១០លានដុល្លារសម្រាប់ការចាប់ខ្លួនHafiz Mohammad Saeed
ស.រ.អា សន្យាផ្តល់រង្វាន់លើកទឹកចិត្ត ១០លានដុល្លារ សម្រាប់ការតាមចាប់ខ្លួន Hafiz Mohammad Saeed។ជននេះដែលពីអំណើះទៅ ត្រូវបានអាមេរិកកត់ឈ្មោះក្នុងបញ្ជីក្រុមភេរវជនដែលវ៉ាស៊ីនតោន កំពុងតាមរកចាប់ខ្លួនយ៉ាងសកម្មបំផុត។ Hafiz Mohammad Saeed ដែលជាស្ថាបនិកនិងជាមេចលនាសកម្មជនអ៊ីស្លាមនិយមជ្រុលLashkar-e-Taiba (LeT) នៅប៉ាគីស្ថាន ត្រូវជាប់សង្ស័យពីបទ បានរៀបចំអំពើភេរវកម្មដ៏កាចសាហាវជាច្រើនជាអាទិ៍នៅ Bombay ក្នុងប្រទេសឥណ្ឌា ឆ្នាំ២០០៨ ដែលបណ្តាលឲ្យស្លាប់មនុស្ស១៦៦នាក់។ សេចក្តីជូនដំណឹងរបស់អាមេរិកនេះ ត្រូវបានឥណ្ឌាសម្តែងសេចក្តីអបអរសាទរនៅថ្ងៃអង្គារទី៣មេសាម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៣
Hafiz Mohammad Saeed ដែលជាស្ថាបនិកនិងជាមេចលនាសកម្មជនអ៊ីស្លាមជ្រុលនិយម Lashkar-e-Taiba(LeT)នៅប៉ាគីស្ថាន ពីអំណើះទៅ ត្រូវបានទីក្រុងវ៉ាស៊ីនតោន តាមរកចាប់ខ្លួនយ៉ាងសកម្មបំផុត បន្ទាប់ពីមេដឹកនាំបណ្តាញភេរវនិយមអាល់កៃដា (Al-Qaïda) សញ្ជាតិ អេហ្ស៊ីបឈ្មោះ Ayman al-Zawahiriនិងមេដឹកនាំសាសនាអ៊ីស្លាមតាលីបង់ឈ្មោះ Omar។ AymanនិងOmar ត្រូវបានអាមេរិកកាត់ថ្លៃជាទឹកប្រាក់ ២៥ លានដុល្លារនិង១០លានដុល្លារ ជារង្វាន់សំរាប់លើកទឹកចិត្តដល់ជនណាដែលអាចផ្តល់ព័ត៌មានអនុញ្ញាតឲ្យអាមេរិកអាចចាប់ខ្លួនជនទាំងនេះ។
Hafiz Mohammad Saeed ជនជាតិប៉ាគីស្ថានអាយុ៦០ឆ្នាំនិងបច្ចុប្បន្នដឹកនាំមូលនិធី Jamaat-ud-Dawa(JuD), ដែលជាអង្គការក្រៅរដ្ឋាភិបាលមួយដ៏ប្រជាប្រិយនៅប្រទេសប៉ាគីស្ថាន។ ពីព្រោះមូលនិធិ(JuD)នេះ ធ្លាប់បានជួយប្រជាជនប៉ាគីស្ថានយ៉ាងច្រើន ជាពិសេសនៅពេលដែលពួកគេបានទទួលរងទុក្ខវេទនាដោយគ្រោះមហន្តរាយរញ្ជួយដីឆ្នាំ ២០០៥និងគ្រោះទឹកជំនន់ឆ្នាំ ២០១០។
មូលនិធី (JuD)ដែលតែងតែ បដិសេធរាល់ការឃុបឃិតនានានៅក្នុងសកម្មភាពភេរវនិយម ត្រូវបានគេចាត់ទុកជារបាំងមួយសម្រាប់ ចលនា Lashkar-e-Taiba(LeT) ដើម្បីបំភាន់មតិសាធារណៈ។
ចលនា Lashkar-e-Taiba (LeT) នេះ ត្រូវ ជាប់សង្ស័យ ថា ជាមេក្លោងក្នុងការរៀបចំអំពើភេវកម្មនានានៅទីក្រុងប៊ុមបៃឆ្នាំ ២០០៨-ភេរវកម្មដែលបណ្តាលឲ្យមនុស្សស្លាប់អស់១៦៦ នាក់ ក្នុងនោះមានជនជាតិអាមេរិកាំង៦នាក់។ ខាងពួកភេរវជនវិញ មានស្លាប់៩នាក់ ហើយមានតែម្នាក់ប៉ុណ្ណោះគត់ ដែលនៅរស់រានមានជីវិតនិងដែលត្រូវអាមេរិកចាប់ខ្លួនបាន ឈ្មោះ Ajmal Amir Qasab ។ ភេរវជននេះ ត្រូវបានអាមេរិក កាត់ទោសប្រហារជីវិត។
សម្រាប់ទីក្រុងវ៉ាស៊ីនតោន និង New Delhi Hafiz Mohammad Saeed នេះ គឺជាមេភេរវជនម្នាក់ប្រកបដ៏គ្រោះថ្នាក់បំផុតដូចគ្នានឹង Omar មេសាសនាតាលីបង់ដែរ ដោយហេតុ អាមេរិក ហ៊ានសន្យាប្រគល់រង្វាន់លើកទឹកចិត្តរហូតដល់ ១០លានដុល្លារសំរាប់ការចាប់ខ្លួន Hafiz Mohammad Saeed នេះ។
ម្យ៉ាងទៀត ប្រសិនបើ Mohammad Saeed នៅតែបដិសេធរាល់ការចូលរួមឃុបឃិតរបស់ខ្លួននៅក្នុងអំពើភេរវកម្មនៅទីក្រុងប៊ុមបៃ អាមេរិកនិងឥណ្ឌា ក៏នៅតែជឿជាក់លើការជាប់ពិរុទ្ធរបស់ជននេះជានិច្ច និងក៏មានបំណងចាប់ជននេះយកទៅកាត់ទោសនៅមុខតុលាការអាមេរិកដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ