ថៃដើរត្រលប់ក្រោយ វិលទៅប្រកាន់យករបបប្រជាធិបតេយ្យពាក់កណ្តាលផ្តាច់ការ
គណៈកម្មការតាក់តែងច្បាប់ ដែលតែងតាំងបន្តុបដោយរដ្ឋាភិបាលយោធា បានបញ្ជូនសេចក្តីព្រាងរដ្ឋធម្មនុញ្ញថ្មី ទៅឱ្យមេដឹកនាំសឹក តាមការស្នើសុំហើយ នៅថ្ងៃអង្គារម្សិលមិញ។ គម្រោងច្បាប់នេះ នឹងត្រូវឆ្លងកាត់ការធ្វើប្រជាមតិនៅខែសីហាខាងមុខ ប៉ុន្តែក្នុងអំឡុងពេលរង់ចាំ គ្មានទេការតស៊ូមតិជាសាធារណៈ។ របបសឹកថៃបានហាមឃាត់ជាដាច់ខាត និងគំរាមដាក់ទោសជនណាដែលហ៊ានបញ្ចេញមតិយោបល់ លើសេចក្តីព្រាងរដ្ឋធម្មនុញ្ញនេះផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
គម្រោងរដ្ឋធម្មនុញ្ញថ្មី នឹងនាំប្រទេសថៃឆ្ពោះទៅរកលទ្ធិប្រជាធិបតេយ្យ បែបផ្តាច់ការ។ ព្រឹទ្ធសភាជាល្បាយនៃទាហាននិងប៉ូលិស ! ក្នុងចំណោមសមាជិកចំនួន២៥០នាក់ ខ្លះជាអតីតនាយទាហាន និងមេប៉ូលិស និងដែលត្រូវតែងតាំងដោយយោធា។ ឥស្សរជនម្នាក់ នៅក្រៅពិភពលោកនយោបាយ និងដោយមិនឆ្លងកាត់ការបោះឆ្នោតនឹងអាចក្លាយទៅជានាយករដ្ឋមន្ត្រី។ គណៈកម្មការយុទ្ធសាស្ត្រ ដែលមានទម្រង់ជាការិយាល័យនយោបាយ ត្រួតត្រាដោយយោធា អាចនឹងមានអំណាចរយៈពេល២០ឆ្នាំ សម្រាប់បញ្ជាលើរដ្ឋាភិបាលឱ្យធ្វើតាម។ សភាជាតិ នឹងឆ្លងកាត់ការបោះឆ្នោត ប៉ុន្តែជាធម្មតានិងដោយជាក់ស្តែង ពិតជានឹងគ្មានអំណាចជាប្រាកដឡើយ។
នេះគឺជាដើរត្រលប់ថយក្រោយ ! ថយដល់ទៅ៤០ឆ្នាំ ទៅរកអតីតកាល ដែលកាលណោះរាជាណាចក្រថៃ ស្ថិតក្រោមរបបដឹកនាំមួយដែលគេប្រសិទ្ធិនាមថា ប្រជាធិបតេយ្យពាក់កណ្តាលផ្តាច់ការ។
សម្រាប់របបសឹក ការធ្វើប្រជាមតិលើគម្រោងរដ្ឋធម្មនុញ្ញ នៅខែសីហាខាងមុខ គឺជាជម្រើសបែបប្រជាធិបតេយ្យ ព្រោះបើពលរដ្ឋបោះឆ្នោតទទួលយកគម្រោងច្បាប់ នោះមានន័យថាជាការយល់ព្រម ការអនុម័តច្បាប់ដោយសំឡេងប្រជាពលរដ្ឋ។ ប៉ុន្តែ នៅក្នុងស្ថានភាពជាក់ស្តែង របបសឹក បានចេញបម្រាមហាមឃាត់ គ្រប់ទម្រង់នៃការតស៊ូមតិ ឬការពិភាក្សាវែកញែក ជាសាធារណៈ លើគម្រោងច្បាប់នេះ។ ក្រិត្យច្បាប់មួយបានចេញប្រកាស ដាក់ទោសធ្ងន់រហូតដល់ជាប់ពន្ធនាគារ១០ឆ្នាំ លើជនឬបុគ្គលណាដែលហ៊ានជះឥទ្ធិពលលើពលរដ្ឋម្ចាស់ឆ្នោត មុនពេលពេលធ្វើប្រជាមតិ។ តើនេះមិនមែនជាបំផ្លែងការពិតទេឬ ?!
វិធានការដ៏គួរឱ្យព្រួយបារម្ភខ្លាំងបំផុតមួយទៀត គឺការគំរាមកំហែងរបស់រដ្ឋាភិបាលយោធាថៃ។ ប្រសិនបើគម្រោងរដ្ឋធម្មនុញ្ញនេះ ត្រូវបានច្រានចោលដោយប្រជាមតិ នោះរបបសឹកគំរាមវិលទៅបន្តប្រើច្បាប់រដ្ឋធម្មនុញ្ញចាស់ ដែលតឹងតែងខ្លាំងជាងគ្រោងថ្មីនេះផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ