ចិនបង្កើតពន្ធលើការបំពុលបរិស្ថានក្នុងផ្នែកឧស្សាហកម្ម
សភាចិន ទើបបានអនុម័តលើច្បាប់មួយដើម្បីយកពន្ធលើរោងចក្រណាដែលធ្វើការបំពុលបរិស្ថាន។ ច្បាប់ថ្មីនេះ អាចនឹងអនុវត្តទៅបានចាប់ពីឆ្នាំ ២០១៨ទៅ។ ម្យ៉ាងទៀតការបំពុលបរិយាកាសក្នុងកម្រិតដ៏ខ្ពស់បំផុតនារយៈពេល៦ថ្ងៃកន្លងមកនេះ បានជះផលវិបាកដ៏ធ្ងន់ធ្ងរទៅលើប្រជាជនចិនចំនួន១/៣នៅក្នុងប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
បណ្តាញទូរទស្សន៍រដ្ឋចិន បានចាក់ផ្សាយឥតឈប់ឈរ ព័ត៌មានស្តីអំពីការបង្កើតពន្ធមួយនៅក្នុងវិស័យឧស្សាហកម្ម។ ហើយចាប់ពីឆ្នាំ២០១៨ទៅ រោងចក្រទាំងអស់នៅក្នុងប្រទេស ចិននឹងត្រូវបង់ពន្ធមួយនៅលើការបំពុលបរិយាកាសដែលខ្លួនបានបង្កឡើង ទោះបីជាទៅក្នុងបរិយាកាសក្តីឬក៏ទៅក្នុងទឹកក្តី។ ម្យ៉ាងទៀត រោងចក្រត្រូវបង់ពន្ធទៅតាមកម្រិតសារធាតុពុលក្នុងបរិយាកាសនិងទៅតាមកាកសំណល់ពុលរបស់រោងចក្រ។
សកម្មជនការពារបរិស្ថានចិន លោក Wu Lihong បានអះអាងថា" វិធានការថ្មីរបស់ចិននេះ សំខាន់ខ្លាំងណាស់ ក៏ប៉ុន្តែវាមកដល់យឺតពេលទៅហើយ"។ សកម្មជនការពារបរិស្ថានដដែលនេះ បានគូសបញ្ជាក់ទាំងក្តៅក្រហាយចិត្តថា”សព្ធថ្ងៃនេះ នៅក្នុងប្រទេសចិន គ្មានទន្លេណាមួយនៅស្អាត បរិសុទ្ធទេ ចំណែកឯដីធ្លីវិញ សុទ្ធតែបង្កប់ទៅដោយសារជាតិពុល"។
ដោយសារតែអាកាសធាតុត្រជាក់ខ្លាំងពេកនៅភាគខាងជើងប្រទេសចិន ខ្យល់កាន់តែត្រូវបានបំពុលខ្លាំងថែមមួយកំរឹតទៀត។ សកម្មជនបរិស្ថានចិនបានសង្កត់ពាក្យថែមទៀតថា ប្រទេសចិន ពុំបានគិតពីអាយុជីវិតរបស់ប្រជាជនខ្លួនទេ តែខ្វល់ខ្វាយតែពីបញ្ហា អភិវឌ្ឈន៍ប្រទេសមួយមុខគត់។
ការបំពុលបរិយាកាសនៅក្នុងប្រទេសចិន ឥឡូវនេះ បានក្លាយទៅជាទុក្ខកង្វល់ប្រចាំថ្ងៃមួយរបស់ប្រជាជនចិនទៅហើយ។ ចំពោះលោក Stefan Berder ដែលជាម្ចាស់សហគ្រាសមួយទទួលបន្ទុកការវាស់វែងគុណភាពខ្យល់នៅក្នុងប្រទេសចិនវិញ “ដោយហេតុតែការបំពុលបរិយាកាស មានកម្រឹតដល់កំពូលនេះហើយដែលជម្រុញអោយរដ្ឋាភិបាលចិន ប្រកាសជូនដំណឹងអំពីច្បាប់នេះ" ។
ម្យ៉ាងទៀតក្នុងរយៈពេលប៉ុន្មានថ្ងៃចុងក្រោយនេះ ការបំពុលបរិយាកាស បានឈានដល់កម្រិត៤០ដងខ្ពស់ជាងកម្រឹតរបស់អង្គការសុខភាពពិភពលោកទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ