ឥណ្ឌានឹងមានប្រព័ន្ធផ្កាយរណបបង្ហាញផ្លូវGPS ផ្ទាល់ខ្លួននៅឆ្នាំ២០១៥
បន្ទាប់ពីប្រទេសចិន ឥលូវដល់វេនឥណ្ឌាម្តងដែលមានប្រព័ន្ធបង្ហាញផ្លូវដោយផ្កាយរណបជារបស់ខ្លួនផ្ទាល់។ ផ្កាយរណបទីមួយបានបង្ហោះចេញ ទៅក្នុងតារាវិថី នៅថ្ងៃនេះ ប្រកបដោយជោគជ័យ ហើយក្នុងអំឡុងពេលពីរឆ្នាំទៀតប៉ុណ្ណោះ ប្រព័ន្ធGPS ឥណ្ឌានឹងអាចផ្តើមធ្វើប្រតិបត្តិការបានយ៉ាងពេញលេញ។
ចុះផ្សាយនៅថ្ងៃ៖
ស្តាប់ - ០១:៥១
GPS ប្រព័ន្ធបង្ហាញផ្លូវដោយផ្កាយរណបរបស់ឥណ្ឌា (IRNSS) ដែល មានលក្ខណៈស្រដៀងនឹងប្រព័ន្ធGPS របស់អាមេរិក នឹងអាចដំណើរការនាំផ្លូវ សំរាប់បំរើបំរាស់ជាលក្ខណៈស៊ីវិលផង និងយោធាផង។ ដើម្បីឱ្យប្រព័ន្ធបង្ហាញផ្លូវអាចធ្វើប្រតិបត្តិការទៅរួច ផ្កាយរណបទីមួយត្រូវបានបង្ហោះចេញទៅកាន់តារាវិថី នៅយប់មិញ ពីស្ថានីយ៍អវកាសក្នុងរដ្ឋ Andhra Pradesh។ ផ្កាយរណប៦ទៀត នឹងត្រូវបង្ហោះចេញពី នៅរៀងរាល់៦ខែ ក្នុងអំឡុងពេលពី៣០ទៅ៣៦ខែ។ ពោលគឺនៅឆ្នាំ២០១៥ ប្រព័ន្ធ GPSឥណ្ឌានឹងអាចដំណើរការបានយ៉ាងពេញលេញ។
ប្រព័ន្ធGPSឥណ្ឌានេះ អាចផ្តល់ព័ត៌មាននិងសេវាបង្ហាញផ្លូវក្នុងពេញផ្ទៃប្រទេស ទាំងមូលផង និងក្នុងរង្វង់រហូតដល់១៥០០គម ក្រៅព្រំដែន។ មិនតែប៉ុណ្ណោះ ប្រព័ន្ធ GPSឥណ្ឌានេះ នឹងមានសេវាពាណិជ្ជកម្ម ផ្តល់ព័ត៌មានទាក់ទងនឹងគ្រោះធម្មជាតិ ព្រមទាំងអាចជួយក្រុមយោធាជើងទឹក និងជើងអាកាសក្នុងការធ្វើបំលាស់ទីផង។
សូមបញ្ជាក់ថាឥណ្ឌាបង្ហោះផ្កាយរណបទីមួយរបស់ខ្លួននេះ តែប៉ុន្មានខែក្រោយការបង្ហោះប្រព័ន្ធ GPSចិន ដែលមានឈ្មោះថា Beidou។ តាមការពិត ឥណ្ឌាបង្កើតកម្មវិធីអវកាសនេះ ដើម្បីជាមោទនភាពជាតិ និងរត់តាមប្រទេសជិតខាងដូចយ៉ាងចិន ប៉ុន្តែកំពុងធ្វើឱ្យមានការប្រទាញប្រទង់យ៉ាងខ្លាំង ព្រោះតែត្រូវចំណាយខ្ពស់ ឯប្រទេសកំពុងស្ថិតក្នុងបរិបទកំណើនសេដ្ឋកិច្ចបន្ថយល្បឿន មិនអាចប្រយុទ្ធឈ្នះនឹងភាពក្រីក្រ និងភាពអត់ឃ្លាន ប្រកបដោយប្រសិទ្ធិភាព។ បើតាមអាជ្ញាធរឥណ្ឌា កម្មវិធីបង្កើតប្រព័ន្ធ GPSនេះ តំណាងឱ្យប្រមាណ១៨៣លានអឺរ៉ូ។
ប្រព័ន្ធ GPSចិន ដែលផ្តល់សេវាសំរាប់តំបន់អាស៊ី តាំងពីខែធ្នូឆ្នាំ២០១២មក មានផ្កាយរណបសរុបចំនួន១៦ ហើយចិនគ្រោងនឹងបង្ហោះផ្កាយរណបបន្ថែមទៀតឱ្យបានគ្រប់៣០ ដើម្បីធានាសេវាបានទូទាំងពិភពលោក នៅឆ្នាំ២០២០។ ប្រទេសជិតខាងជាគូប្រជែងប៉ាគីស្ថាន ក្លាយជាប្រទេសទី៥ដែលជ្រើសរើសប្រើប្រាស់ប្រព័ន្ធ GPSចិន ។ នេះបើតាមChina Daily កាលពីខែឧសភា កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ