ប្រមុខអង្គការពិភពលោក លោកបាន គីមូនរងការចោទប្រកាន់ពីបទពុករលួយក្នុងប្រទេសកំណើត
នៅកូរ៉េខាងត្បូង លោកបាន គីមូន អគ្គលេខាធិការអង្គការសហប្រជាជាតិកំពុងរងការចោទប្រកាន់ពីបទពុករលួយក្នុងប្រទេសកំណើត។ តាមលទ្ធផលស៊ើបអង្កេតមួយចុះផ្សាយដោយទស្សនាវដ្តីកូរ៉េឲ្យដឹងថា លោកបាន គីមូនបានទទួលលុយសុទ្ធចំនួន ២០០ ០០០ដុល្លារកាលពីឆ្នាំ ២០០៥ ក្នុងពេលដែលលោកមានតួនាទីជារដ្ឋមន្រ្តីការបរទេស ហើយបានទទួលចំនួន ៣០ ០០០ដុល្លារទៀតក្នុងឆ្នាំ ២០០៧ បន្ទាប់ពីលោកទទួលបានតំណែងជាអគ្គលេខាធិការអង្គការសហប្រជាជាតិ។
ចុះផ្សាយនៅថ្ងៃ៖
ស្តាប់ - ០២:២៥
អ្វីៗត្រូវបានទស្សនាវដ្តីប្រចាំសប្តាហ៍មួយនៅកូរ៉េឈ្មោះ Sisa ទម្លាយឲ្យដឹងថា កាលពី ១០ឆ្នាំមុនក្នុងនាមជារដ្ឋមន្រ្តីការបរទេស លោកបាន គីមូនបានទទួលលុយសុទ្ធចំនួន ២៣០ ០០០ដុល្លារ។ គឺជាទឹកលុយសូកប៉ាន់ដែលលោកបាន គីមូនបានទទួលពីលោកប៉ាក់ យុនចា ចៅហ្វាយក្រុមហ៊ុន Taekwang ហើយឈ្មោះលោកប៉ាក់ យុនចាដដែលនេះក៏ធ្លាប់ជាប់ពាក់ព័ន្ធនឹងរឿងអាស្រូវពុករលួយសំដៅលើមនុស្សជំនិតរបស់លោកអតីតប្រធានាធិបតីកូរ៉េខាងត្បូងរ៉ូ មូយុនដែរ។
លោកបាន គីមូនដែលនឹងត្រូវបញ្ចប់តំណែងអគ្គលេខាធិការអង្គការសហប្រជាជាតិនៅថ្ងៃទី១ មករាខាងមុខនៅមិនទាន់បានបញ្ចេញប្រតិកម្មអ្វីទេ តែអ្នកនាំពាក្យរបស់គាត់បានច្រានចោលព័ត៌មាននេះដោយចាត់ទុកជាព័ត៌មានក្លែងក្លាយ និងគ្មានមូលដ្ឋានច្បាស់លាស់។ ទន្ទឹមគ្នានេះ រូបអ្នកនាំពាក្យដដែលក៏បានទាមទារឲ្យទស្សនាវដ្តី Sasi ដកព័ត៌មាននោះចោលវិញ រួចធ្វើការសុំទោស។
គេនៅមិនទាន់ដឹងថា តើព័ត៌មានរឿងអាស្រូវពុករលួយជាប់ពាក់ព័ន្ធនឹងលោកបាន គីមូនជាការពិត ឬជារឿងប្រឌិតទេ អ្វីដែលគេដឹង ព័ត៌មានមួយនេះបានជះឥទ្ធិពលមិនល្អទាល់តែសោះលើលោកបាន គីមូន ព្រោះថា បន្ទាប់តំណែងជាអគ្គលេខាធិការអង្គការសហប្រជាជាតិរយៈពេល ២អាណត្តិមក លោកសង្ឃឹមនឹងកាន់តំណែងប្រធានាធិបតីនៅក្នុងប្រទេសកំណើតបន្ថែមទៀត។ សូមជម្រាបជូនថានៅក្នុងប្រទេសកំណើត លោកបាន គីមូនទទួលបានការគាំទ្រច្រើនពីអ្នកបោះឆ្នោតកូរ៉េដែលមានវ័យចំណាស់។
គណបក្សអភិរក្សនិយមដែលកំពុងកាន់អំណាច និងដែលកំពុងធ្លាក់កូដដោយរឿងអាស្រូវពុករលួយជាប់ពាក់ព័ន្ធនឹងលោកស្រីប្រធានាធិបតីប៉ាក់ គុនហេទម្លាក់ពីអំណាចសង្ឃឹមថា នឹងជ្រើសយកលោកបាន គីមូនជាបេក្ខជនសម្រាប់ការបោះឆ្នោតខាងមុខ។ ដោយឡែក គណបក្សចម្រើននិយម Minjoo ដែលជាបក្សប្រឆាំងបានទាមទារឲ្យមានការស៊ើបអង្កេតមួយលើព័ត៌មានរបស់ទស្សនាវដ្តី Sasi។ សម្រាប់គណបក្យ Minjoo ដែលបេក្ខជនរបស់ខ្លួនកំពុងទទួលបានសម្លេងគាំទ្រខ្លាំងយល់ឃើញថា លោកបាន គីមូនជាបេក្ខជនគូប្រជែងដ៏គ្រោះថ្នាក់បំផុត។
យ៉ាងណាក៏ដោយ បើតុលាការធម្មនុញ្ញសម្រេចទម្លាក់លោកស្រីប៉ាក់ គុនហេពីតំណែងដូចដែលសភាបានអនុម័តមែន នោះការរៀបចំបោះឆ្នោតប្រធានាធិបតីមុនអាណត្តិនឹងត្រូវរៀបចំយ៉ាងយូរបំផុតក្នុងរយៈពេល ៦០ថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ