នៅរុស្ស៊ី ការបះបោររបស់ទាហានស៊ីឈ្នួលវ៉ាក់ណែឃើញពន្លឺតែ២៤ម៉ោងក៏ត្រូវរលត់ទៅវិញ
ស្ថានការណ៍នៅប្រទេសរុស្ស៊ីបានចុះស្ងប់ស្ងាត់មកនេះ នៅថ្ងៃអាទិត្យ បន្ទាប់ពី រងអង្រួនដោយចលនាបះបោររបស់ក្រុមទាហានស៊ីឈ្នួលវ៉ាក់ណែ។ បន្ទាប់ពីបញ្ជូនលើកទ័ពសំដៅទីក្រុងម៉ូស្គូ ដើម្បី ប៉ុនប៉ងផ្តួលអំណាចរបស់មេដឹកនាំយោធារុស្ស៊ី មេទ័ពទាហានស៊ីឈ្នួល វ៉ាក់ណែ គឺលោកអេវហ្គីនី ព្រីហ្គោហ្ស៊ីនបានប្រកាស នៅយប់ថ្ងៃសៅរ៍ម្សិលមិញថា ទាហានវ៉ាក់ណែ លែងបន្តដំណើរឆ្ពោះទៅម៉ូស្គូ ប៉ុន្តែ បែរត្រលប់ក្រោយ ចូលទៅកាន់បន្ទាយទាហានវិញ។ តាមអ្នកនាំពាក្យរបស់វិមានក្រេមឡាំង ទាហានស៊ីឈ្នួលវ៉ាក់ណែធ្វើដំណើរពាក់កណ្តាលផ្លូវ ក៏ត្រលប់បកក្រោយ ដោយមកពីមានការចរចា សម្របសម្រួលរបស់ប្រធានាធិបតីបេឡារុស លោកលូកាឆិនកូ។ តាមវិមានក្រេមឡាំង ទៅតាមការចរចាកាលពីយប់ថ្ងៃសៅរ៍ មេទាហានស៊ីឈ្នួលរបស់ក្រុមហ៊ុនវ៉ាក់ណែត្រូវចាកចេញទៅ រស់នៅប្រទេសបេឡារុស ជាថ្នូរមកវិញ អាជ្ញាធររុស្ស៊ីនឹងលែងស៊ើបអង្កេតបទឧក្រិដ្ឋកម្ម ប្រឆាំងនឹងមេទាហានស៊ីឈ្នួលវ៉ាក់ណែ ចំណែក ទាហានវ៉ាក់ណែដែលចូលរួមក្នុងសកម្មភាពបះបោរកាលពីថ្ងៃសៅរ៍ ក៏ត្រូវអនុគ្រោះ មិនប្រឈមនឹងការដាក់ទោស ពិន័យពីរដ្ឋាភិបាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:១០
នៅថ្ងៃសៅរ៍ទី២៤មិថុនា ក្បួនរថយន្តរបស់ពួកទាហានស៊ីឈ្នួលវ៉ាក់ណែបានបើកជិតចូលដល់ក្រុងម៉ូស្គូ ដោយនៅសល់តែជាង ២០០គីឡូម៉ែត្រប៉ុណ្ណោះ ក៏ត្រូវឈប់ និងបែរក្បាលត្រលប់ក្រោយវិញ។ តាមមេក្រុមទាហានស៊ីឈ្នួលវ៉ាក់ណែ លោកព្រីហ្គោហ្ស៊ីន ទាហានវ៉ាក់ណែនឹងត្រលប់ចូលបន្ទាយនៅអ៊ុយក្រែន។
ក្រុមទាហានស៊ីឈ្នួលវ៉ាក់ណែ បែរត្រលប់ក្រោយ លែងធ្វើដំណើរទៅម៉ូស្គូ បន្ទាប់ពីមានការចរចា ជួយសម្របសម្រួលពីប្រធានាធិបតីបេឡារុស លោកលូកាឆិនកូ ដែលបាននិយាយទូរស័ព្ទផ្ទាល់ជាមួយ មេក្រុមទាហានវ៉ាក់ណែ លោកព្រីហ្គោហ្ស៊ីននៅថ្ងៃសៅរ៍។ មេក្រុមទាហានស៊ីឈ្នួល វ៉ាក់ណែ នៅយប់ថ្ងៃសៅរ៍ និយាយថា ទាហានវ៉ាក់ណែ ដកខ្លួនចេញពីទីក្រុងRostov ត្រលប់ទៅបន្ទាយវិញ នៅក្នុងសមរភូមិអ៊ុយក្រែន ព្រោះតែមិនចង់ឲ្យមានការប្រយុទ្ធបង្ហូរឈាមជនជាតិរុស្ស៊ី។
វិមានក្រេមឡាំងស្វាគមដំណោះស្រាយស្នើឡើងដោយប្រធានាធិបតីបេឡារុស និងមេទាហានវ៉ាក់ណែ ដែលជួយឲ្យរុស្ស៊ីជៀសផុតពីថ្លុកឈាម។ នៅក្នុងសន្និសីទកាសែត កាលពីថ្ងៃយប់ថ្ងៃសៅរ៍ អ្នកនាំពាក្យរបស់វិមានក្រេមឡាំង បាននិយាយថា ទៅតាមចរចាសម្របសម្រួលរបស់ប្រធានាធិបតីបេឡារុស ដែលជាសម្ព័ន្ធមិត្តរបស់លោកពូទីន មេទាហានវ៉ាក់ណែនឹងចាកចេញពីទឹកដីរុស្ស៊ី ទៅនៅបេឡារុស និងរួចផុតរាល់ចោទប្រកាន់ក្បត់ជាតិ ឬការស៊ើបអង្កេតទាក់ទងនឹងការប្រព្រឹត្តបទឧក្រិដ្ឋនៅរុស្ស៊ី។ ចំណែកទាហានវ៉ាក់ណែដែលបានចូលរួម នៅក្នុងក្រុមបះបោ លើកគ្នាទៅម៉ូស្គូម្សិលមិញ ក៏មិនត្រូវប្រឈមនឹងការដាក់ទោស អូសដំណើរអ្វីដែរ ដោយមើលទៅស្នាដៃ គុណបំណាច់របស់ពួកគេ ដែលជួយរុស្ស៊ី នៅក្នុងសង្រ្គាមអ៊ុយក្រែន។ តាមអ្នកនាំពាក្យរបស់វិមានក្រេមឡាំងដដែល ទាហានវ៉ាក់ណែផ្សេងទៀត ដែលមិនបានចូលរួម ជាមួយលោកព្រីហ្គោហ្ស៊ីន នៅក្នុងក្បួនទ័ពសំដៅម៉ូស្គូ ប៉ុន្តែ ដែលកំពុងស្ថិតក្នុងបន្ទាយ អាចចុះឈ្មោះ ក្នុងបញ្ជីកងទ័ពស្របច្បាប់របស់រុស្ស៊ី បើសិនគេចង់។ ដំណើរការចុះឈ្មោះក្នុងឈ្មោះកងទ័ពជាតិរុស្ស៊ី ត្រូវធ្វើឲ្យបានឆាប់បំផុត ព្រោះថា ក្រសួងការពារជាតិរុស្ស៊ី បានដាក់កំណត់ថ្ងៃចុងក្រោយ នៅថ្ងៃទី ១កក្កដា ខាងមុខ។
ហេតុអ្វីមេទាហានស៊ីឈ្នួលវ៉ាក់ណែលើកគ្នាទៅបះបោរប្រឆាំងអំណាចយោធានៅម៉ូស្គូ?
នៅពេលចាប់ធ្វើដំណើរចូលទឹកដីរុស្ស៊ី ទៅកាន់កាប់ទីបញ្ជាការដ្ឋានរុស្ស៊ី នៅទីក្រុងRostov កាលពីព្រឹកថ្ងៃសៅរ៍ មេក្រុមវ៉ាក់ណែនិយាយថា គោលដៅរបស់ខ្លួនរុស្ស៊ី គឺដើម្បីស្វែងរកយុត្តិធម៌ ផ្តួលអំណាចរបស់មេដឹកនាំយោធា ដែលវ៉ាក់ណែចោទប្រកាន់ថា បាញ់សម្លាប់ប្រជាជនស៊ីវិលរុស្ស៊ី ទាហានវ៉ាក់ណែ នៅក្នុងសមរភូមិអ៊ុយក្រែន។
ពេលដកទ័ពចេញពីទីក្រុងរុស្ស៊ី Rostov មេក្រុមទាហានស៊ីឈ្នួល វ៉ាក់ណែប្រកាសក្តែងៗថា ខ្លួនសម្រេចក្នុងការទាមទារពីរដ្ឋាភិបាលរុស្ស៊ី។ ការប្រកាសរបស់លោកព្រីហ្គោហ្ស៊ីនដែលថា លោកបានទទួលអ្វីៗតាមការទាមទារចង់បានរបស់លោក នៅមុនលើកទ័ពទៅម៉ូស្គូ គ្រាន់តែជាឡប់ឡែ បិទបាំង ភាពអាម៉ាសរបស់ខ្លួនតែប៉ុណ្ណោះ។ មេដឹកនាំយោធោ ដូចជារដ្ឋមន្រ្តីការពារជាតិ មិនត្រូវដកតំណែង ប៉ុន្តែ ផ្ទុយទៅវិញ លោកព្រីហ្គោហ្ស៊ីនខ្លួនឯង ត្រូវចាកចេញពីទឹកដីរុស្ស៊ី ទៅនៅបេឡារុស។
ទាហានស៊ីឈ្នួលវ៉ាក់ណែមិនត្រឹមតែ មិនអាចផ្តួលមេដឹកនាំយោធា ដូចជារដ្ឋមន្រ្តីការពារជាតិ និងមេបញ្ជាការកងទ័ពរុស្ស៊ី ដែលលោករិះគន់ថា ជាអ្នកកុហក បង្កើតសង្រ្គាមនៅអ៊ុយក្រែនតែប៉ុណ្ណោះទេ ប៉ុន្តែ មេក្រុមទាហានវ៉ាក់ណែបរាជ័យ មិនបានទទួលលទ្ធផលដែលខ្លួនចង់បាន។
ក្រុមទាហានវ៉ាក់ណែដែលចូលកាន់កាប់ ទីក្រុងយុទ្ធសាស្រ្តយោធារបស់រុស្ស៊ី នៅRostov និងលើកគ្នាទៅម៉ូស្គូ ដើម្បីផ្គើនអំណាចរបស់លោកពូទីន ក៏ព្រោះតែពួកគេ មិនចង់ចូលបម្រើក្នុងជួរកងទ័ពរុស្ស៊ី។ កំហឹងរបស់មេទាហានស៊ីនឈ្នួលវ៉ាក់ណែជាមួយថ្នាក់ដឹកនាំកងទ័ពរុស្ស៊ីមានកាន់តែខ្លាំង បន្ទាប់ពី រដ្ឋមន្រ្តីការពារជាតិរុស្ស៊ី ដែលបានទទួលភ្លើងខៀវពីលោកពូទីន បានចេញបញ្ជាកាលពីថ្ងៃទី ១០មិថុនា ឲ្យទាហានស៊ីឈ្នួលវ៉ាក់ណែទាំងអស់ចុះកិច្ចសន្យា ចូលបម្រើក្នុងជួរកងទ័ពរុស្ស៊ី។
ទាហានវ៉ាក់ណែ មិនចង់ចូលក្នុងជួកងទ័ពជាតិរុស្ស៊ី ព្រោះពួកគេមិនចង់បាត់បង់ផលប្រយោជន៍ច្រើន ជាពិសេសប្រាក់ខែ។ មេទាហានវ៉ាក់ណែ លោកព្រីហ្គោហ្ស៊ីន ធ្លាប់ចោទប្រកាន់មេដឹកនាំយោធា រុស្ស៊ី ដូចជា រដ្ឋមន្រ្តីការពារជាតិ ថា មានមហិច្ឆតា ចង់លុបបំបាត់ចោលក្រុមទាហានស៊ីឈ្នួលវ៉ាក់ណែ បន្ទាប់ពីក្រុមនេះ មានស្នាដៃ វាយយកបានទីក្រុងបាក់មូដ ខណៈពេលដែលកងទ័ពរុស្ស៊ីធម្មតា គ្មានសមត្ថភាព។ ម្យ៉ាងដោយហ៊ានព្រហើនចេញមុខ តទល់ជាមួយលោកពូទីន ដែលជាអ្នកធ្លាប់ជួយទំនុកបំរុង បង្កើតឲ្យមានក្រុមវ៉ាក់ណែ លោកព្រីហ្គោហ្ស៊ីន ចង់បង្ហាញថា ទាហានវ៉ាក់ណែ មានស្នាដៃច្រើន ដូច្នេះ គួរតែបានរង្វាន់ពីរដ្ឋាភិបាលរុស្ស៊ី។ ផ្ទុយទៅវិញ កងទ័ពវ៉ាក់ណែត្រូវរងការវាយប្រហារពីក្រោយខ្នងរបស់កងទ័ពរុស្ស៊ី។
មួយវិញទៀត សម្រាប់មេទាហានវ៉ាក់ណែ សង្រ្គាមនៅអ៊ុយក្រែន បានធ្វើឲ្យក្រុមវ៉ាក់ណែខាតបង់ជីវិតទាហាន ខាតបង់ប្រាក់ចំណូល ច្រើនណាស់។ ពួកគេទំនងលែងចង់ធ្វើសង្រ្គាមនៅអ៊ុយក្រែនតទៅទៀត ដោយគ្រាន់តែចង់ផ្តោតលើអាជីវកម្ម ជំនួញ នៅប្រទេសអាហ្វ្រិក ឬនៅដើមបូពា ជាទីដែលពួកវ៉ាក់ណែមានអាជីវកម្មរ៉ែ ឬកិច្ចសន្យាធានាសន្តិសុខឬជំនួញលក់អាវុធ ឲ្យមេដឹកនាំយោធានៅអាហ្វ្រិក ដូចជានៅម៉ាលីជាដើម។
លោកព្រីហ្គោហ្ស៊ីនធ្វើឲ្យមានការចោទសួរពីអំណាចរបស់លោកពូទីន
លោកព្រីហ្គោហ្ស៊ីនមិនអាចសម្រេចគោលដៅរបស់ខ្លួន និងត្រូវនិរទេសទៅនៅបេឡារុស ចំណែកក្រុមហ៊ុនស៊ីឈ្នួលវ៉ាក់ណែ ក៏មិនដឹងមានជោគវាសនាយ៉ាងណា នៅក្រោយពេលកងទ័ពរុស្ស៊ីស្រូបយកទាហានស៊ីឈ្នួលវ៉ាក់ណែទាំងអស់ បន្ទាប់ពីការប៉ុនប៉ងបះបោរ មិនបានសម្រេច របស់លោកព្រីហ្គោហ្ស៊ីន។ ប៉ុន្តែ យ៉ាងណាក៏ដោយ ការលើកគ្នាបះបោរប្រឆាំងនឹងមេដឹកនាំយោធា ទៅតាមចង់បានរបស់លោកព្រីហ្គោហ្ស៊ីន បានធ្វើឲ្យលោកពូទីន អាម៉ាស់ បាក់មុខខ្លាំងជាងពេលណាៗទាំងអស់ គិតចាប់តាំងពីលោកពូទីនចូលកាន់អំណាចនៅរុស្ស៊ី នៅ២០ឆ្នាំមកនេះ។ នៅថ្ងៃសៅរ៍ ជាលើកទី១ នៅក្រោយ លោកពូទីនចាត់ទុកការបះបោររបស់វ៉ាក់ណែជាការក្បត់ជាតិ លោកព្រីហ្គោហ្ស៊ីនបានដំឡើងសំឡេងតបនឹងលោកពូទីនដោយថា ទាហានវ៉ាក់ណែស្នេហាជាតិ និងមិនព្រមដាក់អាវុធ ចុះចូលតាមការចង់បានរបស់លោកពូទីន។
លោកពូទីនផ្ទាល់ជាអ្នកផ្ចុងផ្តើមលោកព្រីហ្គោហ្ស៊ីនឲ្យបង្កើតទាហានស៊ីឈ្នួល ដើម្បីធ្វើការងារកខ្វក់ ខុសច្បាប់ ដូចជាធ្វើសង្រ្គាមនៅស៊ីរី លីប៊ី ឬនៅតាមបណ្តាប្រទេសអាហ្វ្រិក ជាទីដែលរុស្ស៊ីមិនអាចបញ្ជូនទ័ពទៅធ្វើអន្តរាគមស្របច្បាប់។ លោកពូទីនធ្លាប់ដឹងថា មានភាពតានតឹងរវាងមេទាហានវ៉ាក់ណែ និងថ្នាក់ដឹកនាំយោធារុស្ស៊ី ប៉ុន្តែ លោកពូទីនមិននឹកស្មានថា លោកព្រីហ្គោហ្ស៊ីន ហ៊ានព្រហើនលើកទ័ព ទៅផ្គើនលោកនៅម៉ូស្គូដែរ។
លើកនេះ លោកពូទីនមិនត្រឹមតែអាម៉ាស់មុខ នៅឆាកអន្តរជាតិ ក្នុងនាមជាមេដឹកនាំរុស្ស៊ីដែលទន់ខ្សោយមិនអាចគ្រប់គ្រងទាហានវ៉ាក់ណែដែលលោកបានបង្កើតដោយផ្ទាល់ដៃតែប៉ុណ្ណោះទេ ប៉ុន្តែ លោកអាចប្រឈមនឹងរលករិះគន់តវ៉ាក្នុងស្រុករុស្ស៊ី។ និទណ្ឌភាព របស់ក្រុមទាហានវ៉ាក់ណែ ដែលរួចផុតរាល់ការចោទប្រកាន់ ការដាក់ទោស បើទោះបីជាពួកគេ ប៉ុនប៉ងបះបោរ ប្រឆាំង មេដឹកនាំយោធារុស្ស៊ីយ៉ាងដូច្នេះ នឹងអាចជាគំរូធ្វើឲ្យអ្នកដែលមិនពេញចិត្តនឹងថ្នាក់លើដទៃទៀត អាចហ៊ានចេញមុខផ្គើនអំណាចរបស់ថ្នាក់ដឹកនាំរុស្ស៊ី នៅថ្ងៃអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ