ទីក្រុងម៉ានីលចាត់វិធានការបង្ការត្រៀមខ្លួននៅពេលខ្យល់ព្យុះហាហ្គុយពីតវាយប្រហារមកដល់
ព្យុះហាហ្គុយពីតដែលមានវិជ្ជមាត្រប្រវែង៥០០គីឡូម៉ែត្រ បានវាយប្រហារយ៉ាងខ្លាំងក្លាកាលពីម្សិលមិញនៅភាគខាងកើតប្រទេសហ្វីលីពីនក្នុងល្បឿនជាង២០០គមក្នុងមួយម៉ោង។ នៅព្រឹកថ្ងៃចន្ទ៨ធ្នូនេះ ព្យុះហាហ្គុយពីត បានបន្ថយឥទ្ធិពលដោយមានល្បឿនត្រឹមតែ១២០គមក្នុងមួយម៉ោង និងក៏កំពុងបោកបក់សំដៅរដ្ឋធានីម៉ានីល។ អាជ្ញាធរក្រុងម៉ានីល បានចាត់វិធានការដឹកជម្លៀសប្រជាជនជាង១លាននាក់ដើម្បីយកទៅដាក់នៅតាមទីកន្លែងនានាដូចជានៅសាលារៀនឬនៅតាមគ្រិះស្ថានហាត់ហ្វឹកហ្វឺនកីឡាក៏ព្រមទាំងនៅតាមព្រះវិហារនៅទូទាំងប្រទេសហ្វីលីពីន។ យោងតាមការអង្គការកាកបាតក្រហម មកទល់ព្រឹកថ្ងៃចន្ទព្យុះកំណាចហាហ្គុយពីតបានសម្លាប់ជីវិតមនុស្ស២១នាក់និងបានបំផ្លាញលំនៅដ្ឋានជាច្រើនពាន់ខ្នង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
នៅទីក្រុងម៉ានីល-ប្រជាជន កំពុងត្រៀមខ្លួនដើម្បីប្រឈមមុខនឹងកម្លាំងខ្យល់ព្យុះហាហ្គុយពីតដ៏សែនសាហាវដែលបានឲ្យមានជាទឹកជំនន់យ៉ាងខ្លាំងនៅថ្ងៃចន្ទនេះ។
ចាប់តាំងពីថ្ងៃអាទិត្យម្សិលមិញមក ទឹកភ្លៀងនៅតែបន្តធ្លាក់ឥតឈប់ឈរនិងកាន់តែខ្លាំងឡើងៗ។ សាលារៀននានានៅទីក្រុងម៉ានីល ត្រូវបិទទ្វារ។ រីឯ អាជ្ញាធរម៉ានីលវិញបានប្រកាសឲ្យកងទ័ពត្រៀមខ្លួនដើម្បីជួយការពារប្រជាជនក្នុងពេលជួបស្ថានភាពអាសន្នខ្លាំង។ ចំណែក ក្រុមគ្រួសារហ្វីលីពីនមួយផ្នែកដែលកំពុងរស់នៅក្នុងចំណោមបណ្តាប្រជាជនរាប់លាននាក់នៅតាមសង្កាត់ក្រីក្រតោកយ៉ាក ដែលស្ថិតនៅជិតឆកសមុទ្រ ឬនៅក្បែរដងស្ទឹងនានា ត្រូវដឹកជំលៀសចេញដើម្បីសុវត្តិភាពរបស់ពួកគេ។
អាជ្ញាធរក្រុងម៉ានីល ទន្ទឹមនេះបានចាត់វិធានការឲ្យមានការរៀបចំដាក់បាវខ្សាច់ជាគំនរគរលើគ្នាយ៉ាងមាំទាំដើម្បីធ្វើជារបាំងពង្រឹងដើម្បីការពារទប់ទល់នឹងទឹកជន់នៅតាមឆកសមុទ្រក្រុងម៉ានីល។ ចំណែក ការរៀបចំតុបតែងលំអរនៅតាមផ្លូវនានាក្នុងទីក្រុងសម្រាប់ពីធីបុណ្យណូអែលនាពេលខាងមុខក៏ត្រូវបានអាជ្ញាធរបង្គាប់ឲ្យរើរុះចេញអស់ដែរ ដើម្បីបង្ការកុំឲ្យមានការបំផ្លិចបំផ្លាញពីកម្លាំងខ្យល់ព្យុះផងនិងក៏ដើម្បីចៀសវៀងពីគ្រោះថ្នាក់នានាដែលអាចកើតឡើងជាយថាហេតុដោយសារ សម្ភារៈដាក់តាំងលំអរនេះដែរ។
អាជ្ញាធរហ្វីលីពីន មានការព្រួយបារម្ភខ្លាំងដែរនៅលើបញ្ហាបណ្តាញអគ្គីសនីយនិងបណ្តាញទូរស័ព្ទនានានៅក្នុងទីក្រុង ដែលខ្លួនយល់ថា មិនអាចធន់បាននឹងកម្លាំងខ្សល់ព្យុះ។
ខ្យល់ព្យុះហាហ្គុយពីតដែលបានឆ្លងកាត់ភាគកណ្តាលប្រទេសហ្វីលីពីនកាលពីយប់ថ្ងៃសៅរ៍មុន បានបន្ថយឥទ្ធិពលយ៉ាងច្រើនដោយបោកបក់ក្នុងល្បឿនត្រឹមតែ១២០គមក្នុងមួយម៉ោងតែប៉ុណ្ណោះ។
យោងតាមតួលេខរបស់អាជ្ញាធរហ្វីលីពីន ព្យុះហាហ្គុយពីត បានសម្លាប់ជីវិតមនុស្សយ៉ាងតិចចំនួន៣នាក់ ។ ក៏ប៉ុន្តែ បើតាមការអះអាងរបស់អង្គការកាកបាទក្រហមវិញ មកដល់ថ្ងៃចន្ទទី៨ធ្នូនេះ ព្យុះហាហ្គុយពីត បានសម្លាប់ជីវិតមនុស្សអស់២១នាក់និងបំផ្លិចបំផ្លាញ លំនៅដ្ឋានជាច្រើនកន្លែងនៅតាមតំបន់ដែលខ្យល់ព្យុះនេះបានឆ្លងកាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ