លោកកូហ្វីអាណានទាមទារឲ្យមានការឈប់បាញ់គ្នា
បេសកជនពិសេសនៃអង្គការសហប្រជាជាតិនិងសម្ព័ន្ធអារ៉ាប់ លោកកូហ្វីអាណានដែលជាអ្នករៀបចំផែនការសម្រាប់ដោះស្រាយវិបត្តិនៅស៊ីរី បានថ្លែងទាមទារនៅថ្ងៃអង្គារទី៣មិថុនាឆ្នាំ២០១២ម្សិលមិញ ឲ្យមាន “ការឈប់បាញ់គ្នា”នៅក្នុងប្រទេសស៊ីរី ដើម្បីឈានទៅរកនយោបាយអន្តរកាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៥៦
មូលហេតុដែលនាំឲ្យបេសកជនពិសេសនៃអង្គការសហប្រជាជាតិនិងសម្ព័ន្ធអារ៉ាប់ លោកកូហ្វីអាណាន ថ្លែងទាមទារឲ្យមាន “ការឈប់បាញ់គ្នា”នៅក្នុងប្រទេសស៊ីរីនៅថ្ងៃអង្គារទី៣មិថុនាឆ្នាំ២០១២ម្សិលមិញ គឺបណ្តាលមកពី “ការឈប់បាញ់គ្នា” ដែលត្រូវចូលជាធរមានតាំងពីថ្ងៃទី១២មេសាឆ្នាំ២០១២ម៉្លេះ បានត្រូវគេរំលោភគ្មានស្រាកស្រាន្ត។ មនុស្សស្លាប់រាប់សិបនាក់ក្នុងមួយថ្ងៃៗ ក្រោមការវាយបង្ក្រាបយ៉ាងហិង្សាពីសំណាក់ទាហានរបស់បាស្ហារអាល-អាស្សាដ ហើយនិងការវាយប្រហារគ្នារវាងទាហានស៊ីរីនិងក្រុមអ្នកបះបោរប្រឆាំង។
ពាក់ព័ន្ធនឹងវិបត្តិនៅប្រទេសស៊ីរីនេះ ក្រោយពីអ្នកនាំពាក្យរបស់កូហ្វីអាណាន លោក Ahmad Fawzi បានថ្លែងថា ជំនួបអន្តរជាតិនៅទីក្រុងហ្សឺណែវនៅពេលថ្មីៗកន្លងទៅនេះ ស្ដីពីគោលការណ៍នៃការរិះរកដំណោះស្រាយតាមរយៈនយោបាយអន្តរកាលនៅប្រទេសស៊ីរី បានបណ្តាលឲ្យមាន “ការប្តូរប្រែឥរិយាបថ” ពីសំណាក់ប្រទេសរុស្ស៊ីនិងប្រទេសចិន។ ទាំងនេះបាននាំឲ្យរដ្ឋមន្ត្រីក្រសួងការបរទេសរុស្ស៊ី ស៊ែរហ្គេយ ឡាវរ៉ូវ ថ្លែងចោទប្រទេសលោកខាងលិចថា ប្រទេសបស្ចិមលោកកំពុងរិះរក “ធ្វើការប្តូរប្រែធាតុពិត” នៃកិច្ចព្រមព្រៀងដែលសម្រេចបាននៅថ្ងៃសៅរ៍ទី៣០មិថុនាឆ្នាំ២០១២នៅទីក្រុងហ្សឺណែវ។ កិច្ចព្រមព្រៀងនៃទីក្រុងហ្សឺណែវដែលគ្រោងបង្កើតឲ្យមាន “រដ្ឋាភិបាលអន្តរកាល” មួយ ដោយមានការចូលរួមពីសំណាក់សមាជិកនៃរដ្ឋាភិបាលស៊ីរីបច្ចុប្បន្ននិងក្រុមបក្សប្រឆាំង។
គួរបញ្ជាក់ថា កិច្ចព្រមព្រៀងនៃទីក្រុងហ្សឺណែវនេះ សម្រេចបានដោយមានការចូលរួមពីសំណាក់ក្រុមប្រទេសមានសកម្មភាពដើម្បីប្រទេសស៊ីរី Groupe d’action sur la Syrie ដែលក្នុងនោះមានប្រទេសមហាអំណាចទាំងប្រាំនៃក្រុមប្រឹក្សាសន្តិសុខនៃអ.ស.ប. ប្រទេសទួរគី ហើយនិងប្រទេសអារ៉ាប់មួយចំនួន។
សម្រាប់ប្រទេសរុស្ស៊ី អ្វីៗមានការជាក់ច្បាស់ណាស់ ដោយហេតុថានៅក្នុងកិច្ចព្រមព្រៀង គេពុំបានចែងអំពីការទាមទារឲ្យប្រធានាធិបតីបាស្ហារអាល-អាស្សាដចុះចេញពីមុខតំណែងឡើយ។ បញ្ហាចាកចេញពីមុខតំណែងរបស់ បាស្ហារអាល-អាស្សាដ គឺប្រជាជនស៊ីរីជាអ្នកសម្រេច។
ដូច្នេះ ប្រទេសរុស្ស៊ីពុំបានប្តូរប្រែនយោបាយរបស់ខ្លួនឡើយ ពាក់ព័ន្ធនឹងរបបគ្រប់គ្រងនៃទីក្រុងដាម៉ាស។ ទីក្រុងម៉ូស្គូនៅតែជឿជាក់ថា ភាគីពាក់ព័ន្ធនឹងវិបត្តិនៅស៊ីរីនៅអាចធ្វើការចរចានឹងគ្នា។ ហើយរដ្ឋមន្ត្រីក្រសួងការបរទេសរុស្ស៊ី ស៊ែរហ្គេយ ឡាវរ៉ូវ បានថ្លែងឲ្យដឹងទៀតថា លោកនឹងពុំមកចូលរួមក្នុងជំនួបប្រជុំរបស់ក្រុមប្រទេសមិត្តរបស់ស៊ីរីនៅទីក្រុងប៉ារីសនៅថ្ងៃសុក្រខាងមុខនេះឡើយ ដោយលោកយល់ថា អភិក្រមនៃកិច្ចព្រមព្រៀងនៃទីក្រុងហ្សឺណែវបានចាប់ដំណើរការហើយ ដូច្នេះរចនាសម្ព័ន្ធទាំងនេះគ្មានផលប្រយោជន៍អ្វីឡើយ។ នេះជាការគូបញ្ជាក់របស់លោកប្រមុខការទូតរុស្ស៊ី ស៊ែរហ្គេយ ឡាវរ៉ូវ ។
ចលនាប្រឆាំងស៊ីរីបានប្រមូលប្រជុំគ្នានៅទីក្រុងគែរ ហើយបានថ្លែងទាមទារឲ្យប្រធានាធិបតីស៊ីរីបច្ចុប្បន្ន បាស្ហារអាល-អាស្សាដ ចុះចេញពីតំណែង ហើយក្រុមបក្សប្រឆាំងស៊ីរីក៏គ្មានឯកភាពនឹងគ្នាដែរ ដោយពួកគេមានការខ្វែងគំនិតនឹងគ្នាពាក់ព័ន្ធនឹងបញ្ហាអន្តរាគមន៍យោធាបរទេសនៅក្នុងប្រទេសស៊ីរី។
ពីរថ្ងៃក្រោយការចរចាគ្នា ក្រុមបក្សប្រឆាំងស៊ីរីទាំងអស់បានមូលមតិជាឯកច្ឆ័ន្ទថា “ដំណោះស្រាយនយោបាយដំបូងគេបំផុតនៅប្រទេសស៊ីរីគឺការចាប់ផ្តើមដោយការចុះចេញនៃរបបគ្រប់គ្រងរបស់បាស្ហារអាល-អាស្សាដ”។ នេះជាសេចក្តីថ្លែងប្រកាសដែលបានផ្សព្វផ្សាយឲ្យដឹងក្រោយពីកិច្ចប្រជុំនៃក្រុមបក្សប្រឆាំងស៊ីរី។
ដូច្នេះ សម្រាប់ក្រុមបក្សប្រឆាំងស៊ីរីនៅពេលនេះគឺបន្តពង្រឹងឯកភាពនៃកម្លាំងបដិវត្តន៍ស៊ីរី ជាពិសេស កងកម្លាំងយោធាស៊ីរីសេរី។
សម្រាប់ទីក្រុងវ៉ាស៊ីនតោន ផែនការនេះគឺជា “ការធានាយ៉ាងមុតមាំ” ដល់ក្រុមបក្សប្រឆាំងស៊ីរីថា ប្រធានាធិបតីស៊ីរីបច្ចុប្បន្នបាស្ហារអាល-អាស្សាដនឹងពុំចូលរួមក្នុងរដ្ឋាភិបាលថ្មីដែលនឹងត្រូវបង្កើតឡើងនាពេលអនាគតខាងមុខនេះឡើយ។ នេះជាលក្ខខណ្ឌដែលបានដាក់ដោយក្រុមបក្សប្រឆាំងស៊ីរី មុននឹងមានដំណោះស្រាយរដ្ឋាភិបាលអន្តរកាល។
ហេតុដូច្នេះហើយបានជារដ្ឋមន្ត្រីក្រសួងការបរទេសអាមេរិក ហ៊ីលឡារីគ្លីនតុន ថ្លែងថា “វាជាការជាក់ច្បាស់ណាស់ដែលកិច្ចព្រមព្រៀងនៃទីក្រុងហ្សឺណែវបើកផ្លូវឲ្យមានសករាជថ្មីក្រោយសម័យបាស្ហារអាល-អាស្សាដ”។
រីឯប្រធានាធិបតីបារាំង លោកហ្វ្រង់ស័រហូឡង់វិញបានថ្លែងថា “លោកគាំទ្រការបង្កើតឲ្យមានអង្គការមួយដែលមានអំណាចប្រតិបត្តិពេញលេញ ហើយមានការគាំទ្រពីសំណាក់ក្រុមបក្សប្រឆាំងស៊ីរី”។
មុននឹងបញ្ចប់សូមបញ្ជាក់ថា ទីក្រុងម៉ូស្គូពុំបានដូរប្រែឥរិយាបថរបស់ខ្លួនប៉ុន្មានឡើយ ជាក់ស្ដែងប្រទេសរុស្ស៊ីនឹងពុំមកចូលរួមឡើយ កិច្ចប្រជុំនៃក្រុមប្រទេសមិត្តរបស់ស៊ីរីនៅទីក្រុងប៉ារីសនៅថ្ងៃសុក្រខាងមុខនេះ ផ្ទុយទៅវិញនឹងមានវត្តមានរបស់រដ្ឋមន្ត្រីក្រសួងការបរទេសលោកស្រីអាមេរិក ហ៊ីលឡារីគ្លីនតុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ