ស្នងការសិទ្ធិមនុស្សទាមទារបើកអង្កេតលើប្រធានាធិបតីហ្វីលីពីនពីបទមនុស្សឃាត
ឧត្តមស្នងការសិទ្ធិមនុស្សនៃអង្គការសហប្រជាជាតិ បានជំរុញឱ្យតុលាការហ្វីលីពីន បើកអង្កេតមួយប្រឆាំងនឹងលោក ឌុយទែរតេ បន្ទាប់ពីប្រធានាធិបតី មាត់ដាចម្នាក់នេះ បានប្រកាសចេញពីបបូរមាត់ផ្ទាល់ កាលពីសប្តាហ៍មុន ថា កាលពីលោកនៅជាចៅហ្វាយក្រុង Davao លោកបានសម្លាប់ដោយផ្ទៃដៃជនសង្ស័យជួញដូរគ្រឿងញៀន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
មានទម្លាប់បំផុសរឿងអាស្រូវ ប្រើពាក្យអសុរស ជេរសម្តេចប៉ាប ជេរប្រធានាធិបតីអាមេរិកអូបាម៉ា លោកប្រធានាធិបតីហ្វីលីពីន ឌុយទែរតេ បាននាំចំណាប់អារម្មណ៍ថ្មីមួយទៀត កាលពីសប្តាហ៍មុន ដោយបានប្រកាសថា លោកធ្លាប់បានសម្លាប់ឧក្រិដ្ឋជនជាប់សង្ស័យក្នុងជំនួញគ្រឿងញៀន កាលលោកនៅជាចៅហ្វាយក្រុងDavao ពីឆ្នាំ១៩៨៨-២០១៦។
ពាក្យសំដីនេះ ត្រូវបានលោកគ្រលាស់ចេញពីបបូរមាត់លោក នៅក្នុងវិមានប្រធានាធិបតី និងនៅចំពោះមុខអ្នកជំនួញធំៗជាច្រើននាក់។ ជាមួយនឹងមោទនភាព ដែលលោកបានគោរពពាក្យសន្យា ធ្វើប្រតិបត្តិការកម្ចាត់ឧក្រិដ្ឋជនគ្រឿងញៀនអស់រាប់ពាន់នាក់ តាំងពីលោកឡើងកាន់តំណែងជាប្រធានាធិបតីនៅថ្ងៃទី ៣០មិថុនា ២០១៦មក លោក ឌុយទែរតេបានរៀបរាប់អំពីឃាតកម្មរបស់ប៉ូលិស និងអំពីសកម្មភាពគំរូរបស់លោក ដើម្បីលើកទឹកចិត្តដល់ប៉ូលិសក្នុងការប្រយុទ្ធប្រឆាំងនឹងគ្រឿងញៀន ដោយបានជិះម៉ូតូចុះទៅប្រមាញ់ចាប់ពួកទុច្ចរិត តាមដងផ្លូវ បង្កហេតុមុន ដើម្បីបានបាញ់សម្លាប់ ដោយផ្ទាល់ដៃ។
កាលពីថ្ងៃសុក្រ លោក ឌុយទែរតេ បានប្រាប់រឿងដដែលនេះទៅទូរទស្សន៍BBC ដោយបញ្ជាក់បានសម្លាប់ជនសង្ស័យគ្រឿងញៀនបានបីនាក់ កាលនៅជាចៅហ្វាយក្រុង។
ទាំងអសុរស ទាំងឃោរឃៅ ទាំងរំលោភច្បាប់អន្តរជាតិ ឧត្តមស្នងការសិទ្ធិមនុស្សអង្គការសហប្រជាជាតិ បានទាមទារ នៅថ្ងៃនេះឱ្យតុលាការហ្វីលីពីនបើកអង្កេត ព្រោះគេពិតជាមិនអាចអត់គិតបានឡើយ នៅពេលមនុស្សម្នាក់បានប្រកាសជាសាធារណៈថាបានសម្លាប់មនុស្សនោះ។ អំពើឃាតកម្មរបស់លោកឌុយទែរតេ សារភាពចេញពីមាត់លោក អាចបញ្ជាក់បានយ៉ាងច្បាស់ថាលោកប្រព្រឹត្តអំពើមនុស្សឃាត។
ស្ថាប័នតុលាការត្រូវបង្ហាញខ្លួនថាមានអំណាចឯករាជ្យ មិនស្ថិតក្រោមរណបអំណាចប្រតិបត្តិ និងរដ្ឋាភិបាលទេ។ នេះជាការគូសបញ្ជាក់បន្ថែមរបស់ឧត្តមស្នងការសិទ្ធិមនុស្ស ដែលបានឆ្លៀតបរិហារនយោបាយបង្ក្រាបការជួញដូរគ្រឿងញៀន ខុសបែបផែន សាបព្រោះអំពើហិង្សានិងមិនដាក់ទោសតាមផ្លូវច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ