ទីក្រុងម៉ានីលប្រទេសហ្វីលីពីននៅលិចទឹកនៅឡើយ
ភ្លៀងរដូវមូសុង នៅតែបន្តធ្លាក់ខ្លាំងជោគជាំ នៅថ្ងៃពុធនេះ នៅហ្វីលីពីន ធ្វើអោយទីក្រុងម៉ានីលនៅតែបន្តរងការលិចទឹក។ ប្រជាជនប្រមាណបីសែននាក់ នៅមិនទាន់អាចវិលត្រលប់ទៅផ្ទះវិញបាននៅឡើយទេ។ យោងតាមអាជ្ញាធរ មានមនុស្សយ៉ាងហោចណាស់ ៨នាក់ បានស្លាប់បាត់បង់ជីវិត ហើយចំនួននេះអាចនឹងកើនឡើងថែមទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២២
អស់រយៈពេលបីថ្ងៃមកហើយ ដែលភ្លៀងរដូវមូសុង បានបន្តធ្លាក់ជោគជាំ នៅទីក្រុងម៉ានីល និងនៅទីកន្លែងជាច្រើនទៀតនៃប្រជុំកោះLuzon។ នៅថ្ងៃពុធនេះ ទីក្រុងម៉ានីលមួយភាគបី នៅបន្តរងការលិចទឹកនៅឡើយ។ តំបន់ដែលរងការប៉ះពាល់ខ្លាំងជាងគេ គឺតំបន់ឆ្នេរ កាវីត នៅជាង២០គីឡូម៉ែត្រពីក្រុងម៉ានីល។ មនុស្សបីសែននាក់ នៅមិនទាន់អាចត្រលប់ទៅផ្ទះពួកគេវិញបាននៅឡើយទេ។ ពួកគេបាននាំគ្នាទៅជ្រកកោន នៅតាមផ្ទះបងប្អូន មិត្តភក្តិ និងនៅតាមកន្លែងនានាដែលទទួលជនភៀសខ្លួនដោយសារភ្លៀងមូសុងនេះ។ សាលារៀន និងស្ថាប័នរដ្ឋ បានបិទទ្វារតាំងពីថ្ងៃចន្ទមកម្ល៉េះ។
យោងតាមកាកបាទក្រហមហ្វីលីពីន បញ្ហាដែលចោទឡើងនៅពេលនេះ គឺការខ្វះអាហារនិងទឹកប្រើប្រាស់។ រដ្ឋាភិបាលបានចែកចាយអាហារនិងគ្រឿងតំរូវការចាំបាច់ជាច្រើនដល់ជនភៀសខ្លួនដែរ ប៉ុន្តែនៅមិនទាន់គ្រប់គ្រាន់នោះទេ។
ភ្លៀងរដូវមូសុងដែលធ្លាក់ជោគជាំនៅហ្វីលីពីននេះ បង្កឡើងដោយសារតែការជួបគ្នារវាងខ្យល់រដូវមូសុង និងព្យុះត្រូពិចឈ្មោះថាត្រាមី ថ្វីបើព្យុះនេះស្ថិតនៅចំងាយដល់ទៅ៥០០គីឡូម៉ែត្រពីហ្វីលីពីនក៏ដោយចុះ។ ជារៀងរាល់ឆ្នាំ ព្យុះភ្លៀងប្រមាណជាង២០ តែងតែវាយប្រហារប្រទេសមួយនេះ ធ្វើអោយមានមនុស្សស្លាប់ច្រើននាក់។ កាលពីឆ្នាំ២០១២ ភ្លៀងដ៏សន្ធឹកសន្ធាប់មួយដែលមានបរិមាណស្មើនឹងភ្លៀងរយៈពេល១ខែ បានវាយប្រហារទីក្រុងម៉ានីល ធ្វើអោយមានមនុស្សស្លាប់៥១នាក់ តែក្នុងរយៈពេល៤៨ម៉ោងប៉ុណ្ណោះ។ ហើយកាលពីឆ្នាំ២០០៩ ព្យុះសង្ឃរាឈ្មោះ Parma បានសម្លាប់មនុស្សក្នុងប្រទេស ជាង១ពាន់១រយនាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ