នុយក្លេអ៊ែរកូរ៉េខាងជើង ៖ ចិនព្រួយបារម្ភជាថ្មី តែទំនងមិនរវល់ទៅដាក់ទោសព្យុងយ៉ាង
បន្ទាប់ពីអាមេរិក ជប៉ុន និងកូរ៉េខាងត្បូង នៅថ្ងៃពុធនេះ ចិនបានសម្តែងការព្រួយបារម្ភ យ៉ាងខ្លាំង ចំពោះសេចក្តីប្រកាសរបស់កូរ៉េខាងជើង អំពីចេតនាចង់បាញ់សាកល្បងមីស៊ីល ក្នុងពេលឆាប់ៗខាងមុខ។ ប៉ុន្តែក្នុងពេលដែលសេអ៊ូល តូក្យូ ពួតគ្នាជាមួយអាមេរិកគំរាមបំផ្លាញមីស៊ីលកូរ៉េខាងជើង ប៉េកាំងវិញបានត្រឹមអំពាវនាវព្យុងយ៉ាងចេះអត់ធ្មត់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
កូរ៉េខាងជើងបានបិទបញ្ចប់ពាក្យចចាមអារាម ដោយបានជូនព័ត៌មានទៅកាន់ភ្នាក់ងារបីរបស់អង្គការសហប្រជាជាតិ (អង្គការដឹកជញ្ជូនជើងទឹកអន្តរជាតិ Organisation maritime internationale -OMI) នៅថ្ងៃអង្គារម្សិលមិញ អំពីចេតនាចង់បាញ់បង្ហោះមីស៊ីលពាំផ្កាយរណប នៅរវាងពីថ្ងៃទី៨ ទៅ២៥កុម្ភៈ ចន្លោះពីម៉ោង ៧ព្រឹកទៅម៉ោង១២ថ្ងៃត្រង់។ ជម្រើសពេលវេលាដែលនាំគេនឹកឃើញដល់ថ្ងៃ១៦កុម្ភៈ ថ្ងៃខួបសពអគ្គមគ្គុទេសក៍ គីម ជុងអ៊ីល ជាឪពុករបស់លោក គីម ជុងអ៊ុន។
តាំងពីល្ងាចមិញមក ប្រតិកម្មបានធ្លាក់មកឥតដាច់ ចំពោះទង្វើបង្កហេតុ បង្កអស្ថិរភាព និងរំលោភច្បាប់អន្តរជាតិរបស់ព្យុងយ៉ាង។ សម្រាប់កូរ៉េខាងត្បូង រាល់ការបាញ់បង្ហោះដែលប្រើបច្ចេកវិទ្យាប៉ាលីស្ទីក សុទ្ធតែជាការរំលោភសេចក្តីសម្រេចចិត្តរបស់អង្គការសហប្រជាជាតិ ដូច្នេះបើកូរ៉េខាងជើងហ៊ានបន្តធ្វើ នឹងត្រូវទទួលផលយ៉ាងចាស់ដៃវិញ។
នាយករដ្ឋមន្ត្រីជប៉ុន លោក ស៊ីនហ្សូ អាបេ បានព្រមានជាស្រេចថានឹងបាញ់កម្ទេចមីស៊ីលនោះ ប្រសិនបើធ្លាក់លើទឹកដីជប៉ុន។ តាំងពីល្ងាចមិញ សហរដ្ឋអាមេរិក បានស្រែកបរិហារថា នេះជាភស្តុតាងកាន់តែជាក់ស្តែង ដែលជំរុញក្រុមប្រឹក្សាសន្តិសុខឱ្យត្រូវតែសម្រេចដាក់ទណ្ឌកម្មបន្ថែមឱ្យសក្តិសម ...
ការបាញ់សាកល្បងមីស៊ីលថ្មីនេះ ជាសម្ពាធថ្មីមួយទៀតលើក្រុងប៉េកាំង ដែលជាសម្ព័ន្ធមិត្តតែមួយគត់របស់ព្យុងយ៉ាង។ ប៉ុន្តែថ្វីបើនៅថ្ងៃនេះ ចិនបានសម្តែងការព្រួយបារម្ភខ្លាំង និងបានបង្ខំឱ្យកូរ៉េខាងជើងឈប់បង្កសកម្មភាពញុះញង់ បង្កហេតុបង្កភាពតានតឹងក្នុងតំបន់ក្តី ក៏អ្នកវិភាគមួយចំនួនធំយល់ថា ចិនទំនងជាមិនបញ្ចេញសកម្មភាពអ្វីទេ។
ក្នុងក្រសែភ្នែកចិន ការបាញ់សាកល្បងមីស៊ីលបង្ហោះផ្កាយរណប ជាកិច្ចការតូចតាចណាស់បើប្រៀបទៅនឹងការសាកល្បងនុយក្លេអ៊ែរ។ ភាពរឹងរូសរបស់ព្យុងយ៉ាងក្នុងសំណុំរឿងនុយក្លេអ៊ែរងាយទទួលយកជាងការផ្តួលគីមជុងអ៊ុន និងបង្រួបបង្រួមកូរ៉េទាំងពីរ ដោយមានអាមេរិកនៅពីក្រោយ។ នាឱកាសទស្សនកិច្ចរបស់លោកចនឃែរី នៅក្រុងប៉េកាំងកាលពីសប្តាហ៍មុន ចិនបានព្រមព្រៀងយ៉ាងតិចតួចបំផុតជាមួយអាមេរិក ក្នុងការស្វែងរកសេចក្តីសម្រេចចិត្តថ្មី ដាក់ប្រឆាំងនឹងកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ