ចិនបដិសេធមិនឲ្យនាវាចម្បាំង អាមេរិកចូលចតនៅហុងកុង
ក្រសួងការពារជាតិអាមេរិកបានផ្តល់ដំណឹងថា កាលពីថ្ងៃទី២៩មេសា អាជ្ញាធរចិនបានបដិសេធមិនឲ្យនាវាផ្ទុកយន្តហោះរបស់អាមេរិក ព្រមទាំងនាវារណបតូចៗផ្សេងទៀតចូលចត នៅកំពង់ផែក្រុងហុងកុងទេ។ ការបដិសេធរបស់ចិននេះ គឺធ្វើឡើងក្នុងខណៈដែលជម្លោះដែនទឹក នៅក្នុងសមុទ្រចិនខាងត្បូង កាន់តែឡើងកំដៅ ហើយទន្ទឹមពេលដែលអាមេរិក បានសន្យាជួយការពារហ្វីលីពីន ក្នុងការការពារដែនទឹករបស់ខ្លួន ក៏ដូចជាការពារតំបន់ចរាចរណ៍ផ្លូវសមុទ្រអន្តរជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
អ្នកនាំពាក្យមន្ទីរប៉ង់តាហ្គូន បានផ្តល់ដំណឹងថា នាវាចម្បាំងប្រភេទផ្ទុកយន្តហោះឈ្មោះ USS Stennis និងនាវារណបជាច្រើនគ្រឿងទៀត ដែលមានគម្រោងចូលចតសម្រាកនៅកំពង់ផែហុងកុង ត្រូវបានអជ្ញាធរចិនបដិសេធ មិនឲ្យចូលចតទេ។ លោកបន្តថា អាជ្ញាធរចិននៅហុងកុង មិនបានបញ្ជាក់មូលហេតុឲ្យបានច្បាស់ ស្តីពីការបដិសេធនេះទេ តែយ៉ាងណាក៏ដោយ ហេតុផលដែលអាចឲ្យគេស្មានបាន គឺមកពីជម្លោះនៅក្នុងសមុទ្រចិនខាងត្បូង។
អ្នកនាំពាក្យដដែលបានបន្ថែមថា នាវារបស់កងទ័ពអាមេរិក ធ្លាប់បានចូលចតនៅកំពង់ផែហុងកុង រាប់សិបដងមកហើយ មិនដែលមានបញ្ហាអ្វីទេ ហើយបច្ចុប្បន្ននេះទៀត នៅហុងកុងក៏មាននាវាអាមេរិកមួយឈ្មោះ USS Blue Ridge កំពុងតែសំចតផងដែរ។ ខាងអាមេរិក សង្ឃឹមថានាវានេះ នឹងនៅតែអាចបន្តចតនៅទីនោះបានតទៅទៀត។
សូមបញ្ជាក់ថា កាលពីថ្ងៃទី១៥មេសា គឺនៅលើនាវា USS Stennis នេះហើយដែលលោក Ashton Carter បានទៅទស្សនកិច្ច នៅហ្វីលីពីន ក្នុងតំបន់កោះដែលនៅទល់មុខនឹងប្រជុំកោះ Spratleys ជាកោះដែលចិនដណ្តើមថាជារបស់ខ្លួន។ លោករដ្ឋមន្រ្តីក្រសួងការពារជាតិអាមេរិក បានថ្លែងក្នុងឱកាសនោះថា អាមេរិកនឹងធ្វើគ្រប់យ៉ាង ដើម្បីធានានិងរក្សាសន្តិសុខ ស្ថិរភាពក្នុងតំបន់អាស៊ីប៉ាស៊ីហ្វិក និងជាពិសេសគឺក្នុងតំបន់សមុទ្រចិនខាងត្បូង ដែលជាផ្លូវឆ្លងកាត់នៃចរាចរណ៍ដឹកជញ្ជូនទំនិញអន្តរជាតិមួយ ដ៏សំខាន់។ ក្នុងន័យនេះ រដ្ឋាភិបាលអាមេរិក បានសន្យាជួយប្រទេសដែលកំពុងតែមានជម្លោះជាមួយចិន ជុំវិញដែនអធិតេយ្យក្នុងសមុទ្រ ដូចជាហ្វីលីពីន វៀតណាម ម៉ាឡេស៊ីជាដើម ដើម្បីតទល់ជាមួយភាពក្រអឺតក្រទម វាទទីរបស់ចិន។
សម្រាប់ពេលនេះ អជ្ញាធរចិន បានបដិសេធមិនឲ្យនាវាចម្បាំងអាមេរិកចូលចត គឺជាការប្រកាសមួយជាឱឡាឫក ថាចិន មិនពេញចិត្តនឹងគោលជំហររបស់អាមេរិក ដែលចូលមកលូកដៃក្នុងកិច្ចការជម្លោះ ដែលចិនកំពុងតែមានជាមួយប្រទេសតូចៗក្នុងតំបន់ទេ។ ដោយឡែក យើងក៏អាចស្មានត្រឡប់ទៅវិញថា អាមេរិកអាចមានចេតនាចង់សាកចិត្តចិនដែរ ដោយបានសុំចូលចតនាវាចម្បាំងរបស់ខ្លួននៅហុងកុង នាពេលនេះ ព្រោះមិនខ្វះទេកន្លែងដែលអាចចូលចតបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ