កាំជ្រួចជប៉ុន Epsilon បំពេញបេសកកម្មទី១ យ៉ាងជោគជ័យ
នៅថ្ងៃសៅរ៍នេះ ជប៉ុនបានសំរេចជោគជ័យជាលើកទីមួយ ក្នុងការបញ្ចេញផ្កាយរណប ទៅក្នុងតារាវិថី ដោយមានជំនួយពីកាំជ្រួច អេបស៊ីឡុង។ ផ្កាយរណបនេះនឹងធ្វើការសិក្សាបរិដ្ឋានផ្កាយព្រះគ្រោះក្នុងគន្លងព្រះអាទិត្យ។ ប្រជាជនជប៉ុនទន្ទឹងរង់ចាំការបាញ់កាំជ្រួចបញ្ចូនផ្កាយរណបនេះទៅក្នុងលំហអាកាស ជាយូរណាស់មកហើយ ពិសេសនៅពេលដែលកូរ៉េខាងត្បូង និងចិន ក៏កំពុងបង្ហាញមហិច្ឆតាផ្នែកអវកាសរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៤
នៅថ្ងៃសៅរ៍នេះ កាំជ្រួចជប៉ុន Epsilon កម្ពស់២៤ម៉ែត្រ និងមានទំងន់៩១តោន បានចាកចេញ ពីមូលដ្ឋាន អ៊ូឈីនូរ៉ា ភាគខាងត្បូងប្រទេសជប៉ុន ដើម្បីបញ្ជូនផ្កាយរណបឈ្មោះថា SPRINT-A ទៅក្នុងលំហអាកាស។ មួយម៉ោងក្រោយពេលកាំជ្រួចអេបស៊ីឡុងត្រូវបានបាញ់បង្ហោះ ទៅលំហអាកាសនោះ ផ្កាយរណបក៏បានផ្តាច់ខ្លួនចេញពីកាំជ្រួចនេះ ធ្វើអោយបេសកកម្មជប៉ុនទទួលបានជោគជ័យ ។
នៅចំពោះមុខមហិច្ឆតាអវកាសរបស់ប្រទេសជិតខាងដូចជា ចិន និងកូរ៉េខាងត្បូងនោះ ជោគជ័យបេសកកម្មកាំជ្រួចអេបស៊ីឡុង គឺជាអ្វីដែលជនជាតិជប៉ុនរង់ចាំយូរមកហើយ។ ជប៉ុនធ្លាប់បានលើកពេលបេសកកម្មនេះ ពីរដងរួចហើយ ដោយសារតែបញ្ហាបច្ចេកទេស។ ការសាកល្បងបរាជ័យចុងក្រោយគេ គឺបានធ្វើឡើងកាលពីថ្ងៃ២៧សីហាកន្លងទៅ។ កាលណោះ ជប៉ុនបានសំរេចផ្អាកបាញ់បង្ហោះកាំជ្រួច ដោយសារតែបានរកឃើញភាពមិនប្រក្រតីមួយ នៅត្រឹមតែ១៩វិនាទីប៉ុណ្ណោះ មុនការបាញ់នេះ។
កាំជ្រួច Epsilon នេះ មានទំហំតូច មិនត្រូវការមនុស្ស និងការរៀបចំច្រើនឡើយ ដើម្បីដំណើរការវា។ ដូច្នេះ ជប៉ុនមិនបានចំណាយលុយកាក់ច្រើនក្នុងបេសកម្មថ្ងៃសៅរ៍នេះទេ។ ជប៉ុននៅមានកាំជ្រួចពីរផ្សេងទៀត សំរាប់ដំណើរការពាណិជ្ជកម្ម និងកិច្ចការរដ្ឋាភិបាល។
ដោយឡែក ផ្កាយរណប SPRINT-A ដែលបង្ហោះចេញទៅក្នុងលំហអាកាសនៅថ្ងៃសៅរ៍នេះ ជាផ្កាយរណបអវកាសទី១របស់ជប៉ុន។ វានឹងទៅសិក្សាបរិដ្ឋានផ្កាយព្រះគ្រោះចំនួន៣ ក្នុងគន្លងព្រះអាទិត្យ គឺភពវេនុស ភពម៉ាស និងភពហ្ស៊ុយពីទែរ ដែលមានចំងាយប្រមាណ៩៥០ ទៅ១១៥០គីឡូម៉ែត្រ ពីគន្លងផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ