ចំណាប់ខ្មាំងជប៉ុនម្នាក់ទំនងជាត្រូវបានអង្គការរដ្ឋអ៊ីស្លាមប្រហារជីវិត
ខ្សែវីដេអូខ្លីមួយទើបត្រូវបានបង្ហោះតាមអ៊ីនធ័រនែត បង្ហាញពីការប្រហារជីវិតចំណាប់ខ្មាំងជប៉ុនម្នាក់ក្នុងចំណោមចំណាប់ខ្មាំងទាំងពីរ។ រដ្ឋាភិបាលជប៉ុន ដែលបានខិតខំបញ្ចេញសកម្មភាព បើកគ្រប់លទ្ធភាព គ្រប់ច្រក ដើម្បីសាកល្បងជួយសង្គ្រោះជីវិតចំណាប់ខ្មាំងជប៉ុនទាំងពីររូបពីកណ្តាប់ដៃពួកអង្គការរដ្ឋអ៊ីស្លាម បានអះអាងកំពុងសិក្សាពិនិត្យមើលភាពពិតនៃខ្សែវីដេអូនោះ។
ចុះផ្សាយនៅថ្ងៃ៖ កែប្រែថ្ងៃទី៖
អ្នកនាំពាក្យរដ្ឋាភិបាលបានបើកសន្និសីទកាសែត ទាំងរំលងអាធ្រាត្រទៅហើយ (ម៉ោងនៅជប៉ុន) ជូនដំណឹងថា មានវីដេអូថ្មីមួយបង្ហាញពីការប្រហារជីវិតចំណាប់ខ្មាំងម្នាក់ និងរូប Kenji Gotoត្រូវបានគេបង្ហោះតាមអ៊ីនធ័រនែត។ ប៉ុន្តែក្រុមអ្នកឯកទេស កំពុងតែប្រមូលព័ត៌មាន និងសិក្សាលម្អិត ដើម្បីបញ្ជាក់ថាវីដេអូនោះជាព័ត៌មានពិតឬយ៉ាងណា។
ហារូណា យូកាវ៉ា ទំនងជាត្រូវបានជនដៃដល់ជីហាតប្រហារជីវិតបាត់ទៅហើយ។ នេះបើតាមការជូនដំណឹងរបស់អ្នកនាំពាក្យរដ្ឋាភិបាលជប៉ុន លោក យោស្ហ៊ីហ៊ីដេ ស៊ូហ្កា ដែលបន្ថែមដោយការថ្កោលទោស និងទាមទារជាថ្មីឱ្យដោះលែងជាបន្ទាន់អ្នកកាសែតជប៉ុន Kenji Goto ដែលនៅក្នុងវីដេអូ គេបានឮសម្រែកសុំជំនួយពីនាយករដ្ឋមន្ត្រី!
សូមបញ្ជាក់ថា ការផ្ទៀងផ្ទាត់វីដេអូមិនទាន់ត្រូវបានបញ្ជាក់នៅឡើយទេ ប៉ុន្តែបើតាមអ្នកឯកទេសម្នាក់ នៃទូរទស្សន៍ជាតិជប៉ុន NHK និងអ្នកឯកទេសផ្សេងទៀត វីដេអូលើកនេះមានលក្ខណៈគួរឱ្យសង្ស័យច្រើន និងចម្លែកគួរឱ្យកត់សម្គាល់ ដូចជាគ្មានស្លាកសញ្ញាអង្គការជីហាតរដ្ឋអ៊ីស្លាម ឆាកឈុតវីដេអូប្លែកខុសទម្លាប់ និងគ្មានដានឬសញ្ញាសាសនា។
កិច្ចប្រជុំគណៈរដ្ឋមន្ត្រីបន្ទាន់មួយបានរៀបចំភ្លាម ទាំងយប់ ក្រោមការដឹកនាំរបស់លោកនាយករដ្ឋមន្ត្រី ស្ហ៊ីនហ្សូ អាបេ។ ព្រោះវីដេអូនេះបានធ្លាក់មក បន្ទាប់ពីឱសានវាទកំណត់ដោយអង្គការរដ្ឋអ៊ីស្លាម បានរំលងអស់រយៈពេលជិត៣៦ម៉ោង។ កាលពីថ្ងៃអង្គារមុន អង្គការរដ្ឋអ៊ីស្លាមបានទាមទារ ទឹកប្រាក់ ២០០លានដុល្លារ ជាថ្នូរនឹងសេរីភាពចំណាប់ខ្មាំងជប៉ុនទាំងពីរ និងទុកពេល៧២ម៉ោងឱ្យរដ្ឋាភិបាលជប៉ុនសម្រេចចិត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ