ហ្វីលីពីនទ័លគំនិតប្រឈមមុខនឹងទំហំវិបត្តិមនុស្សធម៌ក្រោយពីព្យុះសង្ឃរាបូផា
៦ថ្ងៃក្រោយពីព្យុះសង្ឃរាបូផាឆ្លងកាត់ប្រទេសហ្វីលីពីនមក ប្រជាជនភៀសខ្លួននៅតែតែលតោលគ្មានអ្វីទីពឹងឡើយដោយអត់ទាំងជំរកអត់ទាំងស្បៀងអាហារទទួលទាន។ រដ្ឋាភិបាលវិញ ក៏មានការលំបាកយ៉ាងខ្លាំងក្នុងការដឹកជញ្ជូនស្បៀងអាហារនិងទឹកទទួលទានឲ្យដល់ប្រជាជនខ្លួនដែលរស់នៅហាលវាលហាលខ្យល់។ ប្រជាជនខ្លះទៀត គ្មានជំរើសអ្វីក្រៅតែពីដើរសុំទានគេនៅតាមបណ្តោយផ្លូវថ្នល់ដើម្បីបំពេញក្រពះដែលស្រេកឃ្លានខ្លាំង។ អ្នកខ្លះទៀត បានទៅលួចប្លន់យកស្បៀងដែលគេស្តុកទុក។ គ្រោះមហន្តរាយព្យុះសង្ឃរាបូផា បានសម្លាប់ជីវិតមនុស្សជាង ៦៤៧នាក់-នេះបើយោងតាមតួលេខផ្លូវការរបស់ផ្លូវការហ្វីលីពីន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
អាជ្ញាធរហ្វីលីពីន មានការទ័លគំនិតយ៉ាងខ្លាំងមិនដឹងធ្វើដូចម្តេច ប្រឈមមុខនឹងទំហំវិបត្តិមនុស្សធម៌ដ៏ធំធេងដែលបណ្តាលមកពីព្យុះសង្ឃរាបូផាដែលបានឆ្លងកាត់ហ្វីលីពីនកាលពីសប្តាហ៍មុន។ ប្រតិបត្តិការជួយសង្គ្រោះ ក៏មានការយ៉ាប់យឺនយ៉ាងខ្លាំងឥតគណនានៅក្នុងតំបន់រងមហន្តរាយខ្លះ ពីព្រោះគេត្រូវប្រើពេលវេលាយ៉ាងតិចក៏៣ថ្ងៃទម្រាំអាចចូលទៅដល់។នៅពេលដែលគេបានចូលទៅដល់ទីកន្លែងរងមហន្តរាយ ប្រជាជនដែលនៅរស់រានមានជីវិតនិងកំពុងស្រេកឃ្លានខ្លាំង នាំគ្នាដើរលុកលុយលួចអីវ៉ាន់គេនៅតាមផ្ទះសម្បែងនិងហាងលក់ទំនិញណាខ្លះដែលនៅសេសសល់គេចផុតពីព្យុះសង្ឃរា។
ឥឡូវនេះ ក្រុមអ្នកជួយសង្គ្រោះនៅតែមិនទាន់បានសម្រេចក្នុងការដឹកជញ្ជូនជំនួយមនុស្សធម៌ឲ្យបានគ្រប់គ្រាន់ដល់ប្រជាជនអត់ឃ្លាន ប្រមាណជា២៥ម៉ឺននាក់ដែលបានបាត់បង់អស់ផ្ទះសម្បែងរបស់គេ។ មួយវិញទៀត ក្នុងពេលចែកចាយស្បៀងអាហារម្តងៗ ប្រជាជននាំគ្នារត់បោលសម្រុកបុកជាន់គ្នាជម្រុញឲ្យការចែកចាយស្ពៀងកាន់តែមានការពិបាកខ្លាំងថែមទៀត។ លើសពីនេះ ប្រជាជនហ្វីលីពីនជាច្រើនពាន់នាក់ទៀត នាំគ្នាដើរស្មូមទានគេនៅតាមដងបណ្តោយផ្លូវក្នុងក្តីសង្ឃឹមថា អ្នកធ្វើដំណើរនឹងដាក់ទានជាម្ហូបអាហារឲ្យដល់ពួកគេ។
ម្យ៉ាងទៀត នៅក្នុងក្រុង Cateel លើកោះ Mindanao ទីកន្លែងដែលព្យុះសង្ឃរា បានវាយប្រហារខ្ទេចខ្ទីរទីលំនៅឋាន ប្រជាជន គ្មានអ្វីដើម្បីចំអែតក្រពះឡើយក្រៅតែពីទទួលទានផ្លែដូងអស់ជាច្រើនថ្ងៃមកហើយដែលធ្លាក់រាយប៉ាយនៅពេញដីដោយសារខ្យល់ព្យុះបោកបក់។
ចំណែករដ្ឋាភិបាលវិញ បានប្រកាសវិបត្តិភ័យជាតិហ្វីលីពីន នៅក្នុងតំបន់រងមហន្តរាយទាំងអស់ ដើម្បចាត់ចែងវិធានការជំនួយសង្គ្រោះឲ្យបានល្អត្រឹមត្រូវជូនដល់ប្រជាជនរងគ្រោះ។ រីឯ ក្រុមអ្នកសង្គ្រោះវិញ គេ បានបន្តការងារស្វែងរកជនរងគ្រោះតទៀត ជាអាទិ៍នៅតាមបណ្តោយទន្លេនិងក្នុងដីភក់ ខ្លាចក្រែង អាចឃើញសាកសព នៅទីនោះជាយថាហេតុ ពីព្រោះយោងតាមអាជ្ញាធរហ្វីលីពីន មនុស្សចំនួន ៧០០នាក់ នៅតែប្រកាសបាត់ខ្លួនដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ