ការប្រឆាំងរបបរាជានិយមនៅប្រទេសអេស្ប៉ាញ
កាលពីថ្ងៃសៅរ៍ទី ៧មិថុនា ម្សិលមិញនេះ នៅប្រទេសអេស្ប៉ាញ មានមនុស្សជាច្រើនពាន់នាក់ បានចេញដើរតាមផ្លូវទាមទារឲ្យរំលាយរបបរាជានិយម ឲ្យដាក់ត្រលប់មកវិញនូវរបបសាធារណរដ្ឋ។ ការងើបឡើងនៃការប្រឆាំងរបបរាជានិយមនេះ បានផុសផុលឡើងបន្ទាប់ពី ព្រះមហាក្សត្រអេស្ប៉ាញ យ៉្ហន កាកឡូស បានដាក់រាជសម្បត្តិនៅថ្ងៃទី២ មិថុនា ថ្មីៗនេះ។ ក្នុងពេលនេះដែរ ព្រះមហាក្សត្រថ្មីកំពុងត្រៀមខ្លួនឡើងគ្រងរាជសម្បត្តិ គឺព្រះអង្គម្ចាស់ ហ្វេលីព។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
មានមនុស្សកកកុញ ណែនណាន់តាន់តាប់ បានមកជួបជុំគ្នានៅទីលានសាធារណៈមួយ នៅទៅក្រុង ម៉ាឌ្រីដ រាជធានីនៃប្រទេសអេស្ប៉ាញ។ ស្ថិតក្រោមបរិយាកាសសប្បាយរីករាយមែនពិត ប៉ុន្តែពួកគេម្នាក់ៗ ពោរពេញទៅដោយក្តីកើតទុក្ខមិនសុខចិត្ត ដោយពួកគេយល់ថាអេស្ប៉ាញល្មមផ្លាស់ប្តូររបបគ្រប់គ្រង ពីរបបរាជានិយមទៅជារបបសាធារណរដ្ឋវិញ។ សម្តីស្ត្រីវ័យកណ្តាលម្នាក់បាននិយាយថា៖ បើព្រះមហាក្សត្រដាក់រាជសម្បត្តិទៅហើយ គេត្រូវសួរប្រជាពលរដ្ឋទាំងអស់ថាតើ គួរបន្តរបបរាជានិយម តទៅទៀតរឺយ៉ាងណា មុននឹងតែងតាំងព្រះមហាក្សត្រថ្មី។ គាត់បន្តថា គាត់សុំឲ្យមានការធ្វើប្រជាមតិទូទាំងប្រទេស។ បើសិនជាប្រជាពលរដ្ឋអេស្ប៉ាញភាគច្រើនពេញចិត្តឲ្យមានស្តេចតទៅទៀត នោះចាំព្រះមហាក្សត្រថ្មីឡើងគ្រងរាជ តែបើប្រជាជនមិនចង់បាន នោះអេស្ប៉ាញគ្មានរបបស្តេចតទៅទៀតទេ។
“វាជវង្សស្តេច បួកបុង ត្រូវតែស្ថិតនៅក្រោមអំណាចនៃការបោះឆ្នោត” នេះគឺឃ្លាមួយដែលសរសេរនៅលើបដារបស់ពួកអ្នកមកតវ៉ា។ បាតុករម្នាក់ដែលជាគ្រូបង្រៀន បាននិយាយថា ខ្លួនគាត់គឺជាអ្នកសាធារណរដ្ឋ ហើយគាត់នៅចាំយ៉ាងច្បាស់ ថា ព្រះមហាក្សត្រដែលទើបតែដាក់រាជសម្បត្តិទៅនេះ គឺត្រូវបានលើកបន្តុបដោយ មេដឹកនាំផ្តាច់ការឈ្មោះ ហ្រ្វង់កូ។ គាត់យល់ថា ប្រជាជនត្រូវតែជាអ្នកសម្រេច ថាតើត្រូវមានស្តេច រឺគ្មាន ហើយបើមាន គឺប្រជាជនជាអ្នកជ្រើសរើសថាស្តេចមួយណា ត្រូវឡើងគ្រងរាជ្យ។
គួរបញ្ជាក់ផងដែរថា អេស្ប៉ាញជាប្រទេសដែលមានការអនុវត្តន៍លទ្ធិប្រជាធិបតេយ្យពេញលេញ ហើយក្រុមបាតុករនេះ ទាមទារចង់ឲ្យរាជបាល័ង្គ ស្ថិតក្រោមការសម្រេចចិត្តរបស់ប្រជាជនទាំងមូល មិនមែនថាអស់ពីក្សត្រមួយ ត្រូវតែរកក្សត្រមួយទៀតមកបន្តនោះទេ។ តែទោះជាយ៉ាងណាក៏ដោយ គ្រប់ៗគ្នាដឹងយ៉ាងច្បាស់ថា ទំនងជាគ្មានអ្វីអាចនឹងរាំងស្ទះដល់ការឡើងគ្រងរាជ្យរបស់ព្រះមហាក្សត្រថ្មី គឺព្រះអង្គម្ចាស់ ហ្វេលីព បាននោះទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ