ជម្លោះអ៊ីស្រាអែល-ហាម៉ាស៖លោកអ៊ែរដូហ្កានបរិហារការសម្លាប់រង្គាលនៅហ្កាហ្សា និងចង្អុលមុខបស្ចិមលោក
ថ្ងៃទី២៩ តុលា ២០២៣ ប្រទេសតួកគីបានប្រារព្ធខួប ១០០ឆ្នាំនៃការបង្កើតសាធារណរដ្ឋតួកគីកាលពីថ្ងៃទី២៩ តុលា ១៩២៣។ លោកមូស្តាហ្វា កឺម៉ាល់ អាតាតួកជាអ្នកបង្កើតសាធារណរដ្ឋតួកគីកាលពី ១០០ឆ្នាំមុន និងជាប្រធានាធិបតីទី១ ដែលបានកាន់អំណាចពីឆ្នាំ ១៩២៣ ដល់ឆ្នាំ ១៩៣៨។ នៅ ១០០ឆ្នាំក្រោយមក តំណែងប្រធានាធិបតីហាក់កំពុងត្រូវបានលោកអ៊ែរដូហ្កានក្តាប់ណែនក្នុងដៃតាំងពី ២០ឆ្នាំកន្លងមក។ ដោយឡែកក្នុងថ្ងៃទី២៨ តុលា លោកអ៊ែរដូហ្កានបានរៀបចំពិធីជួបជុំមួយដោយមានការចូលរួមយ៉ាងច្រើនកុះករពីក្រុមអ្នកគាំទ្រលោក។
ចុះផ្សាយនៅថ្ងៃ៖
ស្តាប់ - ០៣:២២
ពិធីជួបជុំនេះត្រូវបានលោកអ៊ែរដូហ្កានហៅជាការជួបជុំដើម្បីប្រជាជនប៉ាឡេស្ទីន។ ថ្លែងនៅចំពោះហ្វូងមនុស្សជាច្រើនរយពាន់នាក់ ប្រធានាធិបតីតួកគីបានប្រើសម្តីខ្លាំងៗ និងធ្ងន់ដាក់អ៊ីស្រាអែលដោយចោទអ៊ីស្រាអែលពីបទកំពុងសម្លាប់រង្គាលប្រជាជនប៉ាឡេស្ទីននៅក្នុងតំបន់ហ្កាហ្សា។ មនុស្សខ្លាំងតួកគីរូបនេះយល់ថា ទង្វើរបស់អ៊ីស្រាអែលលើតំបន់ហ្កាហ្សាពេលនេះជាឧក្រិដ្ឋកម្មសង្រ្គាម ពោលមិនមែនជាទង្វើការពារខ្លួនទេ។ មែនទែនទៅ លោកអ៊ែរដូហ្កានធ្លាប់បានបញ្ចេញប្រតិកម្មលើសង្រ្គាមរវាងអ៊ីស្រាអែល និងចលនាប៉ាឡេស្ទីនហាម៉ាស។ តែក្នុងរយៈពេលប៉ុន្មានថ្ងៃចុងក្រោយនេះ លោកអ៊ែរដូហ្កានបានប្រើសម្តីថ្លោស និងដំឡើងសំឡេងរឹតតែខ្លាំងដាក់អ៊ីស្រាអែល និងលើកនេះជាលើកទី១ ដែលលោកបានថ្លែងវាយប្រហារអ៊ីស្រាអែលនៅចំពោះមុខហ្វូងអ្នកគាំទ្រលោកជាច្រើនរយពាន់នាក់។
ក្រៅពីអ៊ីស្រាអែល សុន្ទរកថារបស់ប្រធានាធិបតីតួកគីក៏បានវាយប្រហារសំដៅលើបស្ចិមលោក ពិសេសសហរដ្ឋអាមេរិក និងសហភាពអឺរ៉ុបដែលបានគាំទ្រ និងលើកទឹកចិត្តឲ្យអ៊ីស្រាអែលវាយប្រហារឥតសំចៃដៃលើតំបន់ហ្កាហ្សា។ តាមលោកអ៊ែរដូហ្កាន បស្ចិមលោកជាអ្នកទទួលខុសត្រូវចម្បងនៅក្នុងការសម្លាប់រង្គាលនៅតំបន់ហ្កាហ្សា និងថា បើគ្មានការជួយជ្រោមជ្រែងពីបស្ចិមលោកទេ ម្ល៉េះអ៊ីស្រាអែលមិនហ៊ានវាយប្រហារលើតំបន់ហ្កាហ្សាក្នុងទ្រង់ទ្រាយធំដូចពេលនេះដែរ។ បន្ទាប់មក ប្រធានាធិបតីតួកគីបានចេញមុខការពារបុព្វហេតុប៉ាឡេស្ទីន និងថែមទាំងហ៊ានចាត់ទុកចលនាប៉ាឡេស្ទីនហាម៉ាសជាអ្នករំដោះដែលការពារទឹកដីប៉ាឡេស្ទីនទៀតផង។
គួរបញ្ជាក់ថា នៅពេលផ្ទុះសង្រ្គាមរវាងអ៊ីស្រាអែល និងពួកហាម៉ាសនៅប៉ុន្មានថ្ងៃដំបូង លោកអ៊ែរដូហ្កានបានបញ្ចេញប្រតិកម្មយ៉ាងប្រយ័ត្នប្រយែងដោយខ្លាចប៉ះពាល់ដល់ទំនាក់ទំនងជាមួយអ៊ីស្រាអែល។ តែលោកអ៊ែរដូហ្កានមិនអាចបន្តប្រកាន់ជំហរមួយនេះនៅចំពោះមុខកំណើន និងសន្ទុះនៃការវាយប្រហាររបស់អ៊ីស្រាអែលលើហ្កាហ្សាពេលនេះបានទៀតឡើយ។ ចំណែកអ៊ីស្រាអែលក៏បានបញ្ចេញប្រតិកម្មភ្លាមៗតបនឹងលោកអ៊ែរដូហ្កានដោយបានកោះហៅមន្រ្តីទូតរបស់ខ្លួននៅតួកគីឲ្យត្រឡប់ចូលអ៊ីស្រាអែលវិញដើម្បីសើរើពិនិត្យមើលឡើងវិញនូវទំនាក់ទំនងរវាងអ៊ីស្រាអែល និងតួកគី។ ដូច្នេះឃើញថា ផ្លូវនៃទំនាក់ទំនងរវាងតួកគី និងអ៊ីស្រាអែលដែលទើបបានត ភ្ជាប់ឡើងវិញនឹងត្រូវកាត់ផ្តាច់ជាថ្មីដោយចៀសមិនរួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ