អេស្បាញ៖តំបន់កាតាឡូញបានប្រកាសពីគម្រោងរៀបចំបោះឆ្នោតប្រជាមតិដើម្បីទាមទារឯករាជ្យ
បន្ទាប់ពីប្រជាជនអេកូសនៅក្នុងប្រទេសអង់គ្លេសមក ដល់វេនប្រជាជននៅតំបន់កាតាឡូញក្នុងប្រទេសអេស្បាញម្តងដែលបានប្រកាសឲ្យដឹងពីគម្រោងរៀបចំបោះឆ្នោតប្រជាមតិដើម្បីទាមទារឯករាជ្យផ្តាច់ចេញពីប្រទេសអេស្បាញ។ លោកអារទារ ម៉ាស ប្រមុខដឹកនំាតំបន់ស្វ័យតកាតាឡូញបានចុះហត្ថលេខាលើក្រឹត្យតំបន់មួយដោយប្រកាសឲ្យមានការរៀបចំបោះឆ្នោតប្រជាមតិមួយនៅថ្ងៃទី៩ វិច្ឆិកាខាងមុខ។ តែរដ្ឋអំណាចកណ្តាលក្នុងទីក្រុងម៉ាឌ្រីដបានព្រមានដោយសន្យាថា នឹងធ្វើអ្វីៗគ្រប់បែបយ៉ាងទំាងអស់ដើម្បីរារំាងមិនឲ្យតំបន់កាតាឡូញផ្តាច់ខ្លួនចេញពីអេស្បាញទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
បន្ទាប់ពីការទាមទារឯករាជ្យរបស់ប្រជាជនអេកូសក្នុងប្រទេសអង់គ្លេសមិនបានជោគជ័យមក ឥឡូវនេះដល់វេនប្រជាជនក្នុងតំបន់កាតាឡូញនៃប្រទេសអេស្បាញម្តងដែលចង់សាកល្បងទាមទារឯករាជ្យផ្តាច់ខ្លួនចេញពីរដ្ឋាភិបាលអេស្បាញ។ ការសាកល្បងដែលនឹងត្រូវធ្វើឡើងតាមរយៈការសុំយោបល់ពីប្រជាជនដូចនៅអេកូសប្រទេសអង់គ្លេសអ៊ីចឹង។ អ្នកដែលបានផ្តួចផ្តើមឲ្យមានគំនិតនេះឡើងគឺលោកប្រធានរដ្ឋអំណាចតំបន់កាតាឡូញ អារទារ ម៉ាស។ លោកអារទារដែលទើបបានចុះហត្ថលេខាលើក្រឹត្យតំបន់មួយដោយកំណត់យកថ្ងៃទី៩ វិច្ឆិកា ជាថ្ងៃបោះឆ្នោតប្រជាមតិ។ អ្វីដែលលោកអារទារបានធ្វើនៅពេលនេះត្រូវបានគេចាត់ទុកជារឿងប្រវត្តិសាស្រ្តមួយ។ រឿងប្រវត្តិសាស្រ្ត ព្រោះនេះជាលើកទីមួយបង្អស់នៅក្នុងប្រទេសអេស្បាញតំាងពីជំនាន់ហ្រ្វង់កូដែលមានប្រធានតំបន់ស្វ័យតម្នាក់បានប្រកាសរៀបចំបោះឆ្នោតប្រជាមតិជាផ្លូវការដើម្បីចង់ដឹងថា តើប្រជាជនចង់ ឬមិនចង់រស់នៅផ្តាច់ខ្លួនចេញពីការគ្រប់គ្រងរបស់ប្រទេសអេស្បាញ។
គំនិតផ្តួចផ្តើមរបស់លោកអារទារពេលនេះបានទទួលការគំាទ្រពីសមាជិកសភា ៥នាក់ក្នុងចំណោម ៧នាក់ចេញមកគណបក្សកាតាឡូញ និងសមាជិកសភាទូទៅក្នុងតំបន់ប្រមាណជា ៣ភាគ៤។ តែបញ្ហានៅត្រង់ថា គម្រោងរៀបចំបោះឆ្នោតប្រជាមតិរបស់លោកអារទារប្រហែលជាមិនទៅរួច ព្រោះក្រោមភ្នែក ច្រមុះរបស់ទីក្រុងម៉ាឌ្រីដ គម្រោងរបស់លោកអារទារបានរំលោភទំាងស្រុងនឹងច្បាប់រដ្ឋធម្មនុញ្ញរបស់អេស្បាញ និងថា រដ្ឋាភិបាលនឹងដាក់ពាក្យប្តឹងទៅតុលាការធម្មនុញ្ញដើម្បីរារំាងមិនឲ្យមានការបោះឆ្នោតប្រជាមតិនោះ។ បច្ចុប្បន្នមានប្រជាជនរស់នៅសរុបជាង ៧លាន ៥សែននាក់ កាតាឡូញជាតំបន់ស្វ័យតមួយដែលបានផ្តល់ប្រភពចំណូលឲ្យអេស្បាញដល់ទៅ ២០%។
ពិតណាស់ថា អ្វីដែលលោកអារទារកំពុងធ្វើពេលនេះជារឿងមួយដែលលោកគិតថាស្របច្បាប់ តែគេពិបាកនឹងមើលឃើញច្រកចេញចំពោះរឿងនេះ។ លោកនាយករដ្ឋមន្រ្តីអេស្បាញដែលកំពុងធ្វើដំណើរទៅចិនបានបញ្ជាក់ថា ពួកអ្នកជាតិនិយមនៅកាតាឡូញកំពុងយកក ទៅ ល អន្ទាក់ខ្លួនឯងហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ