ទំនាស់និកាយសាសនារីករាលដាលកាន់តែធ្ងន់ធ្ងរនៅឥណ្ឌូណេស៊ី
៧នាក់ត្រូវចាប់ខ្លួននៅកោះJava ព្រោះជាប់សង្ស័យថាបានចូលរួមប្រព្រឹត្តអំពើហិង្សាកាលពីថ្ងៃអាទិត្យទី ២៦សីហា រហូតបង្កឱ្យស្លាប់មនុស្សពីរនាក់។ ជនរងគ្រោះទាំងពីរនាក់ ដែលមាននិកាយសាសនាអ៊ីស្លាម Chiite បានបាត់បង់ជីវិតក្រោមកណ្តាប់ដៃពួកអ្នកកាន់និកាយស៊ូនីត (Sunnite)។ ព័ត៌មាននេះទើបត្រូវបង្ហើបឱ្យដឹងដោយ អង្គការការពារសិទ្ធិមនុស្ស នៅល្ងាចថ្ងៃចន្ទម្សិលមិញ។ អំពើហិង្សាសាសនានេះបញ្ជាក់ឱ្យឃើញពីសម្ពាធតានតឹងឡើងខ្លាំង នារយៈពេលប៉ុន្មានខែចុងក្រោយនេះ នៅក្នុងប្រទេសអ៊ីស្លាមដ៏ធំជាងគេនៅលើពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៣
និកាយChiite តំណាងឱ្យតែប្រមាណមិនដល់១លាននាក់ទេ នៅឥណ្ឌូនេស៊ី ពោលគឺជាបរិមាណដ៏តិចតួចបំផុតសម្រាប់ប្រទេសមួយដែលមានប្រជាជន១២០លាននាក់កាន់ សាសនាអ៊ីស្លាមនិកាយស៊ុយនីត(Sunnite)។ ប៉ុន្តែតាំងពីចុងឆ្នាំ២០១១មក និកាយស៊ីអ៊ីត (Chiite) រងការវាយប្រហារ ដុតបំផ្លាញផ្ទះសម្បែង វិហារ អ្នកដឹកនាំសាសនាក្នុងតំបន់ត្រូវចាប់ខ្លួន និងកាត់ទោសឱ្យជាប់ពន្ធនាគារពីរឆ្នាំទៀត។
ក្រៅពីអំពើហិង្សា នៅតាមភូមិស្រុក នៅមានចលនាអ៊ីស្លាមនិកាយស៊ុយនីតអភិរក្សនិយមជ្រុល ដែលចង់កម្ចាត់និកាយ Chiite ឱ្យអស់ពីសង្គមសាសនានៅឥណ្ឌូនេស៊ី ទោះបីជានិកាយនេះធ្លាប់ជាមានវប្បធម៌សន្តោសប្រណីក៏ដោយ។
រហូតមកទល់នឹងម៉ោងនេះ រដ្ឋាភិបាលឥណ្ឌូណេស៊ី ស្ទើរតែគ្មានបញ្ចេញសកម្មភាពអ្វីសោះ ក្នុងការដោះស្រាយវិបត្តិតានតឹងសាសនារវាងអ្នកកាន់និកាយខុសគ្នានេះ។ បើតាមអ្នកវិភាគ រដ្ឋាភិបាលមិនចង់បង្ហាញរូបភាពដែលគេអាចវាយតម្លៃថា ជាការប្រឆាំងនឹងអ៊ីស្លាម និងដែលនាំឱ្យខាតបង់ប្រយោជន៍ពេលបោះឆ្នោត។
ប៉ុន្តែសាក្សី និងភស្តុតាង នៃការជេរប្រមាថ បៀតបៀន បំផ្លិចបំផ្លាញ មានកាន់តែច្រើនឡើងៗ នារយៈពេលប៉ុន្មានខែចុងក្រោយនេះ ប្រឆាំងនឹងសហគមន៍សាសនាភាគតិច តួយ៉ាង អ៊ីស្លាមនិកាយChiite អ្នកកាន់គ្រិស្តសាសនា និងសាសនាតូចៗផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ