សង្រ្គាមមិនទាន់ចប់ អ៊ុយក្រែនរំលឹកខួប១ឆ្នាំនៃការកាប់សម្លាប់រង្គាលនៅប៊ូតឆា
នៅថ្ងៃសុក្រទី ៣១មីនា ជាខួបមួយឆ្នាំគត់នៃការសម្លាប់រង្គាលរបស់ពួកទាហានរុស្ស៊ី នៅទីក្រុងប៊ូតឆា (Boutcha) នៅប្រទេសអ៊ុយក្រែន។ នៅក្នុងពិធីរំលឹកវិញ្ញាណក្ខន្ធជនរងគ្រោះ នៅទីក្រុងប៊ូតឆា កាលពីថ្ងៃសុក្រម្សិលមិញ ប្រធានាធិបតីអ៊ុយក្រែន លោកវ្លូឌីមៀរ ហ្សេឡេនស្គី ប្រកាសសន្យាប្រយុទ្ធយកឈ្នះ លើអំពើអាក្រក់របស់រុស្ស៊ី។ នៅថ្ងៃខួបមួយឆ្នាំនៃការសម្លាប់រង្គាលនៅទីក្រុងប៊ូឆានេះដែរ ឧត្តមស្នងការសិទ្ធិមនុស្សរបស់អង្គការសហប្រជាជាតិ តាំងពីទីក្រុងហ្សឺណែវបរិហារការរំលោភសិទ្ធិមនុស្សដ៏ធ្ងន់ធ្ងរ និងជាប្រចាំ នៅក្នុងសង្រ្គាមរុស្ស៊ី ឈ្លានពានអ៊ុយក្រែន រយៈពេល ១៣ខែមកនេះ។
ចុះផ្សាយនៅថ្ងៃ៖
ស្តាប់ - ០២:៤០
ប្រធានាធិបតីអ៊ុយក្រែន លោក វ្លូឌីមៀរ ហ្សេឡេនស្គី និងប្រមុខដឹកនាំរបស់ប្រទេសអឺរ៉ុបខាងកើតជាច្រើនរូបធ្វើដំណើរទៅរំលឹកវិញ្ញាណក្ខន្ធរបស់ជនរងគ្រោះ នៅថ្ងៃខួប១ឆ្នាំនៃការសម្លាប់រង្គាលនៅទីក្រុងប៊ូតឆា ដែលបានក្លាយជានិមិត្តរូបនៃការកាប់សម្លាប់ដ៏ព្រៃផ្សៃ របស់ទាហានរុស្ស៊ី។
នៅថ្ងៃខួបមួយឆ្នាំ នៃការសម្លាប់រង្គាលនៅទីក្រុងប៊ូតឆា ប្រធានាធិបតីអ៊ុយក្រែនបានសន្យាប្រយុទ្ធយកឈ្នះលើអំពើអាក្រក់របស់រុស្ស៊ី និងដាក់ទោសលើឧក្រិដ្ឋជនដែលសម្លាប់រង្គាលប្រជាជនស៊ីវិលអ៊ុយក្រែន។ អាជ្ញាធរអ៊ុយក្រែនវាយតម្លៃថា ក្នុងរយៈពេល៣៣ថ្ងៃ នៃការត្រួតត្រារបស់កងទ័ពរុស្ស៊ី ប្រជាជនស៊ីវិលច្រើនជាង ១៤០០នាក់ ត្រូវទាហានរុស្ស៊ី សម្លាប់យ៉ាងព្រៃផ្សៃ ដែលនៅក្នុងនោះ ៦៣៧នាក់ នៅក្នុងទីក្រុងប៊ូតឆាផ្ទាល់។
មួយឆ្នាំមុន នៅថ្ងៃទី៣១មីនាឆ្នាំ២០២២ កងទ័ពរុស្ស៊ីបានដកខ្លួនចេញពីទីក្រុងប៊ូតឆា ដែលជាខ្សែសមរភូមិប្រយុទ្ធដ៏ខ្លាំងក្លារបស់កងទ័ពអ៊ុយក្រែន។ ពីរថ្ងៃក្រោយរុស្ស៊ីដកទ័ពចេញពីប៊ូតឆា កងទ័ពអ៊ុយក្រែន និងអ្នកកាសែតបរទេសបានប្រទះឃើញសាកសពប្រជាជនស៊ីវិលរណូករណែលនៅតាមផ្លូវ។ ភ្លាមៗ ប្រធានាធិបតីអ៊ុយក្រែនចោទប្រកាន់កងទ័ពរុស្ស៊ីថា បានប្រព្រឹត្តអំពើ “ប្រល័យពូជសាសន៍” ខណៈអង្គការសហប្រជាជាតិ បានលើកឡើងថា វាអាចជាករណី “ឧក្រិដ្ឋកម្មសង្គ្រាម” បង្កឡើងដោយកងទ័ពរុស្ស៊ី។
ភាគីរុស្ស៊ីបានបដិសេធច្រានចោលទាំងស្រុង ថាវាជាឆាកល្ខោន រៀបចំដោយអ៊ុយក្រែន និងអាមេរិក ក្នុងហេតុផលថា កងទ័ពរុស្ស៊ីបានចាកចេញពីតំបន់ប៊ូតឆា តាំងពីថ្ងៃទី៣០មីនាប៉ុន្តែ ហេតុអ្វី ទើបតែដល់ថ្ងៃទី៣មេសា ទើបភាគីអ៊ុយក្រែនផ្សព្វផ្សាយរូបភាពទាំងនោះ។
នៅចុងខែមេសាឆ្នាំមុន រដ្ឋអាជ្ញាអ៊ុយក្រែនបានសម្រេចចោទប្រកាន់ផ្លូវការ ទាហានរុស្ស៊ី១០នាក់ នៅក្នុងកងពលតូច លេខ ៣៦ ដែលធ្លាប់មានវត្តមាន ក្នុងក្រុងប៊ូតឆា ពីបទរំលោភបំពាន យ៉ាងសាហាវព្រៃផ្សៃ ទៅលើប្រជាជនស៊ីវីលអ៊ុយក្រែនដែលផ្ទុយនឹងច្បាប់ទាហាន ដែលមានដូចជា ការធ្វើទារុណកម្ម ចងដៃ ចងជើង បិទភ្នែកនឹងក្រណាត់ នឹងបង់ស្អិត ការវាយដំ ព្រមទាំងការបាញ់គ្រាប់កាំភ្លើងបំភ័យជាដើម។ ជាងនេះទៀត ទាហានរុស្ស៊ីដែលជាប់ចោទ បានធ្វើសកម្មភាពលួចប្លន់ ប្រមូលសម្ភារៈទ្រព្យសម្បតិ្ត របស់ប្រជាពលរដ្ឋអ៊ុយក្រែន។ រដ្ឋអាជ្ញាអ៊ុយក្រែន បានបញ្ជាក់ថា អ៊ុយក្រែន នឹងចាត់វិធានការបិទប្រកាស តាមចាប់ទាហានរុស្ស៊ីជាប់ចោទទាំង១០នាក់ ដើម្បីយកមកកាត់ទោសចំពោះមុខច្បាប់។
នៅក្នុងសង្រ្គាមរុស្ស៊ីឈ្លានពានអ៊ុយក្រែន ដែលបានចូលដល់រយៈពេល ១៣ខែមកនេះ ភាគីអ៊ុយក្រែននៅបានចោទប្រកាន់ថា ក្រៅពីប៊ូតឆា ទាហានរុស្ស៊ីបានប្រព្រឹត្តអំពើប្រល័យពូជសាសន៍ ការកាប់សម្លាប់រង្គាល និងការធ្វើទារុណកម្ម នៅតាមទីក្រុងផ្សេងៗទៀត របស់អ៊ុយក្រែន ដែលធ្លាក់ក្រោមការកាន់កាប់របស់ទាហានរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ