ង់ Irna ដកស្រង់សំដីកាលពីថ្ងៃសៅរ៍ រុស្ស៊ីត្រៀមខ្លួនដើម្បីលក់យន្តហោះចម្បាំងឲ្យអ៊ីរ៉ង់។ ទីភ្នាក់ងារព័ត៌មានរដ្ឋអ៊ីរ៉ង់មិនបានសរសេរលម្អិតពីចំនួនយន្តហោះចម្បាំងរុស្ស៊ី ប៉ុន្តែ អ្នកតំណាងអ៊ីរ៉ង់ខាងលើបញ្ជាក់ថា យន្តហោះ ចម្បាំង រុស្ស៊ី Sukhoi Su-35មានសមត្ថភាពគ្រប់គ្រាន់ដែលអ៊ីរ៉ង់អាចទទួលយកបាន។
រងជាប់ទណ្ឌកម្មរបស់អាមេរិកដូចគ្នា អ៊ីរ៉ង់ និងរុស្ស៊ីបានរឹតបន្តឹងចំណងមិត្តភាពរវាងគ្នា ជាពិសេសក្នុងផ្នែកយោធា។ អាមេរិកផ្ទាល់ដែលបានសម្រេចឯកតោភាគី ត្រលប់ទៅដាក់ទណ្ឌកម្មសេដ្ឋកិច្ចលើអ៊ីរ៉ង់ នៅឆ្នាំ ២០១៩ បានព្រមានពីគ្រោះថ្នាក់ នៃការពង្រឹងសហប្រតិបត្តិការយោធា អ៊ីរ៉ង់ រុស្ស៊ី នៅក្នុងខណៈពេលដែលអ៊ីរ៉ង់កំពុងរងការចោទប្រកាន់ថា បានផ្តល់ដ្រូនទៅឲ្យរុស្ស៊ីយកទៅវាយប្រហារអ៊ុយក្រែន។
នៅខែធ្នូកន្លងទៅ អ្នកនាំពាក្យរបស់ក្រសួងកាពារជាតិអាមេរិក ធ្លាប់ពន្លយឲ្យដឹងថា រុស្ស៊ីទំនងលក់យន្តហោះចម្បាំង ប្រភេទSukhoi Su-35 ទៅឲ្យអ៊ីរ៉ង់។ តាមអ្នកនាំពាក្យអាមេរិកខាងលើ សេចក្តីរាយការណ៍មួយចំនួនបង្ហាញថា អ្នកបើកបរយន្តហោះអ៊ីរ៉ង់កំពុងទទួលការហ្វឹកហាត់បើកយន្តហោះចម្បាំង Sukhoi នៅក្នុងទឹកដីរុស្ស៊ី។ ចំណែកការប្រគល់យន្តហោះចម្បាំងរុស្ស៊ីទៅឲ្យអ៊ីរ៉ង់ នឹងអាចប្រព្រឹត្តទៅយ៉ាងយូរបំផុតនៅឆ្នាំក្រោយ។
តាមការចុះផ្សាយរបស់ទីភ្នាក់ងារព័ត៌មានអ៊ីរ៉ង់ ក្រៅពីយល់ព្រមព្រៀង ទិញយន្តហោះចម្បាំងរុស្ស៊ី អ៊ីរ៉ង់កំពុងផ្តើមចរចាជាមួយប្រទេសមិត្តមួយចំនួនដែលអាចលក់យន្តហោះចម្បាំងឲ្យអ៊ីរ៉ង់។
មានយន្តហោះចម្បាំងប្រមាណ ៣០០គ្រឿង ដែលភាគច្រើនជាយន្តហោះចម្បាំងចាស់ៗ ដូជាយន្តហោះផលិតឡើងក្នុងសម័យសហភាពសូវៀត(Mig-29, Su25) យន្តហោះចិន (F-7)
យន្តហោះបារាំង (MirageF1) និងយន្តហោះអាមេរិក ដែលអ៊ីរ៉ង់ទិញប្រើ តាំងពីមុនបដិវត្តអ៊ីរ៉ង់ឆ្នាំ ១៩៧៩ អ៊ីរ៉ង់ត្រូវការយន្តហោះចម្បាំងថ្មីៗមកបំពាក់ឲ្យកងទ័ពជើងអាកាសរបស់ខ្លួន។ អ៊ីរ៉ង់ធ្លាប់បានចរចាទិញប្រព័ន្ធខែលមីស៊ីលរបស់រុស្ស៊ី នៅឆ្នាំ ២០០៧។ ប៉ុន្តែ ទណ្ឌកម្មសេដ្ឋកិច្ច របស់ក្រុមប្រឹក្សាសន្តិសុខ ដោយសារកម្មវិធីនុយក្លេអ៊ែរអ៊ីរ៉ង់បានធ្វើឲ្យរុស្ស៊ីផ្អាក លក់ប្រព័ន្ធមីស៊ីលទៅឲ្យអ៊ីរ៉ង់នៅឆ្នាំ ២០១០។ នៅឆ្នាំ ២០១៥ នៅប៉ុន្មានខែ មុនដែលប្រទេសមហាអំណាច និងអ៊ីរ៉ង់ចុះហត្ថលេខាលើកិច្ចព្រមព្រៀងស្តីពីនុយក្លេអ៊ែរអ៊ីរ៉ង់ រុស្ស៊ី បានចុះកិច្ចសន្យាលក់ប្រព័ន្ធខែលមីស៊ីលទៅឲ្យអ៊ីរ៉ង់។ នៅឆ្នាំ ២០១៦ ក្រសួងការពារជាតិអ៊ីរ៉ង់ អះអាងថា ខ្លួនមានប្រព័ន្ធខែលមីស៊ីលរុស្ស៊ី S-300។
អ្នកជំនាញវាយតម្លៃថា បន្ថែមពីលើប្រព័ន្ធខែលមីស៊ីលរុស្ស៊ី អ៊ីរ៉ង់បានយន្តហោះចម្បាំងទំនើបថ្មី ដើម្បីពង្រឹងសមត្ថភាពការពារដែនអាកាសរបស់ខ្លួន មិនឲ្យចាញ់ប្រទេសជិតខាង ជាពិសេស អ៊ីស្រាអែល ដែលជាសត្រូវសួពូជរបស់អ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ