ប្រមុខការបរទេសអាមេរិកទៅប៉ាគីស្ថានដើម្បីស្តារទំនាក់ទំនងរវាងប្រទេសទាំងពីរ
ដោយមិនប្រកាសឲ្យដឹងមុន លោកប្រមុខការបរទេសអាមេរិក John Kerryបានធ្វើដំណើរទៅប្រទេសប៉ាគីស្ថាន កាលពីថ្ងៃពុធ ដោយលោកបានជួបពិភាក្សាជាមួយនាយករដ្ឋមន្រ្តីថ្មីរបស់ប៉ាគីស្ថាន កាលពីថ្ងៃព្រហស្បតិ៍ ទី ១ សីហា ២០១៣។ ទស្សនកិច្ចមិនព្រាងទុករបស់រដ្ឋមន្រ្តីការបរទេសអាមេរិកមានគោលដៅបញ្ចុះបញ្ចូលកងទ័ព និងរដ្ឋាភិបាលអ៊ីស្លាម៉ាបាត ឲ្យចូលរួមប្រយុទ្ធប្រឆាំងនឹងចលនាពួកឧទ្ទាមអ៊ីស្លាមជ្រុលនិយម ដែលកំពុងបង្កសម្បុកលាក់ខ្លួន ក្នុងទឹកដីប៉ាគីស្ថាន ក្បែរព្រំដែនជាមួយប្រទេសអាហ្វហ្កានីស្ថាន។
ចុះផ្សាយនៅថ្ងៃ៖
ស្តាប់ - ០២:២១
លោក John Kerryបានប្រគល់លិខិតអញ្ជើញមួយរបស់លោកប្រធានាធិបតីបារ៉ាក់ អូបាម៉ា ដែលចង់ជួបពិភាក្សាជាមួយលោកនាយករដ្ឋមន្រ្តីប៉ាគីស្ថាន Nawar Sharif ដែលទើបជាប់ឆ្នោត និងចូលកាន់តំណែង កាលពីខែមិថុនាកន្លងទៅ។ ដោយអញ្ជើញថ្នាក់ដឹកនាំថ្មីរបស់ប៉ាគីស្ថាន ឲ្យចូលជួបជាមួយលោកអូបាម៉ា ទីក្រុងវ៉ាស៊ីនតោនសង្ឃឹមស្តារទំនាក់ទំនងឲ្យល្អឡើងវិញ ជាមួយទីក្រុងអ៊ីស្លាម៉ាបាត។ ទំនាក់ទំនងរវាងប្រទេសទាំងពីរត្រូវបានជាប់គាំង និងល្អក់កករ បន្ទាប់ពីកងទ័ពអាមេរិកបានបើកការប្រយុទ្ធ សម្លាប់អូសាម៉ា បិនឡាដិន ក្នុងទឹកដីប៉ាគីស្ថាន ដោយមិនជូនដំណឹងជាមុនដល់រដ្ឋាភិបាលម្ចាស់ស្រុក កាលពីខែឧសភា ឆ្នាំ ២០១១កន្លងទៅ។
ចាប់តាំងពីប៉ាគីស្ថានមាននាយករដ្ឋមន្រ្តីថ្មី នេះជាលើកទីមួយ ដែលមន្រ្តីជាន់ខ្ពស់របស់អាមេរិកបានធ្វើដំណើរទៅប៉ាគីស្ថាន។ ក្នុងជំនួបជាមួយនាយករដ្ឋមន្រ្តី Nawar Sharif ប្រមុខការបរទេសអាមេរិកទាមទារសុំឲ្យភាគីប៉ាគីស្ថានចាត់វិធានការប្រយុទ្ធប្រឆាំង នឹងក្រុមឧទ្ទាមតាលីបង់ ដែលសម្ងំលាក់ខ្លួន នៅក្នុងទឹកដីប៉ាគីស្ថាន ក្បែរទៅរកព្រំដែនជាមួយអាហ្វហ្កានីស្ថាន ជាទីដែលអាមេរិកត្រូវដកកងទ័ពចេញឲ្យអស់ នៅចុងឆ្នាំ ២០១៤។ តាមមន្រ្តីទូត ការទាមទាររបស់អាមេរិកពីប៉ាគីស្ថានបានទទួលលទ្ធផលតិចតួច ដោយ ប៉ាគីស្ថាន ដែលជាប្រទេសអ៊ីស្លាមតែមួយ មានអាវុធនុយក្លេអ៊ែរ មិនសូវសហការណាស់ណាជាមួយអាមេរិកដើម្បីប្រយុទ្ធប្រឆាំងនឹងក្រុមអ៊ីស្លាមជ្រុលនិយម។
អាមេរិក និងប៉ាគីស្ថានទាមទារចង់បានរៀងៗខ្លួន។ ប៉ាគីស្ថានចង់បានពីអាមេរិក នូវការគោរពបូរណភាពទឹកដីរបស់ប៉ាគីស្ថាន។ ពោលគឺអាមេរិកត្រូវបញ្ឈប់ជាបន្ទាន់ ការបើកវាយប្រហាររបស់យន្តហោះ គ្មានមនុស្សបើកDrones ក្នុងទឹកដីប៉ាគីស្ថាន។
ក្នុងកែវភ្នែករបស់ប៉ាគីស្ថាន ការវាយប្រហាររបស់យន្តហោះDrones របស់អាមេរិក ក្នុងទឹកដីប៉ាគីស្ថាន មិនត្រឹមតែរំលោភលើអធិបតេយ្យភាពរបស់ប៉ាគីស្ថានប៉ុណ្ណោះទេ ប៉ុន្តែ វាបានសម្លាប់ប្រជាជនស៊ីវិល រាប់រយនាក់។
ប៉ុន្តែ សម្រាប់អាមេរិកវិញ គេចាំបាច់ត្រូវប្រើយន្តហោះDrones ព្រោះវាជាមធ្យោបាយដ៏មានប្រសិទ្ធិភាពដើម្បីប្រយុទ្ធប្រឆាំងនឹងក្រុមអ៊ីស្លាមជ្រុលនិយម។ នាយករដ្ឋមន្រ្តីថ្មីរបស់ប៉ាគីស្ថានធ្លាប់បានបញ្ជាក់ហើយថា លោកចង់ពង្រឹងទំនាក់ទំនងល្អឡើងវិញជាមួយអាមេរិក ប៉ុន្តែ ក្នុងលក្ខខណ្ឌដែលអាមេរិកយល់ដឹងពីការព្រួយបារម្ភរបស់ប៉ាគីស្ថាន ទាក់ទងនឹងនយោបាយវាយប្រហារតាមយន្តហោះDrones ក្នុងទឹកដីប៉ាគីស្ថាននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ