ទីភ្នាក់ងារថាមពលអន្តរជាតិថា តម្រូវការថាមពលហ្វូស៊ីលនៅតែកើនឡើង ពីនេះដល់ឆ្នាំ២០៣០
តម្រូវការប្រើប្រាស់ថាមពល ដែលបានមកពីប្រភពហ្វូស៊ីល ដែលមានដូចជាប្រេងកាត និងឧស្ម័នជាដើម គឺនឹងនៅតែកើនឡើងជានិច្ច ពីនេះដល់ឆ្នាំ២០៣០។ នេះបើផ្អែកតាមតួលេខសន្និដ្ឋាន ក្នុងរបាយការណ៍ប្រចាំឆ្នាំរបស់ទីភ្នាក់ងារថាមពលអន្តរជាតិ AIE ដែលបានចេញផ្សាយនៅថ្ងៃអង្គារទី២៤តុលា។ ទោះជាយ៉ាងណា របាយការណ៍នេះ បានចាត់ទុកថា ការធ្វើអន្តរកម្មថាមពល ងាកចេញពីថាមពលហ្វូស៊ីល មកប្រើថាមពលបៃតង នៅទូទាំងពិភពលោកយើង កំពុងតែមានសន្ធុះល្អ បើទោះបីជាវាមិនទាន់គ្រាប់គ្រាន់ទៅតាមការរំពឹងចង់បានក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៤៦
របាយការណ៍កម្រាស់៣៥៤ទំព័រ របស់ទីភ្នាក់ងារថាមពលអន្តរជាតិ បានលើកឡើងថា រដ្ឋាភិបាល ក្រុមហ៊ុនឯកជន ព្រមទាំងអ្នកវិនិយោគ ត្រូវតែរួមគ្នាគាំទ្រ ជំរុញដល់វិស័យថាមពលបៃតង ជាជាងការរារាំងរំខាន។ ពុំនោះទេ ពិភពលោកយើងនឹងមិនអាចសម្រេចកម្មវត្ថុ ទប់ស្កាត់ការកើនឡើងកំដៅផែនដី មិនឲ្យឡើងលើស១,៥°c ដែលមានកំណត់ក្នុងកិច្ចព្រមព្រៀងទីក្រុងប៉ារីសស្តីពីអាកាសធាតុ បានឡើយ។
តែទន្ទឹមនឹងនេះ របាយការណ៍បានព្យាករណ៍ទុកថា ទំហំនៃតម្រូវការប្រើប្រាស់ប្រេងឥន្ធនៈ ឧស្ម័ន និងធ្យូងថ្ម នឹងនៅតែកើនឡើងថែមទៀត ពីនេះដល់ឆ្នាំ២០៣០។ ពោលគឺវានៅតែខ្ពស់ខ្លាំង ដែលអាចជះឥទ្ធិពលធ្វើឲ្យកម្រិតឧស្ម័នផ្ទះកញ្ចក់ នៅខ្ពស់ខ្លាំងដដែល ហើយយោងតាមទំហំនេះ គឺសីតុណ្ហភាពផែនដីយើង អាចនឹងកើនឡើង ប្រមាណ ២,៤°c ពីពេលនេះដល់ចុងសតវត្សទី២១។
ដើម្បីទប់សីតុណ្ហភាពផែនដី មិនឲ្យឡើងលើស១,៥°c ទីភ្នាក់ថាមពលអន្តរជាតិ បានអំពាវនាវថា គេត្រូវតែបង្កើនការប្រើប្រាស់រថយន្តអគ្គិសនី ឲ្យបានមួយគុណជា១០ បើប្រៀបធៀបទៅនឹងចំនួនបច្ចុប្បន្ន។ ចំណែកទំហំថាមពលកកើតឡើងវិញ ទូទាំងពិភពលោក គឺត្រូវតែបង្កើនឲ្យបាន៥០% ទល់នឹង៣០% ដែលមាននាពេលបច្ចុប្បន្ន។
តែយ៉ាងណាក៏ដោយ របាយការណ៍បានទទួលស្គាល់ថា អ្វីៗកំពុងតែល្អប្រសើរហើយ ព្រោះគេបានសង្កេតឃើញថា ទំហំនៃការវិនិយោគលើវិស័យថាមពលបៃតង បានកើនឡើងចំនួន៤០% នៅឆ្នាំ២០២២។ របាយការណ៍បានផ្តោតការសង្ឃឹមលើចិន ដែលជាទីផ្សារធំបំផុត។ ក្នុងឆ្នាំ២០២២ ទំហំនៃការលក់រថយន្តអគ្គិសនីទាំងអស់នៅទូទាំងពិភពលោក គឺទីផ្សារចិនបានស្រូបយកដល់ទៅជាង៥០%។ បន្ថែមពីនេះទីភ្នាក់ថាមពលអន្តរជាតិសង្ឃឹមថា នៅរវាងឆ្នាំ២០៣០ រថយន្តថ្មីៗលក់នៅអាមេរិក គឺនឹងមាន៥០%ជារថយន្តអគ្គិសនី។
លោកFatih Birol ប្រធានទីភ្នាក់ងារថាមពលអន្តរជាតិ បានលើកឡើងថា ដំណើរការធ្វើអន្តរកម្មថាមពលដើម្បីឈានទៅប្រើប្រាស់ថាមពលស្អាតស្អំ កំពុងតែប្រព្រឹត្តិធ្វើទៅយ៉ាងសកម្មហើយ ដោយគ្មានអ្វីអាចមកបញ្ឈប់បានទេ។ តែយ៉ាងណា លោកបានអំពាវនាវ ឲ្យគ្រប់ប្រទេសទាំងអស់ រៀបចំដាក់ចុះនូវផែនការគោលនយោបាយច្បាស់លាស់ និងម៉ឺងម៉ាត់ ដើម្បីឈានទៅបង្កើនការប្រើប្រាស់ថាមពលកកើតឡើងវិញ ជាជាងការចំណាយវិនិយោគ ទៅលើថាមពលហ្វូស៊ីល។ លោក Fatih Birol បាន លើកឡើងផងដែរថា អំណះអំណាងរបស់ក្រុមប្រទេសផលិតប្រេង ដែលថា មានតែថាមពលហ្វូស៊ីលទេ ដែលអាចធានាសន្តិសុខថាមពលដល់ពិភពលោកយើងនោះ គឺវាជាការអះអាងគ្មានមូលដ្ឋាន។
គួររំលឹកថា កាលពីដើមខែតុលានេះ ក្រុមប្រទេសផលិតប្រេង OPEP បានចេញរបាយការណ៍មួយ ដោយបានលើកឡើងថា ការឈប់វិនិយោគលើវិស័យអណ្តូងរ៉ែប្រេង និងអណ្តូងឧស្ម័នថ្មីៗ វាគឺជារឿងមិនល្អទេ ព្រោះវានឹងប៉ះពាល់ដល់សន្តិសុខថាមពល ព្រមទាំងស្ថិរភាពសេដ្ឋកិច្ចពិភពលោក។ ក្រុមប្រទេសផលិតថាមពលហ្វូលស៊ីលទាំងនេះ បានអះអាងថា មានតែប្រេងកាត និងឧស្ម័នទេ ដែលជាប្រភពថាមពល ដែលមានសុវត្ថិភាពបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ