រុស្ស៊ី៖លោកពូទីនបានជាប់ឆ្នោតអណត្តិថ្មី និងសន្យាមិនទុកឲ្យរុស្ស៊ីរងការបំភិតបំភ័យ
នៅប្រទេសរុស្ស៊ី លោកវ៉្លាឌីមៀរ ពូទីនបានជាប់ឆ្នោតប្រធានាធិបតីមួយអាណត្តិថ្មីសម្រាប់ ៦ឆ្នាំបន្ថែមទៀត។ ការជាប់ឆ្នោតអាណត្តិថ្មីរបស់លោកពូទីនអាចជាការរង់ចាំ ព្រោះជាការបោះឆ្នោតដែលគ្មានគូប្រជែងពីក្រុមគណបក្សប្រឆាំងពិតប្រាកដ។ ថ្លែងនៅក្រោយការជាប់ឆ្នោត មនុស្សខ្លាំងរុស្ស៊ីរូបនេះបានចាត់ទុកជ័យជម្នះរបស់ខ្លួនថាបានរំលេចឲ្យឃើញនូវមុខមាត់ប្រទេសរុស្ស៊ី” ឯកភាពរួមធ្លុងមួយ” និងថា លោកនឹងទុកបណ្តោយឲ្យប្រទេសទទួលរងការសម្លុតបំភ័យពីពួកសត្រូវឡើយ។
ចុះផ្សាយនៅថ្ងៃ៖
ស្តាប់ - ០៣:២៣
លោកពូទីន ចៅហ្វាយវិមានក្រេមឡាំងដែលបានកាន់អំណាចតាំងពី ២៤ ឆ្នាំទទួលបានសម្លេងគាំទ្រដល់ទៅជាង ៨៧ % នៅក្នុងការបោះឆ្នោតប្រធានាធិបតីរយៈពេល ៣ថ្ងៃ។ នេះបើតាមតួលេខផ្សាយដោយទីភ្នាក់ងារព័ត៌មានផ្លូវការរុស្ស៊ី RIA Novosti ដោយលើទិន្នន័យប្រកាសដោយគណៈកម្មាធិការជាតិរៀបចំការបោះឆ្នោត។ ៨៧% ជាអត្រាគាំទ្រកម្រិតខ្ពស់បំផុតសម្រាប់លោកពូទីននៅក្នុងការបោះឆ្នោតសកលដោយគ្មានការប្រកួតពីខាងពួកប្រឆាំង។
ថ្លែងនៅយប់ថ្ងៃទី១៧ មីនាទៅកាន់ប្រជាជនរុស្ស៊ី លោកពូទីនបានសំដែងអំណរគុណចំពោះពលរដ្ឋណាដែលបានទៅបោះឆ្នោត និងអនុញ្ញាតឲ្យបង្កលក្ខណៈនៃការឯកភាពរួមធ្លុងមួយខាងនយោបាយផ្ទៃក្នុង។ សំនៀងនេះរបស់លោកពូទីនបន្លឺឡើង ២ឆ្នាំក្រោយពីរុស្ស៊ីបានបើកការវាយលុកចូលអ៊ុយក្រែនដែលបណ្តាលឲ្យបស្ចិមលោកដាក់សម្ពាធទណ្ឌកម្មធ្ងន់ធ្ងរមិនធ្លាប់មានលើរុស្ស៊ី។
« ខ្ញុំសូមអរគុណគ្រប់គ្នា ព្រមទាំងរាល់ពលរដ្ឋនៃប្រទេសចំពោះការគាំទ្ររបស់អ្នក និងជំនឿទុកចិត្តរបស់អ្នក » នេះជាការថ្លែងរបស់លោកពូទីននៅពីមុខក្រុមយុទ្ធនាការឃោសនាបោះឆ្នោតរបស់លោក មុននឹងសន្យាថា រុស្ស៊ីនឹងស្ថិតនៅពីលើពួកសត្រូវខ្លួនទាំងអស់។ មានវ័យ ៧១ឆ្នាំ មនុស្សខ្លាំងរុស្ស៊ីរូបនេះបានបន្ថែមយ៉ាងដូច្នេះថា « ឆន្ទៈយើង សតិសម្បជញ្ញៈយើងប្រឈមជាប់ជានិច្ចទល់នឹងរាល់នរណាដែលចង់សម្លុតយើង ដែលចង់ម្ទេសចប្រទេសយើង។ ក្នុងប្រវត្តិសាស្ត្រ មិនដែលមាននរណាចេះសម្រេចកិច្ចការនេះបានដូចយើងឡើយ។ ការសម្លុតយើងមិនអាចដំណើរការទៅកើតឡើយ ទាំងបច្ចុប្បន្ន ទាំងក្នុងអនាគត »។
គួរបញ្ជាក់ថា នៅក្រោយចប់អាណត្តិថ្មីលើកនេះ លោកវ៉្លាឌីមៀរ ពូទីននឹងនៅមានលទ្ធភាពឈរឈ្មោះជាបេក្ខជនប្រធានាធិបតីរហូតដល់ឆ្នាំ ២០៣៦។ ទន្ទឹមគ្នានេះ លោកពូទីនក៏បានសំដែងគារវកិច្ចចំពោះកម្លាំងទ័ពរុស្ស៊ីដែលកំពុងច្បាំងនៅលើសមរភូមិអ៊ុយក្រែន និងដែលអាចបាត់បង់ជីវិតខ្លួនដើម្បីការពារដែនដីប្រវត្តិសាស្ត្ររបស់ប្រទេសរុស្ស៊ី។ តាមលោកពូទីន កងកម្លាំងរុស្ស៊ីដែលកំពុងរុលទៅមុខ ក្រោយពីដណ្តើមយកបានក្រុង Adiviika កាលពីពាក់កណ្តាលខែកុម្ភៈកំពុងបន្តតទល់ជាមួយកម្លាំងទ័ពអ៊ុយក្រែនដែលខ្វះទាហាន ខ្វះស្បៀង និងគ្រាប់រំសេវ។
គួរបញ្ជាក់ថានៅក្នុងការបោះឆ្នោតប្រធានាធិបតី អាជ្ញាធររុស្ស៊ីមិនបានរារាំងពួកប្រឆាំងមិនឲ្យចូលរួមទេ។ តែសុទ្ធសឹងជាពួកប្រឆាំងដែលវិមានក្រេមឡាំងជាអ្នកកំណត់ ពោលជាអ្នកដែលប្រកាន់គោលជំហរស្របនឹងបន្ទាត់របស់វិមានក្រេមឡាំង ទោះក្នុងរឿងរុស្ស៊ីវាយលុកចូលអ៊ុយក្រែន ឬក្នុងរឿងបង្ក្រាបពួកប្រឆាំងផ្ទៃក្នុងចាស់ដៃ ដូចករណីមេប្រឆាំងលោកអាឡិកសី ណាវ៉ាល់នីដែលបានបាត់បង់ជីវិតនៅក្នុងពន្ធនាគារនាពេលថ្មីៗនេះ។ តាមលោកពូទីន មរណភាពលោកណាវ៉ាល់នីជាព្រឹត្តិការណ៍ក្រៀមក្រំ និងថា លោកបានយល់ព្រមឲ្យមានការដោះដូរលោកណាវ៉ាល់នីជាមួយបស្ចិមលោក។ តែត្រូវមានលក្ខខ័ណ្ឌមួយ គឺមិនឲ្យលោកណាវ៉ាល់នីត្រឡប់មករុស្ស៊ីវិញជាដាច់ខាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ