ភូមា៖លោកស្រីអ៊ុង សានស៊ូជីស្នើឲ្យបង្កើតក្រសួងទទួលបន្ទុកជនជាតិពិន្ធុ
នៅក្នុងប្រទេសភូមា លោកស្រីអ៊ុង សានស៊ូជី ប្រធានគណបក្សសម្ព័ន្ធជាតិដើម្បីលទ្ធិប្រជាធិបតេយ្យបានប្រកាសឲ្យដឹងនៅថ្ងៃព្រហស្បតិ៍ ទី១៧ មីនាថា រដ្ឋាភិបាលថ្មីដែលប្រសូត្រចេញដោយគណបក្សរបស់លោកស្រីនាពេលខាងមុខនឹងបំពាក់ដោយក្រសួងថ្មីមួយដើម្បីទទួលបន្ទុកកិច្ចការរបស់ជនជាតិពិន្ធុ។ ការប្រកាសឲ្យមានក្រសួងទទួលបន្ទុកជនជាតិពិន្ទុពេលនេះបានធ្វើឡើង ចំពេលដែលភូមាបានប្រឈមមុខនឹងជម្លោះជាមួយក្រុមជនជាតិពិន្ធុផ្សេងៗតាំងពីទទួលបានឯករាជ្យពីប្រទេសអង់គ្លេសក្នុងឆ្នាំ ១៩៤៨។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
គម្រោងស្នើបង្កើតឲ្យមានក្រសួងទទួលបន្ទុកកិច្ចការជនជាតិពិន្ធុដែលត្រូវបានបញ្ជូនទៅកាន់សភានៅថ្ងៃព្រហស្បតិ៍ ទី១៧ មីនា គឺជាវិធានការទី១ ក្រោយពីការជាប់ឆ្នោតជាប្រធានាធិបតីថ្មីរបស់លោកទីន ចវក្នុងថ្ងៃទី១៥ មីនា និងដែលលោកត្រូវចូលកាន់តំណែងជាផ្លូវការនាថ្ងៃទី៣០ មីនាស្របនឹងរដ្ឋាភិបាលថ្មីរបស់គណបក្សលោកស្រីអ៊ុង សានស៊ូជី។ ក្រៅពីក្រសួងទទួលជនជាតិពិន្ធុ ក៏នៅមានបញ្ជីឈ្មោះក្រសួងចំនួន ២០ផ្សេងទៀតដែលលោកប្រធានាធិបតីទីន ចវបានបញ្ជូនទៅកាន់រដ្ឋសភា។
ការបង្កើតឲ្យមានក្រសួងទទួលបន្ទុកកិច្ចការជនជាតិពិន្ធុនៅក្នុងរដ្ឋាភិបាលថ្មីពេលនេះមិនមែនជារឿងគួរឲ្យភ្ញាក់ផ្អើលប៉ុន្មានទេ ព្រោះលោកស្រីអ៊ុង សានស៊ូជីធ្លាប់បានបញ្ជាក់រួចហើយថា បញ្ហាជនជាតិពិន្ធុជារឿងអាទិភាពទី១ នៅក្នុងដំណើរស្វែងរកសន្តិភាព។ លោកស្រីស៊ូជីធ្លាប់បានស្នើឲ្យមានអ្នកតំណាងជនជាតិភាគតិចឈីនឈរឈ្មោះជាបេក្ខជនអនុប្រធានាធិបតី។ គឺកាយវិការសម្របសម្រួលរបស់លោកស្រីស៊ូជីនេះឯងដែលនាការបោះឆ្នោតសភាក្នុងខែវិច្ឆិកាកន្លងទៅ គណបក្សរបស់លោកស្រីទទួលបានសម្លេងឆ្នោតយ៉ាងច្រើននៅក្នុងតំបន់ដែលគ្រប់គ្រងដោយជនជាតិពិន្ធុ។
សូមជម្រាបជូនថា ភូមាជាប្រទេសមួយនៅអាស៊ីអាគ្នេយ៍ដែលមានជនជាតិភាគតិចជាង ១៣០បែបខុសៗគ្នារស់នៅ និងដែលរដ្ឋាភិបាលបានប្រឈមមុខនឹងក្រុមជនជាតិភាគតិចខ្លះតាំងពីជាងកន្លះសតវត្សមកហើយ ពោលតាំងពីភូមាបានទទួលឯករាជ្យក្នុងឆ្នាំ ១៩៤៨។ អ្វីដែលក្រុមជនជាតិភាគតិចខ្លះបានតស៊ូប្រដាប់អាវុធទាមទារពីរដ្ឋអំណាចកណ្តាល គឺស្វ័យភាពនៅក្នុងតំបន់ដែលពួកគេរស់នៅ។
កាលពីថ្ងៃទី១៥ តុលា ឆ្នាំ ២០១៥ មានក្រុមឧទ្ទាមចំនួន ៨ក្រុមក្នុងចំណោម ១៥ក្រុមបានចុះហត្ថលេខាលើបទឈប់បាញ់មួយរយៈ តែនៅមានក្រុមសំខាន់ផ្សេងទៀតបានបដិសេធមិនចុះហត្ថលេខា។ តំបន់ដែលបន្តក្តៅ និងពិបាកគ្រប់គ្រងជាងគេ គឺតំបន់ដែលសម្បូរដោយធនធានធម្មជាតិ ពិសេសត្បូងទទឹម។ ជាការកត់សម្គាល់ ចំនួនក្រសួងនៅក្នុងរដ្ឋាភិបាលថ្មីនឹងត្រូវកាត់បន្ថយពី ៣៦ មកនៅត្រឹមតែ ២១ក្រសួង។ តែមានក្រសួងចំនួន ៣ ដែលរដ្ឋាភិបាលថ្មីមិនអាចប៉ះបាន និងត្រូវស្ថិតក្រោមការកាន់កាប់របស់កងទ័ព គឺក្រសួងមហាផ្ទៃ ក្រសួងការពារជាតិ និងក្រសួងទទួលបន្ទុកកិច្ចការព្រំដែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ