ប្រធានាធិបតីភូមាថ្មីយកចិត្តទុកដាក់រឿងជម្លោះជាតិពិន្ធុ តែមិនខ្វល់ពីរ៉ូហ៊ីងយ៉ា
ប្រធានាធិបតីស៊ីវិលថ្មីភូមា លោក ទីន ចវ ដែលជាមនុស្សជំនិតរបស់លោកស្រី អ៊ុង សានស៊ូជី បានគូសបញ្ជាក់ជាថ្មី នៅថ្ងៃចន្ទទី ២១ មីនា ២០១៦ នេះអំពីភាពសំខាន់ ដ៏ចាំបាច់បំផុត ក្នុងការដោះស្រាយជម្លោះជាមួយជនជាតិភាគតិចនៅភូមា។ ជម្លោះជាតិពិន្ធុ ជាវិបត្តិដ៏រ៉ាំរ៉ៃមួយរបស់ភូមា។ នារយៈពេលប៉ុន្មានឆ្នាំ ចុងក្រោយនេះ រដ្ឋាភិបាលភូមាបានចុះកិច្ចព្រមព្រៀងសន្តិភាពជាមួយក្រុមជនជាតិភាគតិចប្រដាប់អាវុធមួយចំនួន តែការប្រយុទ្ធគ្នានៅតែក្នុងតំបន់ខ្លះ រវាងកងកម្លាំងឧទ្ទាមនិងរដ្ឋាភិបាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ថ្វីដែលថ្មីសម្រាប់រដ្ឋាភិបាលស៊ីវិលភូមាថ្មី គឺក្រសួងទទួលបន្ទុកកិច្ចការជាតិពិន្ធុ ជាក្រសួងដ៏សំខាន់សម្រាប់អនាគតប្រទេស ! នេះជាសេចក្តីប្រកាសរបស់លោក ទីន ចវ ប្រធានាធិបតីស៊ីវិលដំបូងរបស់ភូមា នៅចំពោះមុខសភា។ បើតាមអត្ថន័យនៃសុន្ទរកថា ដែលមានលក្ខណៈទូទៅខ្លាំង លោកទីន ចវ មុននឹងចូលកាន់តំណែងជាផ្លូវការ មានបង្ហាញចេតនា ចង់ស្វែងរកសន្តិភាពជាមួយក្រុមជនជាតិភាគតិច។
ជម្លោះប្រដាប់អាវុធរវាងជាតិពិន្ធុនៅភូមា ជាវិបត្តិដ៏ចំណាស់និងបន្តអូសបន្លាយរាប់ទសវត្សរ៍មកហើយ។ ដោយហេតុតែវិបត្តិនេះ មនុស្សម្នាប្រមាណ២សែនបួនម៉ឺននាក់ ត្រូវបង្ខំចិត្តរស់ភៀសខ្លួនពីផ្ទះសម្បែង។ ស្ថានភាពកាន់តែដុនដាបខ្លាំង មានកើតឡើងនៅរដ្ឋកាឈីន ឬ ឈ័ន ព្រោះពួកឧទ្ទាមជនជាតិភាគតិចប្រដាប់អាវុធនិងរដ្ឋាភិបាលនៅបន្តប្រយុទ្ធគ្នានៅឡើយ។
នៅរដ្ឋរ៉ាឃីន ភាគខាងលិចប្រទេសវិញ គឺក្រុមជនជាតិភាគតិចកាន់សាសនាអ៊ីស្លាម រ៉ូហ៊ីងយ៉ាង ដែលរងការរើសអើង និងរងអំពើហិង្សាខ្លាំង។ ប៉ុន្តែនៅថ្ងៃចន្ទនេះ លោកប្រធានាធិបតីថ្មី មិនបាននិយាយប៉ះពាល់ដល់ជោគវាសនាជនជាតិភាគតិចមួយក្រុមនេះទេ។ “រ៉ូហ៊ីងយ៉ា” ជាពាក្យដែលភូមា មិនត្រូវការឮ ត្រូវការនិយាយចេញពីមាត់ឡើយ !
តំណាងគណៈកម្មការទទួលបន្ទុកសិទ្ធិមនុស្សអង្គការសហប្រជាជាតិ HCR បានបង្ហាញក្តីសង្ឃឹមថា សំណុំរឿងរ៉ូហ៊ីងយ៉ា នឹងក្លាយជាអាទិភាពមួយរបស់រដ្ឋាភិបាលថ្មីដែលបង្កើតឡើយដោយលោកស្រី អ៊ុង សានស៊ូជី និងលោក ទីន ចវ។ បើមានបង្កើតក្រសួងទទួលបន្ទុកជាតិពិន្ធុហើយ ក្រសួងនេះត្រូវមានភារៈដោះស្រាយវិបត្តិជនជាតិភាគតិច។
ប៉ុន្តែបញ្ហានៅត្រង់ថា ភូមាមិនបានទទួលស្គាល់ជនជាតិភាគតិចអ៊ីស្លាមនេះទេ និងបានចាត់ទុកជនអន្តោប្រវេសន៍បង់ក្លាដែសខុសច្បាប់ ទោះបានរស់នៅលើទឹកដីភូមាតាំងពីប៉ុន្មានជំនាន់ក៏ដោយ។ លោកស្រីអ៊ុងសានស៊ូជី ជាទីគោរពរបស់ពលរដ្ឋភូមា ក៏ធ្លាប់បានរងការរិះគន់យ៉ាងខ្លាំងដែរ ចំពោះភាពស្ងប់ស្ងាត់មិនចេញស្តីអ្វីទាំងអស់ នៅពេលមានផ្ទុះអំពើហិង្សាលើពួករ៉ូហ៊ីងយ៉ា ពីសំណាក់អ្នកកាន់ពុទ្ធសាសនា កាលពីឆ្នាំ២០១២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ