នុយក្លេអ៊ែរកូរ៉េខាងជើង៖ ប្រមុខការបរទេសអាមេរិកចង់បានដំណោះស្រាយថ្មី ក្រៅពីនយោបាយការទូត
រដ្ឋមន្រ្តីការបទេសអាមេរិក លោករិច ធីល័រសុន Rex Tillerson បានអះអាងធានាពីការគាំទ្រគ្មានងាករេរបស់អាមេរិក សម្រាប់ជប៉ុន ដែលកំពុងប្រឈមនឹងការគំរាមកំហែងនុយក្លេអ៊ែររបស់កូរ៉េខាងជើង។ នៅក្នុងសន្និសីទកាសែត ធ្វើឡើងនៅថ្ងៃព្រហស្បតិ៍នេះ នៅទីក្រុងតូក្យូ ប្រមុខការបរទេសអាមេរិកបានលើកឡើងផងដែរពីបំណងរបស់អាមេរិក ដែលចង់ស្វែងរកដំណោះស្រាយថ្មីផ្សេង ក្រៅពីនយោបាយការបទេស ដើម្បីជំរុញឲ្យកូរ៉េខាងជើងលះបង់ចោលកម្មវិធីផលិតអាវុធនុយក្លេអ៊ែរ និងមីស៊ីល។
ចុះផ្សាយនៅថ្ងៃ៖ កែប្រែថ្ងៃទី៖
សម្រាប់ប្រមុខការបរទេសអាមេរិក គេត្រូវតែស្វែងរកដំណោះស្រាយថ្មី ព្រោះថា នយោបាយការទូតដែលគេប្រើ ក្នុងរយៈពេល២០ឆ្នាំចុងក្រោយនេះ បានបរាជ័យ មិនអាចជំរុញកូរ៉េខាងជើងឲ្យលះបង់ចោលមហិច្ឆតានុយក្លេអ៊ែរ។ តាមគំនិតរបស់រដ្ឋមន្រ្តីការបរទេសអាមេរិក វាជារឿងចាំបាច់ ដែលគេត្រូវបង្កើតវិធីសាស្រ្តថ្មីមួយ ដើម្បីប្រឈមនឹងការគំរាមកំហែងនុយក្លេអ៊ែររបស់កូរ៉េខាងជើង។
នៅក្នុងសន្និសីទកាសែត ជាមួយរដ្ឋមន្រ្តីការបរទេសជប៉ុន នៅថ្ងៃនេះ លោករិច ធីល័រសុននិយាយពីវិធីសាស្រ្តថ្មី ផ្សេង ក្រៅពីនយោបាយ និងការទូត ដើម្បីដោះស្រាយវិបត្តិនុយក្លេអ៊ែរកូរ៉េខាងជើង ប៉ុន្តែ លោកមិនបានលម្អិតថា តើវិធីសាស្រ្តថ្មីនោះ មានខ្លឹមសារយ៉ាងណានោះទេ។ រដ្ឋមន្រ្តីការបរទេសអាមេរិកបានអំពាវនាវផងដែរឲ្យទីក្រុងប៉េកាំងដាក់សម្ពាធខ្លាំងជាងមុន លើកូរ៉េខាងជើង ដែលជាសម្ព័ន្ធមិត្តរបស់ខ្លួន។ លោករិច ធីល័រសុនដែលនឹងធ្វើដំណើរទស្សនកិច្ចទៅប្រទេសចិន នៅថ្ងៃ សៅរ៍ ខានស្អែកបានសន្យាថា លោកនឹងនិយាយពិភាក្សាជាមួយ ចិន ដើម្បីស្វែងរកវិធានការថ្មីៗ ដែលចិនត្រូវធ្វើ នៅក្នុងរឿងនុយក្លេអ៊ែរកូរ៉េខាងជើង។
រដ្ឋមន្រ្តីការបរទេសជប៉ុន Fumio Kishida យល់ស្របជាមួយសមភាគីអាមេរិក ដែលថា ចិន ដើរតួយ៉ាងសំខាន់ នៅក្នុងបរិបទដែលការគំរាមកំហែងនុយក្លេអ៊ែររបស់កូរ៉េខាងជើងបានកើនឡើងដល់កម្រិតមួយខ្ពស់ មិនធ្លាប់មាន។
ប៉េកាំង ធ្លាប់បានបង្ហាញឲ្យឃើញពីកង្វល់របស់ខ្លួន នៅពេលកូរ៉េខាងជើងប៉ុនប៉ងចង់ក្លាយខ្លួនជាមហាអំណាចនុយក្លេអ៊ែរ នឹងគេដែរ។ ចិនគាំទ្រកម្មវិធីផលិតមីស៊ីលរបស់កូរ៉េខាងជើង ប៉ុន្តែ មិនចង់ឃើញលេចមានមហាអំណាចនុយក្លេអ៊ែរ នៅក្បែរច្រមុះមាត់របស់ខ្លួននោះទេ។ យ៉ាងណាក៏ដោយ ចិននៅតែអរិភាព មិនចង់ឲ្យសកម្មភាព នយោបាយពីខាងក្រៅ ណាមួយ ចូលទៅរង្គោះរង្គើរបបកុម្មុយនិស្តព្យុងយ៉ាងដែរ។ ចិននៅបានរិះគន់ខ្លាំងសកម្មភាពតាំងប្រព័ន្ធខែលមីស៊ីលរបស់អាមេរិក THAAD នៅកូរ៉េខាងត្បូង ដែលចិនចាត់ទុកថា ជាយុទ្ធសាស្រ្តរបស់អាមេរិក ដើម្បីផ្ចាញ់ គំរាមកំហែងយុទ្ធសាស្រ្តយោធារបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ