C919 យន្តហោះស៊ីវីលចំងាយមធ្យមផលិតក្នុងស្រុករបស់ចិន ចាប់ផ្តើមហោះដើមឆ្នាំ២០១៧
យោងតាមការផ្សាយរបស់ទីភ្នាក់ងារព័ត៌មានផ្លូវការចិន កាលពីថ្ងៃចន្ទ ទី៦កុម្ភៈ បានឲ្យដឹងថា យន្តហោះដឹកអ្នកដំណើរចំងាយមធ្យម ដែលផលិតដោយក្រុមហ៊ុនចិន ឈ្មោះComac នឹងត្រូវដាក់ឲ្យហោះហើរជាផ្លូវការ នៅរវាងឆមាសទីមួយឆ្នាំ២០១៧នេះ។ រដ្ឋាភិបាល និងវិស័យឯកជនចិន កំពុងព្យាយាមអភិវឌ្ឍន៍ ការផលិតយន្តហោះដោយខ្លួនឯង ដើម្បីបំពេញតំរូវការនៃការធ្វើដំណើរ ក្នុងស្រុក ដែលកាន់តែកើនឡើង ជាលំដាប់។ មកទល់ពេលនេះ មានតែយន្តហោះ Airbusរបស់អឺរ៉ុប និង Boeing របស់អាមេរិកប៉ុណ្ណោះ ដែលគ្រប់គ្រងទីផ្សារអាកាសចរណ៍ស៊ីវីល នៅចិន។
ចុះផ្សាយនៅថ្ងៃ៖
ស្តាប់ - ០២:១៦
យន្តហោះ C919 គឺជាស្នាដៃផលិតក្នុងស្រុករបស់ចិនសុទ្ធសាធ។ ក្រុមហ៊ុនផលិតយន្តហោះរដ្ឋ របស់ចិន ឈ្មោះ Comac បានអះអាងថា គេនឹងប្រឹងប្រែង ប្រជែងឲ្យបាន ជាមួយយន្តហោះ Airbus A320 និង យន្តហោះBoeing B737 ដែលជាយន្តហោះចំងាយមធ្យម ពេញនិយមជាងគេ។ យន្តហោះ C919 របស់ចិន មានសមត្ថភាពដឹកមនុស្សបាន១៥០នាក់ ក្នុងរយៈចំងាយ៤០៧៥គីឡូម៉ែត្រ។
បើតាមការចុះផ្សាយរបស់ ទីភ្នាក់ងារព័ត៌មានចិនថ្មី បានអះអាងថា គេនៅសល់តែរៀបចំដំឡើងប្រព័ន្ធអេឡិចត្រូនិក មួយចំនួនតូច ដែលមិនជាប់ពាក់ព័ន្ធដល់ប្រព័ន្ធបញ្ជាយន្តហោះតែប៉ុណ្ណោះ។ ដូច្នេះយន្តហោះ C919 នឹងអាចហោះហើរលើមេឃរបស់ចិន នៅរវាងឆមាសទីមួយ ឆ្នាំ២០១៧នេះ។ យ៉ាងណាមិញ ក្រុមហ៊ុន Comac បានបញ្ជាក់ថា គេបានទទួលការបញ្ជាទិញយន្តហោះ C919 នេះ ចំនួន៥៧០គ្រឿងរួចហើយ ពីសំណាក់ក្រុមហ៊ុនអាកាសចរណ៍ចំនួន២៣។
គួររំលឹកថា ក្រុមហ៊ុនComac ធ្លាប់បានប្រកាសថាដាក់ឲ្យហោះហើរ យន្តហោះ C919 នេះ កាលពីឆ្នាំ២០១៥ តែកាលបរិច្ឆេទ ត្រូវបានរុញរំកិលជាច្រើនលើក ដោយសារតែនៅមានការខ្វះខាតបច្ចេកទេស ហើយមិនទាន់បានទទួលលិខិតអនុញ្ញាតបច្ចេកទេស សព្វគ្រប់។ ដោយឡែកក្រុមហ៊ុនចិននេះ ក៏ធ្លាប់បានផលិតយន្តហោះខ្នាតតូចប្រភេទ ARJ21 ដែលត្រូវបានដាក់ឲ្យហោះហើរជាផ្លូវការ នៅចិន កាលពីខែមិថុនាឆ្នាំ២០១៦។
សូមបញ្ជាក់ តម្រូវការយន្តហោះដឹកអ្នកដំណើរចំងាយមធ្យម សម្រាប់ការហោះហើរក្នុងស្រុក នៅក្នុងប្រទេសចិន បានកើនឡើងជាលំដាប់ ដោយសារតែប្រជាជនចិនដែលមានជីវភាពធូរធាមានកាន់តែច្រើន ហើយព្រមជាមួយនឹងការរីកចំរើន នៃវិស័យទេសចរណ៍។ យោងតាមតួលេខរបស់ក្រុមហ៊ុន Airbus បានបង្ហាញថា ទីផ្សារអាកាសចរណ៍ស៊ីវីលចិន ត្រូវការយន្តហោះប្រមាណជា៦០០០គ្រឿងបន្ថែមទៀត ក្នុងកំឡុងពេល២០ឆ្នាំ ទៅមុខ។ តំរូវការនេះ បើគិតជាទឹកប្រាក់ ស្មើនឹង៩៤៥លានដុល្លារ។ ដោយឡែកក្រុមហ៊ុន Boeing បានប៉ាន់ប្រមាណតួលេខ លើសពីនេះបន្តិចទៀតផង។
ដើម្បីអាចឈរជើងលើទីផ្សារចិន ប៉ុន្មានឆ្នាំចុងក្រោយនេះ ក្រុមហ៊ុនAirbus និង Boeing បានព្យាយាមយកចិត្តរដ្ឋាភិបាលចិន តាមរយៈការបង្កើតរោងចក្រតំឡើង និងបាញ់ថ្នាំយន្តហោះរបស់ពួកគេ នៅក្នុងស្រុកចិន។ តែយ៉ាងណា ជាមួយនឹង យន្តហោះ C919 ស្នាដៃរបស់ចិន ប្រាកដជាធ្វើឲ្យទីផ្សារនេះប្រែប្រួលមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ