ចិនមានសមត្ថភាពអវកាសពិតៗ
បេសកកម្មបង្ហោះយានអវកាស មានមនុស្សជិះទៅក្នុងគន្លងតារាវិថីរបស់ចិន បានបញ្ចប់ប្រកបដោយជោគជ័យ នៅថ្ងៃសុក្រទី ២៩មិថុនាឆ្នាំ២០១២នេះ។ អវកាសយានិកទាំងបីនាក់ ក្នុងនោះមានម្នាក់ភេទស្រី ដែលបានវិលមកដល់ភពផែនដីវិញប្រកបដោយសុវត្ថិភាព បានក្លាយជាវីរបុរស ជាមោទនភាពរបស់ចិនទាំងមូល ក្នុងការពង្រឹងពង្រីងមហិច្ឆតាអវកាស ឈានឆ្ពោះដល់ការសម្រេចគម្រោងសាងសង់ស្ថានីយ៍អវកាសមួយ នៅឆ្នាំ ២០២០ ដូចស្ថានីយ៍អវកាសអន្តរជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
កាំជ្រួចដឹកអវកាសយានិក Jing Haipeng - Liu Wang - Liu Yang បានត្រឡប់មកចុះចតលើផែនដីហើយ នៅខេត្តម៉ុងហ្គោលីក្នុង នៅថ្ងៃសុក្រនេះ បន្ទាប់ពីបានបំពេញបេសកម្មក្នុងលំហអវកាស អស់រយៈពេល១៣ថ្ងៃ។ រយៈពេលដ៏វែងបំផុត លើកទីមួយ សម្រាប់អវកាសយានិកចិន។
ដើរចេញម្តងមួយៗ ពីកាំជ្រួច ក្នុងទឹកមុខស្រស់ស្រាយ ញញឹមទៅកាន់ម៉ាស៊ីនថតរាប់សិប អវកាសយានិកចិនទាំងបី បានបញ្ជាក់យ៉ាងច្បាស់ពីសមត្ថភាព និងលទ្ធភាពរបស់ចិនក្នុងវិស័យអវកាស។ បេសកម្មលើកនេះបានជោគជ័យ មានន័យថាចិនកំពុងឈានឆ្ពោះទៅរកភាពរុងរឿងថ្នាក់កំពូលនៅលើពិភពលោកផ្នែកវិទ្យាសាស្ត្រនិងបច្ចេកវិទ្យា។ នេះជាសារកោតសរសើររបស់ស្ថាប័នអំណាចកំពូលចិន (គណៈកម្មការមជ្ឈិមបក្សកុម្មុយនិស្ត គណៈកម្មការយោធា និងរដ្ឋាភិបាលចិន)។
សូមបញ្ជាក់ថា កាលពីថ្ងៃទី១៨មិថុនា ចិនបានបង្ហោះយានអវកាស មានមនុស្សជិះ សេនជូ-៩ ដើម្បីតភ្ជាប់ទៅនឹងស្ថានីយ៍រណប ធានកុង-១ នៅក្នុងលំហអវកាស។ បេសកម្មដ៏មានមហិច្ឆតា និងប្រើបច្ចេកវិទ្យាខ្ពស់បំផុតក្នុងប្រវត្តិអវកាសចិន ព្រមទាំងមានអវកាសយានិកនារីជាលើកដំបូងផងនេះ បានសម្រេចជោគជ័យទាំងដោយការបញ្ជាបែបស្វ័យប្រវត្តិ និងតាមការបញ្ជាដោយដៃ គឺជាមោទនភាពជាតិដ៏ធំធេង ព្រោះចិនមានការយឺតយាវខ្លាំងក្នុងវិស័យនេះ។
សម្រាប់អ្នកឯកទេសបារាំង និងអាមេរិក ចិនពេលនេះមានសមត្ថភាពគ្រប់គ្រាន់ និងកំពុងផ្តើមរត់ប្រណាំងជាមួយរុស្ស៊ី អាមេរិក។ ទន្ទឹមគ្នានេះ ចិនក៏មានផែនការ ចង់ឡើងដល់ឋានព្រះចន្ទ មុនគេបង្អស់ នៅអាស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ