សភាពអាសន្ន ត្រូវបានប្រកាសនៅ Djalal-Abad ជាទីក្រុងទី២ នៅខាងត្បូងប្រទេស Kirghizstan
សាធារណរដ្ឋ Kirghizstan នៅថ្ងៃសៅរ៍ម្សិលមិញ ១២មិថុនា- បានប្រកាសសភាពអាសន្ននៅទីក្រុងទី ២ Djalal-Abad ខាងត្បូងប្រទេសនេះ នៅអាស៊ីកណ្តាល និងបានបញ្ជាឲ្យមានកំណែនមួយភាគនៃកងទ័ព បន្ទាប់ពីមានហិង្សាបង្ហូរឈាមរវាងក្រុមជាតិពន្ធុ Ouzbeks និង Kirghizs ចាប់ផ្តើមតាំងពីយប់ថ្ងៃព្រហស្បតិ៍ឆ្លងមកថ្ងៃសុក្រ១១មិថុនា។
ចុះផ្សាយនៅថ្ងៃ៖
សេចក្តីរាយការណ៍របស់ វីនស្តុន រតនា
សភាពអាសន្នត្រូវបានរដ្ឋាភិបាលស្តីទី ប្រកាសនៅទីក្រុងDjalal-Abad ជាសេចក្តីសំរេចចិត្តធ្វើទាំងបង្ខំ ពីព្រោះមណ្ឌលអស្ថិរកម្មរីករាលដាល។ អំពើហិង្សា ចំនួននៃការលួចប្លន់ឆក់ និងការសម្លាប់រង្គាលកើនឡើង។ ប្រសិនបើគេពុំចាត់វិធានការសមស្របយ៉ាងសក្តិសិទ្ធិទេនោះចលាចលអាចរីកកាន់តែធំ និងប្រែក្លាយទៅជាអធិករណ៍ភូមិភាគ។
ដើម្បីរ៉ាប់រងសន្តិសុខសំរាប់ពលរដ្ឋការពាររបបត្រឹមត្រូវតាមរដ្ឋធម្មនុញ្ញនិងធ្វើឲ្យមានរបៀបរៀបរយឡើងវិញរដ្ឋាភិបាលចេញបញ្ជាឲ្យមានកំណែនមួយភាគនៃកងទ័ព។ ម្យ៉ាងទៀតរដ្ឋាភិបាលបានប្រកាសអនុញ្ញាតឲ្យកងកម្លាំងរក្សារបៀបរៀបរយបាញ់ដោយពុំចាំបាច់ស្រែកព្រមានប្រាប់ជាមុន ទៅលើក្រុមជនណាដែលប្រើកាំភ្លើងនៅខាងត្បូងប្រទេស។
ចាប់ពីថ្ងៃសុក្រ១១មិថុនាមក សភាពការណ៍ប្រែក្លាយទៅជាមានលក្ខណៈពុំអាចឲ្យត្រួតពិនិត្យបានទៀតឡើយ-នេះជាប្រសាសន៍របស់លោកស្រីប្រធានាធិបតីស្តីទី Roza Otounbaïeva បន្ទាប់ពីទិវាទី ២ នៃហិង្សារវាងពួក Kirghizs និងជនជាតិភាគតិច Ouzbeks ជាហេតុបណ្ដាលឲ្យមានអ្នកស្លាប់៧៩នាក់និងរបួសជិត១០០០នាក់-ស្របតាមតួលេខថ្មីរបស់ក្រសួងសុខាភិបាល Kirghizstan។
នៅថ្ងៃសុក្ររដ្ឋាភិបាលបានប្រកាសសភាពអាសន្ន និងបំរាមគោចរនៅទីក្រុង 0ch និងនៅស្រុកជិតខាងជាច្រើនទៀត។
ពួកជនក្លាហានបំផុតចេញដើរតាមផ្លូវទទេគ្មានមនុស្សម្នាដើម្បីកត់សំគាល់ការខូចខាត។ ពួក Ouzbeks ពិភាក្សារួមគ្នាអំពីអាវុធដែលពួកខ្លួនមាន និងអំពីការអាចមានអំពើសងសឹកតបតវិញនៅថ្ងៃមុខ។
ប្រទេសរុស្ស៊ីបានផ្តល់ជំនួយមនុស្សធម៌ឲ្យ Kirghizstan ប៉ុន្តែ Kirghizstan បានបដិសេធជំនួយយោធា។
ស.រ.អា. នៅថ្ងៃសៅរ៍ម្សិលមិញបានអំពាវនាវឲ្យ «កសាងសន្តិភាព និងសណ្តាប់ធ្នាប់ជាសាធារណៈឡើងវិញឲ្យបានឆាប់រហ័ស» នៅខាងត្បូង Kirghizstan និង បានថ្លែងការគាំទ្រចំពោះការខំប្រឹងប្រែងរបស់អ.ស.ប. និងអឺរ៉ូប ដើម្បីបញ្ចប់អំពើហិង្សារវាងក្រុមជាតិពន្ធុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ